Politoloq Qabil Hüseynli Moderator.az-a açıqlamasında son günlər Ukraynada hökumət qüvvələri ilə seperatçılara arasında baş verən döyüşləri və proseslərin mümkün inkişaf istiqamətlərini şərh edib. Ekspert Ukraynada Rusiyanın ikinci dəfə genişmiqyaslı hərbi əməliyyatlara start verməyəcəyini bildirib. Q.Hüseynlinin sözlərinə görə, buna səbəb vəziyyətin Amerikanın nəzarəti altında olması, habelə Rusiyanın irimiqyaslı əməliyyatlardan ehtiyat etməsidir:
“Öncə onu deyim ki, Ukrayna məsələsi kifayət qədər ziddiyyətli məsələdir. Orada seperatçılaırn əvvəlki kimi yenidən ciddi əməliyyatlara başlaması inandırıcı görünmür. Çünki oradakı proses tamamilə Amerikanın nəzarəti altındadır. Rusiyanın özü də bu məsələdə əvvəlki kimi qətiyyətli görünmür və geri çəkilmək niyyətindədir. Rusiya bütün cəbhələr üzrə, istər Türkiyə, istər Suriya, istərsə də Ukrayna ilə münasibətlərdə geriçəkilmə mövqeyi nümayiş etdirməkdədir. Zənnimcə, bu proses qarşıdakı aylarda davam edəcək.
Bu gün Rusiyanın özünün daxilində vəziyyət kifayət qədər gərgindir. Həmçinin, millətlərarasın münasibətlərdə ciddi gərginlik var. Ötən gün Qroznuda süni şəkildə böyük bir mitinq təşkil etdilər. Bu mitinq ölkədaxili millətlərarası münasibətlərin gərginliyini azaltmaq, Putinə olan aqressiyanı zəiflətmək məqsədi daşıyan süni bir mitinq idi.
Hesab edirəm ki, 2016-cı il Rusiyanın zəifləməsi və onun beynəlxalq aləmdə mövqelərini əldən verməsi ilə müşahidə edilən bir il olacaq”.
Seymur Əliyev