“Anti-armenia Team” adı qrup Ermənistanın 47 saytını sıradan çıxararaq bu saytların səhifələrində 20 Yanvar faciəsi ilə bağlı videolar və fotolar yerləşdirib.
Maraqlıdır, Ermənistana qarşı kiber hücumlar həyata keçirən qruplar dövlət tərəfindən himayə edilməlidirmi? Bu, onların daha effektiv hücumlar təşkil etməsini sitimullaşdıra bilərmi?
Moderator.az-a açıqlama verən “Hərbi Jurnalistlər” İctimai Birliyinin rəhbəri, hərbi ekspert Üzeyir Cəfərov məsələ ilə bağlı maraqlı fikirlər səsləndirib:
“Mən hər şeyin qanun çərçivəsində olmasının tərəfdarıyam. Baxmayaraq ki, bu cür mübarizə forması ilk olaraq ermənilər tərəfindən gündəmə gətirilib. Azərbaycandakı qruplar isə 20 Yanvar faciəsinin ildönümü ilə bağlı bu cür addımlar atıblar və onların bu addımı başa düşür, onların dağıdılan düşmən saytlarında Azərbaycan həqiqətləri ilə bağlı foto və videolar yerləşdirməsini təqdir edirəm. Lakin istərdim ki, bunlar sistematik davam edən bir proses olmasın. Çünki eyni hücumlr Azərbaycana qarşı da həyata keçirilə bilər. Odur ki, bu kimi məsələlərdə olduqca həsas və diqqətli olmaq lazımdır.
Bundan başqa, hesab edirəm ki, kiber hücumların Azərbaycanın haqq işi ilə bağlı yalan məlumatlar yayan, Qarabağ həqiqətləri ilə bağlı ictimaiyyətə yanlış xəbərlər təqdim edən, obyektivliyi pozmaqla jurnalistikanın ilkin qızıl qaydasını pozan Rusiya saytlarına qarşı yönəldilməsi daha məntiqli olardı. Çünki Qarabağın işğalını dəstəkləyən, Ermənistana bu işğalda dəstək verən məhz Rusiya olub”.
Seymur Əliyev