Xaçmazda Suriyada döyüşərək geri dönmüş şəxslər həbs olunub. Bu haqda redaksiyamıza daxil olan məlumatda bildirlir ki, bu il oktyabrın 18-dən 19-na keçən gecə baş xüsusi əməliyyat zamanı 10-a yaxın rayonun Köhnə Xaçmaz kənd sakini tutularaq naməlum istiqamətə aparılıb. Əməliyyatın hansı qurumun ”“ Milli Təhlükəzilik Nazirliyi və ya Daxili İşlər Nazirliyinin keçirməsi haqda hər hansı bir məlumat yoxdur. 

tutulanlar sırasında  vaxtilə “Yeni Müsavat”a açıqlama vermiş Anar Mahmudov da var. 2013-cü il sentyabrın 8-də qəzetimizdə “Xaçmazlı fəhlə Bəşər Əsədə qarşı...” sərlövhəsi altında dərc olunan reportajda Suriyada döyüşən azərbaycanlılardan söhbət açılırdı. (//musavat.com/news/gundem/xachmazli-fehle-besher-esede-qarshi_163676.html) 

Onlardan 10 yaxının Xaçmazın Köhnə Xaçmaz kənd sakinləri olduğu, onlardan biri olaraq döyüşlərdən yaralanaraq qayıdan A.Mahmudovun fikirləri diqqətə çatdırılırdı. 

Həmin reportajdan sitat: “Köhnə Xaçmazda Suriyaya döyüşməyə getmiş və yaralanaraq Azərbaycana qayıtmış gənci arayırıq. Anar Mahmudovu axtardığımızı eşidən kənd sakini “o Suriyada yaralanan Anarı axtarırsız”, deyə sual etdi. Təsdiqedici cavabdan sonra A.Mahmudovun yaşadığı ünvanı nişan verdi. 1988-ci il təvəllüdlü Anar Mahmudov bizimlə söhbətə həvəssiz olduğunu gizlətmədi. Video müsahibəyə razılaşsa da, suallarımıza konkret cavablar verməməyə çalışdı. Tez-tez kameranı söndürməyimizi xahiş edib, suallara, sualların  qoyuluşuna iradlarını bildirsə də, ümumilikdə Suriya müharibəsinin iştirakçısı olduğunu çox qısa, pərakəndə və nizamsız şəkildə danışdı. A.Mahmudov dedi ki, Köhnə Xaçmaz kənd orta məktəbində oxuyub. İbadətə bir ildir başlayıb. Onun sözlərinə görə, televizorda Suriyada müsəlmanların öldürüldüyünü görüb və getmək qərarı verib. Suriyaya gedişindən ailəsi xəbər tutmayıb. Bu ilin fevralında Türkiyəyə, oradan da sərhədi keçib Suriyaya gedib. Dediyinə görə, Suriya paytaxtından kənar olan Artma massivi ərazisində başqa millətlərdən olan 8 nəfərlə birlikdə evdə qalıb. Azərbaycandan gedən döyüşçülərlə əlaqə qurmadığını deyən A.Mahmudov söylədi ki, orada müxtəlif millətlərdən gələnlər var idi: “Mən Xaçmazda fəhlə işləyirdim. 150 manatla getmək olur Suriyaya. Avtobusla Türkiyəyə getdim. Bu ölkədən də Suriya sərhədinə gedib çıxdım. Mən Artma deyilən yerdə evdə qalırdım, 8 nəfər idik. İnsanlar kor deyil ki, görürlər Suriyada müsəlmanlar öldürülür. Bizim qaldığımız yerdən kənarda döyüşlər gedirdi. Posta çıxanda dizimdən yuxarı güllə ilə vurdular. Yaralandım, başqa bir yerdə xəstəxanaya yerləşdirdilər. Sonra yaralandığım üçün Azərbaycana qayıtdım. Suriyada cəmi 6 ay olmuşam. Fevralda gedib iyulda qayıtmışam”.  Ayağındakı güllə yarasının fotosunu, videosunu çəkmək istədiyimizi deyirik. A.Mahmudov qəti şəkildə bundan imtina etdi. Səbəbini belə izah etdi ki, dində kişinin ayağının dizdən yuxarı göstərməsi qəbul olunmur. A.Mahmudov qeyd etdi ki, Suriyada müsəlmanlar şəriət istəyir: “ Qarabağ döyüşlərində necə ki, əfqanlar olub, eləcə də mən buradan Suriyaya getmişdim. Müsəlmanlar Suriyada şəriət istəyir. Allah yolunda cihaddır. Dində deyilir ki, sizə qarşı vuruşanlarla vuruşun. Şeyx Fovzanın cihad haqda fitvası var. Bu fitva bizim boynumuza kafirlərə qarşı döyüşmək öhdəliyi qoyur”. 

Qeyd edək ki, Şeyx Fovzanın sosial şəbəkələrdə xəvvariclərə çağırışı var. O, bəyanatında “sizin yürüşə çağıran və döyüşməyi əmr edən rəhbərlərinizə tabe olmağınız vacibdir”, deyir.  

A.Mahmudovun sözlərinə görə, Suriyada  kamplar qurulub: “Döyüşən döyüşür, posta çıxan posta çıxırdı. Mən öz başçımı görməmişəm. Suriyadan özüm qayıtmışam. Ailəm gedəndə bilmirdi, gələndə daha nə deyəcəklər, evdən qovmayacaqlar ki? Bura gəlmişəm işsizlikdir”. 

Ümumilikdə, Suriya müharibəsinin iştirakçısı olmuş bu gənc bir çox suallarımızı açıq qoydu və cavab vermədi. O, Suriya sərhədini keçib kimlərlə görüşdüyünü, Artma ərazisinə necə gedib çıxdığını, onu kimlərin qarşıladığını, yemək-içmək təchizatının necə təşkil olunduğunu açıqlamadı. Xüsusi xidmət orqanlarının onunla maraqlanıb-maraqlanmaması haqda sualımıza da cavab vermədi”. 

Maraqlıdır ki, həmin vaxt A.Mahmudovla müsahibə “Yeni Müsavat”da dərc edilsə də, hüquq mühafizə orqanlarının diqqətini cəlb etməmişdi. 

A.Mahmudov və digərilərinin həbs olunma tarixi də diqqət çəkir. Məsələ burasındadır ki, bu il oktyabrın 17-də Eldar Mahmudov milli təhlükəsizlik naziri postundan çıxarılıb. Bundan sonrakı günlərdən başlayaraq ölkə boyu xaricdə qeyri-qanuni hərbi birləşmələrin tərkibində döyüşmüş şəxslər müəyyən edilərək həbs edilir. Bu hərəkətlilik E.Mahmudovun radikal dini qruplaşmalarla ilişgiləri haqda mətbuatda yayılan məlumatlarla üst-üstə düşür. 

Belə ki, JAM.az bir qədər əvvəl tirajladığı xəbərlərdən birində deyilirdi; sitat: “Məsələn, 2013-cü ilin dekabr ayında Sumqayıtdakı ”Soltan” kafesində baş vermiş 2 vəhhabi dəstəsi arasında qanlı atışma da məhz bu “razborka”nın təzahürlərindədir. Hələ həmin vaxt məsələni araşdırmağa cəhd etdiyimizdə polis orqanlarından belə bir məlumat sızdırılmışdı ki, atışmanı törədən qrup haqda əvvəlcədən məlumat olsa da, prosesə müdaxilə etməmək göstərişi məhz MTN-dən gəlibmiş”.

O da bəlli olub ki, Azərbaycanı “kafirlər diyarı” hesab edən Sumqayıtda ən radikal dini qruplardan birinə elə sabiq MTN şefi Eldar Mahmudovun yaxın qohumu başçılıq edib. Bildirilir ki, “Sumqayıt camaatı”nın sərbəst hərəkət etməsi, dəstələr formalaşdıraraq Suriya və İraqa yola salmasına göz yumulması təsadüfi olmayıb. “Bunu təsdiq edən fakt kimi isə DİN tərəfindən ötən il keçirilmiş əməliyyatı göstərmək olar. Belə ki, həmin vaxt DİN-in keçirdiyi əməliyyat zamanı “Sumqayıt camaatı”nın lideri, şəhərin baş vəhhabisi Zöhrab Şıxəliyevin yaxını, məhz sabiq milli təhlükəsizlik naziri Eldar Mahmudovun əmisi nəvəsi Yalçın Mahmudov həbs olunur. Yalçın Mahmudov Sumqayıtda vəhhabiliyin geniş təşəkkül tapması, onların sərbəst hərəkət etməsi, onların “müvafiq qurumlarla” olan problemlərinin “çözülməsinə” vasitəçilik edib”.

Məlumata görə, “Soltan” kafesində baş vermiş qanlı “razborka”nın arxasında daha bir özəl məqam isə Sumqayıtdakı bəzi radikal qrupların nazirin əmisi nəvəsinə “biət” etməməsi olub. Bu səbəbdən də onları cəzalandırıblar. Həmçinin MTN-in o vaxtkı rəhbərliyi bununla digər ipə-sapa yatmayan qruplara da gözdağı verib ki, onların da başına analoji oyunu aça bilərlər. Əldə olunan məlumatlara görə, xüsusən Sumqayıtdakı vəhhabilər toxunulmaz kastaya çevrilibmiş.

Məhz bu səbəbdəndir ki, bu barədə məlumat əldə edən DİN əməliyyatlar keçirərək, ölkənin təhlükəsizliyinə təhdid olan qruplaşma üzvlərini həbs etsə də, sonradan MTN-in dəstəyi ilə onlar azadlığa buraxılır. Bu möcüzəli “xilas”ın ən bariz nümunəsi isə evində gizli toplantı keçirən, silah-sursat aşkarlanan, hüquq-mühafizə orqanları tərəfindən həbs olunan Zöhrab Şıxəliyevin 6 aydan sonra azadlığa buraxılması idi. O, MTN-in gözü qarşısında Sumqayıtda özünə villa adıyla qeyri-qanuni məscid inşa etdirmişdi. Ancaq həmin vaxt həbs olunan Zöhrab Şıxəliyev sonradan MTN-in başbilənlərinin sayəsində azadlığa çıxa bildi”, deyə, saytın xəbərində bildirilirdi.