“Hərbi Jurnalistlər” İctimai Birliyinin rəhbəri, hərbi ekspert Üzeyir Cəfərov Azərbaycanda məhkəmə hakimlərinin özbaşınalığı ilə bağlı facebook səhifəsində maraqlı status paylaşıb. Moderator.az həmin statusu oxuculara təqdim edir:
“Dəyərli dostlar, hörmətli həmkarlar!!
Son vaxtlar bir neçə məhkəmə proseslərində həm iddiaçının nümayəndəsi, həm də özüm iddiaçı kimi iştirak etdiyim üçün bəzi müşahidələrimi sizin diqqətinizə çatdırmaq istərdim.
Azərbaycanın məhkəmə sistemi çox ağır bir durumdadır. Bunu demək olar ki, bilməyən yoxdur. Özüm çoxsaylı məhkəmə proseslərində iştrak etdiyimə görə tam məsuliyyətimlə deyə bilərəm ki, zamanı-vaxtı gələcək məhkəmə sistemimizi bu vəziyyətə salan şəxslər mütləq həm xalq qarşısında, həm də tarix qarşısında cavab verməli olacaqlar. Yaxın tariximizdə Bakının Nərimanov rayon Məhkəməsinin sədri olmuş Ağababa Babayevin neçə sifariş əsasında insanları həbsə aldırması, sonra isə 5 milyon rüşvət müqabilində bir az öncə həbs etdiyi adamı həbsdən azad etdiyini, özü də bu əməlinə görə ənam almadığını hamımız onun öz dilindən eşitdik və şahidi olduq. Azərbaycan dövləti adından cinayət edən bir şəxs az keçmədi ki, "oyun qaydalarını" (oxu məhkəmənin fırıldaqlarını-Ü.C.) pozduğuna görə haqqında araşdrıma aparıldı və ötən aylarda çox ağır xəsətəliyə tutulduğundan dünyasını dəyişdi. Yaxud, Bakı Ağır Cinayətlər Məhkəməsinin Həsən Əliyev soyadlı hakimi 600 min rüşvəti kimisə icra başçısı təyin edəcəyi vədi ilə aldatdığına görə məhkum edildi. Bir vaxtlar Yasamal Rayon Məhkəməsində Tatyana Zipinyova adlı, Nəsimi Rayon Məhkəməsində Gülnarə Tağızadə, Xəzər Rayon Məhkəməsində, Ceyhun Qədimov və hal-hazırda da Ali Məhkəmədə oturub başımıza min oyun açan Tatyana Qoldman kimi adlarını qeyd etdiyim və qeyd etmədiyim hakimlər qanunlara deyil, başında oturan məhkəmə sədrlərinin qeyri-qanuni əmr və göstərişlərinə əməl etməklə müqəddəs hakim adına, ədalət mühakiməsi adına böyük zərbə vururlar. Çəkinmədən deyirəm ki, bir çox işlərin başında fəaliyyətini hələ 1994-cü ilin əvvəllərində Beyləqan rayon prokuroru olarkən, sonradan Respublikanın Hərbi Prokuroru, hazırda isə Ali Məhkəmənin sədri olan Ramiz Rzayevin mərhum prezident Heydər Əliyevin hüzurunda müşavirə zamanı sərt tənqid etdiyim şəxs olmasını dəfələrlə həm demişəm, deyirəm və deyəcəyəm. 2007-ci ildə həyatıma sui-qəsd ediləndə də mən Azərbaycan məhkəmələrində haqq-ədalətə məhz Ramiz Rzayevin və digər şəxslərin birbaşa müdaxiləsi nəticəsində nail ola bilməsəm də, düz 8 ildən sonra 2015-ci ilin yanvar ayında Avropa İnsan Hüquqları Məhkəməsində (AİHM) 17 ölkədən olan hakimlər vasitəsiylə nail oldum. Bu iş artıq təzələnib və hələ ki, bizim Yasamal rayon prokurorluğu araşdırma aparır. Görək nə edirlər.
Qayıdıram bizim hakimlərin özlərini əsl "aktyor, artist" kimi aparmalarına. İllahda ki, onlar roldan-rola girib özlərini az qala mələk kimi göstərirlər, sənin gətirdiyin faktları və sübutları qəbul edir və müşavirə otağına gedib qayıdanda qanunsuzluğu təsdiq etmiş olurlar. Adam belə şəxslərə hakim deməyə belə utanır. Axı, onların ölkə daxilində həlli mümkün olan mübahisələri ədalətli, hərtərəfli və obyektiv araşdırmaq imkanları olduğu halda, nədənsə saxtakarlıq etməsi sonradan AİHM tərəfindən təsdiq edilir. Baxın, indiyə kimi AİHM tərərfindən onlarla məhkəmə qərarı çıxarılıb və Azərbaycanın dövlət büdcəsindən vəsaitlər vətəndaşlara ödənilib. Olmazmı ki, səhvə yol verən hakimlərin məvaciblərindən həmən vəsaitlər tutulsun və bəlkə onda onlar qanunsuzluq etməkdən bir az çəkinərlər. Yoxsa, sən dövlət adından özbaşınalıq elə, vətəndaşın qanunla müdafiə edilən haqqını tapdala və sonra da AİHM-si bu cinayəti təsdiqləsin, sən vicdansız hakim isə sanki hec nə olmamış kimi cinayətlərini davam etdir?. Xeyr ola?
Qayıdıram bizim hakimlərin min cürə hoqqabazlığına və qanunsuzluqlarına. Bu günlərdə Bakı Apelyasiya Məhkəməsində hakim Sərvət Hüseynovun sədrliyi ilə bir mühüm işə baxılirdı. Söhbət Azərbayacan torpaqlarının düşməndən müdafiəsi zamanı həlak olmuş cavan bir zabitdən gedirdi. Fakt və dəlilləri qəbul edən hakim müşavirə otagında qanunlara deyil, kollegiya üzvü olan Səriyyə Seyidova adlı hakimin şəxsi xahişinə əsaslanaraq qanunsuz qərar qəbul edir. Səbəb də çox sadədir. Hakim adını daşıyan bu xanımın bacısı rus milliyətindən olan Yelena Berezenskaya soyadlı bir xanımın Bakının mərkəzində evini zəbt edərək cinayət yolu ilə ələ keçirib. Bu cinayəti ört-basdır edən 1 saylı Bakı İnzibati-İqtisadi Məhkəməsinin hakimi Fəqan Əhmədov də bu işdə hakim həmkarına köməklik göstərib, cinayəti bir vöv ört-basdır edib. İndi də hakim adını daşıyan Fəqan Əhmədovun nüfuzunu qorumaq üçün Səriyyə Seyidova iş üzrə məruzəçi Sərvət Hüseynovu çıxılmaz vəziyyətdə qoyaraq ondan qanunsuzluga göz yummağa nail olur. Onsuz da bu iş üzrə nə olursa olsun, qanuni qərar çıxarılacaq. Buna heç kimin şübhəsi olmamalıdır. Ancaq, biz indi MTN, RYTN sistemində olan bəzi cinayət əməllərindən danışırıq. Vaxt gələcək oxşar, ola bilsin daha ağır cinayətlər haqqında biz məhkəmə hakimlərinin də adlarını eşidək. Necə ki, 29 nəfərin pulunu mənimsəyib 31 ev satmaqla 860 min 90 manat mənimsəyən bir şəxsi Bakı Ağır Cinayətlər Məhkəməsinin hakimi Əmir Bayramov 8 il müddətinə şərti cəza verib məhkəmə zalından azadlığa buraxdı. Baxmayaraq ki, hökmdən Baş Prokurorluq apelyasiya protesti verdi. Amma...maddi maraqların dövlət maraqları üstələməsi göz önündədir və adam hiddətini ifadə etməyə söz tapa bilmir..
Sonda, isə daha bir misal çəkməklə fikirlərimi yekunlaşdırmaq istərdim. Dünən Bakı Apelyasiya Məhkəməsində hakim Həmid Həmidovun sədrliyi, hakimlər Elşanə Vəliyeva və Elmira Nağıyevanın tərkibində 1 noyabr Milli Məclisə deputat seçkilərlə bağlı verdiyim apelyasiya şikayətinə baxıldı. Mən bir daha əmin oldum ki, bizim bəzi hakimlərdən çox yaxşı aktyor, artist çıxardı. Bəlkə də onların çoxu Mədəniyyət və İncəsənət Universitetlərini bitiriblər, dəqiq məlumatım yoxdur. Onlar "məhkəmə araşdırması" zamanı elə əzilib-büzülürlər ki, deyirsən, ilahi bunlar necə də savadlı və humanist hakimlərdir. Amma, saatlarla "tamaşa" oynayıb, sonra saxtakarlığı əsla araşrmayan hakimə və ya hakimlərə nə ad vermək olar? Aktyor və artist... Hesab edirəm ki, ümumiyyətlə gələcəkdə Ədliyyə Nazirliyi hakimliyə qəbul zamanı bu məqamı da diqqətdən qaçırmamalıdır ki, hakim adına savadlı, bilikli və bacarıqlı hüquqşünasları seçmək və onları imtahanlara buraxmaq lazımdır. Daha Həmid Həmidov, Sərvət Hüseynov, Fəqan Əhmədov, Səriyyə Seyyidova, Tatyana Qoldman və adlarını çəkmədiyim onlarla, bəlkə də yüzlərlə "aktyor hakimlər"in olmasındansa olmaması Azərbaycana daha çox xeyir gətirər.
Tanrı Azərbaycanımızı belə bəlalardan qorusun!!!
