Hüquq müdafiəçisi 53 yaşını da həbsxanada keçirdi; HMC rəhbərinin ünvanına çoxsaylı təbrik mesajları ünvanlanır; İntiqam Əliyevin səhhəti getdikcə pisləşir

Nəcmi Əliyev: “1 il 4 ay qanunsuz həbsdə saxlanılması bizim üçün ən böyük təzyiqdir”

Bu gün (noyabrın 30-da) həbsdə olan Hüquq Maarifçiliyi Cəmiyyətinin (HMC) sədri İntiqam Əliyevin 53 yaşı tamam olub. Hüquq müdafiəçisi ikinci dəfə doğum gününü həbsxanada keçirdi. Mətbuat və sosial şəbəkələrdə HMC rəhbərinin ünvanına çoxlu sayda təbrik mesajları ünvanlanır. 

İ.Əliyevin doğum günü ilə bağlı oğlu Nəcmi Əliyev ilə söhbət etdik. 

N.Əliyev doğum günü keçirməyəcəklərini bildirdi: “Özü olmadığına görə, ad günü keçirməyəcəyik. Atam keçən il olduğu kimi, bu il də doğum gününü həbsxanada keçirdi. Buna görə biz də bir az məyusluq var. Bu günün əhval-ruhiyyəsi yoxdur. Noyabrın 29-da özü ilə danışdım. Ünvanlanan təbrikləri çatdırdım. Çox sevindi. Hamıya təşəkkür etdi. Həmişə olduğu kimi, yenə də dedi ki, mənə çox diqqət ayrılmasın. Diqqət çox olanda özü narahat olur. Bu baxımdan istəmir ki, çox diqqət ayrılsın. Bildirdi ki, ona diqqət ayıranlar vaxtlarını öz problemlərinə sərf etsinlər. Hətta dedi ki, doğum günümdə belə diqqətlərini mənə ayırmasınlar. Biz həmişə cəmiyyətin diqqətindən razı olmuşuq. Atamın kifayət qədər geniş əhatəsi var. Hər zaman onu diqqətdə saxlayırlar. Bu həqiqətən bizim üçün böyük dəstəkdir. Bunları atam da yaxşı bilir və ona görə narahat olur”.

N.Əliyev atasının həbsindən keçən 1 il 4 ayın onlar üçün müəyyən çətinlikləri olduğunu qeyd etdi: “Bizim üçün önəmli olan atamın möhkəm qalmağı, çətin dövrdən keçməsidir. Bundan sonra bizim üçün də çətinliklərin öhdəsindən gəlmək asan olacaq. Vacib olan atamın həbsxanada səhhətinin yaxşı olması, ağır günlərdə verilən dəstəkdir. Təbii ki, İntiqam Əliyevin yoxluğu ailəmizdə hiss olunur. Xüsusilə, bir övlad üçün atasının yanında olmaması, özü də istədiyi vaxtlarda, çox çətindir. Amma deyim ki, atamın orada olmasının səbəbi gördüyü işlərdir. Bu işlərlə bir övlad kimi sadəcə qürur duyuram. Əgər onun gördüyü işlərin sonu həbsxana idisə, demək, dözmək bizim borcumuzdur. O, haqsızlığa boyun əyməyib, düz yolda olub, insanların hüquqları uğrunda mübarizə aparıb”.

“İntiqam Əliyevin oğlu olmaq sizə çətinlik yaradırmı”? sualımıza müsahibimiz belə cavab verdi: “Atamın övladı olduğuma görə, bəzən çox avantajlı görünürəm. İntiqam Əliyev elə bir insandır ki, cəmiyyətin istənilən təbəqələrində ona hörmət var. Atam olduğu üçün demirəm. Onun haqqında mənfi fikir səslənmir. Onun övladı olmaq qürurvericidir. Hətta onun övladı olduğumdan çox vaxt hörmətcil oluram, mənə daha çox hörmət edirlər, qayğı, diqqət göstərirlər. Atamın övladı olduğum üçün heç vaxt mənfi halla rastlaşmamışam. İntiqam Əliyevin 1 il 4 ay qanunsuz həbsdə saxlanılması bizim üçün ən böyük təzyiqdir. Onun ailəsi olduğumuza görə təzyiqlə üzləşməmişik. Atam o qədər qətiyyətli, prinsipal insandır ki, hətta hökumət dairələrində belə onun ailəsinə təzyiq etmək istəmirlər. Atam həbs olunsa da, heç bir işi yarımçıq qalmadı. Hətta indinin özündə də digər şəxslər o işləri davam etdirirlər. Həbs olunandan sonra kifayət qədər işlər udub. İşləri də hazırda davam edir”.

Nəcmi bəy yerli və beynəlxalq hüquq təşkilatlarının atası ilə bağlı fəaliyyətlərindən də danışdı: “İstər yerli, istərsə də, xarici təşkilatların fəaliyyətləri bizi müəyyən mənada qane edir. Amma Avropanın mühüm təşkilatlarının fəaliyyətlərini nəzərdə tutursunuzsa, hesab edirəm ki, onların Azərbaycanda baş verən hadisələrə verdikləri reaksiya indiyə qədər adekvat olmayıb. Onlar daha çox siyasi məhbusların azadlığı üçün təzyiq edə bilər, daha çox başqa vasitələrdən istifadə edə bilərlər. Amma təəssüf ki, həmin təşkilatların bəzi maraqları buna hələ ki imkan vermir”.

Hüquq müdafiəçisinin oğlu atasının 54 yaşını azadlıqda keçirəcəyinə ümidlidir: “Buna hər zaman ümid edirik. Ümidlərimiz heç vaxt ölmür. İnanırıq ki, bu reallığa çevriləcək. Şəxsimdə buna inanıram. Əlimizdən gələnləri edəcəyik. Atam heç nədən şikayətlənməyi, narazılıq etməyi sevmir. İstəmir ki, cəmiyyətdə, ailə üzvlərində kimsə ondan narahat olsun.  Ã–vladı olaraq anlayıram ki, öz yaxınlarından, dostlarından ayrı zaman keçirmək çox çətindir. Xüsusilə, ağır rejimli həbsxana şəraitində. Amma hesab edirəm ki, o, azadlıqda olduğu müddətdə fəaliyyəti ilə ortaya kifayət qədər müsbət işlər, keyfiyyətlər qoyub”.

Sonda HMC rəhbərinin oğlu atasının həbsxanadakı son durumundan da söz açdı: “Cəzaçəkmə müəssisəsinə köçürüldüyü ilk günlərdə müəyyən problemlər var idi. İndinin özündə də bu problemlərin bəziləri qalır. Amma hazırda saxlanıldığı şəraitdən elə bir narazılığı yoxdur. Onu qeyd edim ki, səhhəti getdikcə pisləşir. Görüş günlərində onu gördüyümüzdən sonra bu qənaətə gəlmişik. Ciddi müayinəyə ehtiyac var. Amma hazırkı həbsxana şəraitində bu mümkünsüz görünür. O, xüsusi həkim tərəfindən müayinə olunmalıdır. Onu da bildirim ki, atam sağlamlığını qorumaq üçün idmanla məşğul olur. Çalışır ki, gümrah qalsın. Həftənin sonu görüş günümüzdür”.

Xatırladaq ki, İntiqam Əliyev 8 avqust 2014-cü ildə həbs olunub. 22 aprel 2015-ci ildə Ağır Cinayətlər Məhkəməsinin qərarı ilə 7,6 il müddətinə azadlıqdan məhrum edilib. Hüquq müdafiəçisi özünə qarşı irəli sürülən bütün ittihamları rədd edir və həbsini hüquq müdafiəçiliyi sahəsindəki fəaliyyəti ilə əlaqələndirir. Beynəlxalq Amnistiya təşkilatı İntiqam Əliyevi vicdan məhbusu olaraq tanıyıb.(musavat.com)