“Azİmport” MMC-nin mətbuat xidmətindən Moderator.az-a aşağıdakı məzmunda press-reliz daxil olub:

"Azərbaycanda vətəndaş hüquqlarının qorunması ilə bağlı qanunvericiliyə, eləcə də jurnalist etikasına məhəl qoymayan, söz və mətbuat azadlığından sui-istifadə edən bəzi elektron kütləvi informasiya vasitələri son günlər yenidən “Azİmport” MMC-yə və onun təsisçisinə qarşı hücumları gücləndirmişlər. On ildən artıq bir müddətdə paytaxt Bakıda aparılan tikinti-abadlıq işlərinin fəal iştirakçısı olan, inşaat sektorunda özünəməxsus keyfiyyət standartları tətbiq edən şirkətin işgüzar nüfuzunu həqiqətə uyğun olmayan yalan məlumatlar yaymaq yolu ilə ləkələmək cəhdlərinin arxasında hansı niyyətlərin və kimlərin dayandığı məlumdur.

“Azİmport” MMC-nin İctimaiyyətlə əlqaqələr şöbəsi əsasız iddialar üzərində quraşdırılan və həmin KİV-lərdə indiyədək davamlı olaraq təkrarlanan saxta ittihamlara  dəfələrlə rəsmi cavablar vermiş və bu barədə press-relizlər yaymışdır. Lakin qərəzli mənbənin onlara ötürdüyü “fakt və dəlilləri” peşəkar jurnalistikanın tələb etdiyi qaydada və səviyyədə araşdırmayan, hətta yol verdikləri qanunazidd hərəkətlərin ”“ təhqir və yalanların ciddi hüquqi məsuliyyət doğurduğunu belə dərk etməyən reket xislətli bəzi “media nümayəndələri” hələ də həqiqəti görmək və anlamaq istəmir, şantaj və şərləmək yolu hansısa maddi mənfəət əldə edəcəklərinə ümid bağlayırlar. Acı gülüş doğuran hal odur ki, məntiqi bağlılığı olmayan cümlələrdən ibarət eyni mətn eyni vaxtda və ya bir gün sonra nöqtəsinə-vergülünə toxunmadan, bəzən heç başlığı da dəyişdirilmədən  beş-on saytda yerləşdirilir ki, bu da sifarişin aşıq-aşkar bir yerdən, bir mənbədən alındığını göstərir. 

Son günlər vaxtilə Xəzər rayonunun Buzovna qəsəbəsində aparılan tikinti-abadlıq işləri zamanı “Azİmport” MMC-nin guya vətəndaşların mülkiyyət hüquqlarını pozması barədə könhə “məlumatlar” yayılır,  yenə də şirkətin ona heç bir adidyyəti olmayan şəxslər və dövlət məmurları ilə bağlılığı barədə iddialar irəli sürülür. 

“Azİmport” MMC-nin İctimaiyyətlə əlaqələr şöbəsi bir daha bəyan edir ki, bu iddiaların heç bir əsası yoxdur. Belə ki, Heydər Əliyev Beynəlxalq Hava Limanı ”“ Mərdəkan dairəsi ”“ Bilgəh qəsəbəsi istiqamətində magistral yolun yenidən qurulması işləri Azərbaycan Respublikası Prezidentinin “Bakı şəhərinin qəsəbələrinin sosial-iqtisadi inkişafının sürətləndirilməsinə dair” 27.02.2006-cı il tarixli 1338 saylı və “Bakı şəhərində nəqliyyat sisteminin təkmilləşdirilməsi üzrə 2008-2013-cü illər üçün əlavə Tədbirlər Planı”nın təsdiq edilməsi haqqında 08.07.2008-ci il tarixli 2930 saylı, sərəncamlarının icrasını təmin etmək məqsədilə həyata keçirilmişdir.

“Azİmport” həmin işləri Xəzər Rayon İcra Hakimiyyəti ilə 24.09.2009-cu il tarixdə bağlanmış “Əsaslı təmir işləri üçün podrat müqaviləsi” əsasında yerinə yetirmişdir. Beləliklə də, bu fakt magistral yolun ətrafında vətəndaşların şəxsi mülkiyyətini “Azİmport” MMC-nin “ələ keçirməsi” haqqında ittihamın tamamilə əssasız olduğunu təsdiqləyir.

Magistral yolun ətrafında vətəndaşlara məxsus obyektlərin, dövlət ehtiyaclarından ötrü  sökülməsindən sonra həmin ərazidə “Azİmport” MMC podrat müqaviləsi əsasında abadlıq və təmir işləri aparmış, həmçinin Xəzər Rayon İcra Hakimiyyətinin ayırdığı ərazidə və onun  sifarişi ilə ikimərtəbəli ticarət mərkəzi inşa etmişdir. Ticarət mərkəzində yerlər “Xəzər rayonu ərazisində nəqliyyat sisteminin təkmilləşdirilməsi, qəsəbələrdə abadlaşdırma ilə əlaqədar Buzovna qəsəbəsində sökülmüş obyekt və tikililərin əvəzinə inşa olunmuş yeni obyektlərin bölüşdürülməsi məqsədilə”  Xəzər rayon İcra Hakimiyyəti Başçısının 22.05.2013-cü il tarixdə imzaladığı 277 saylı sərəncam əsasında yaradılmış komissiya tərəfindən bölüşdürülmüşdür.

 Ayrıca olaraq, “Azİmport” MMC obyekti sökülmüş heç bir vətəndaşa yeni ticarət mərkəzində yer təklif etməmişdir. Bu iş yalnız rayon icra hakimiyyətinin yaratdığı komissiyanın səlahiyyətində olmuşdur.   

Uzun müddətdir internet-media vasitəsi ilə “Azİmport” MMC haqında yayılan qərəzli məlumatlarda tez-tez adı çəkilən vəkil Ramiz Zeynalovun mülkiyyəti ilə bağlı məsələnin mahiyyəti isə belədir: Buzovna qəsəbəsindəki 26 saylı orta məktəbin həyətyanı sahəsində yerləşən və spirtli içkilərin satıldığı kafe kimi fəaliyyət göstərən həmin obyekt Xəzər Rayon İcra Hakimiyyəti tərəfindən qəsəbənin ərazisində yolların genişləndirilməsi, eləcə də sözügedən məktəbin binasının yenidən qurulması və həyətyanı sahəsinin abadlaşdırılması işləri ilə əlaqədar sökülmüşdür. “Azİmport” MMC həmin ərazidə söküntü işlərinin aparılmasında iştirak etməmişdir.  Eyni zamanda, sökülən obyektlərin sahiblərinə, o cümlədən R.Zeynalova rayon icra hakmiyyətində yaradılmış komissiya tərəfindən qəsəbədəki yeni tikilmiş ticarət mərkəzində daha artıq sahəsi olan obyekt təqdim olunmuşdur. Lakin R.Zeynalov bundan imtina edərək, 1 (bir) milyon manat pul istəmiş və bu istəyinə nail olmadıqda isə sonradan əsassız olaraq, Bakı şəhəri Xəzər Rayon İcra Hakimiyyətinə, Azərbaycan Respublikası Təhsil Nairliyinə, “Azİmport” MMC-yə və müstəqil tələb irəli sürməyən üçüncü şəxs Azərbaycan Respublikası Dövlət Torpaq və Xəritəçəkmə Komitəsinin Bakı şəhər şöbəsinə qarşı “söküntü ilə əlaqədar dəymiş maddi və mənəvi zərərin ödənilməsi”, külli miqdarda ”“ 1 milyon 200 min manat məbləğində kompensasiya ödənilməsi tələbi ilə məhkəməyə müraciət etmişdir. Müxtəlif məhkəmə instansiyalarında bu iddia üzrə araşdırmalar aparılıb, qətnamələr qəbul olunsa da, məhkəmə çəkişməsi hələ davam edir. Heç bir tutarlı əsası olmayan iddiasının ən yüksək məhkəmə instansiyasında rədd ediləcəyi ehtimalı Ramiz Zeynalovu məhkəmə orqanlarına və bir sıra dövlət məmurlarına KİV vasitəsilə təzyiq göstərmək kimi hüquqşünasa yaraşmayan hərəkətlərə sövq etmişdir. 

Hal-hazırda məhkəmə baxışı mərhələsində olduğunu, hər hansı mülahizə və rəy bildirilməsinin məhkəməyə təzyiq və təsir kimi qəbul ediləcəyini nəzərə alıb, bu məsələ haqqında hələlik geniş açıqlama verməyə lüzum görmürük. 

Bundan başqa R.Zeynalov vaxtilə  “Azimport” MMC-nin təsisçilərindən biri olmuş, lakin keçmiş Dövlət Bayrağı Meydanı Kompleksi İdarəsinə direktor təyin olunması ilə əlaqədar şirkətlə bütün hüquqi və faktiki əlaqələrinə xitam verilmiş Rəşad Məmmədovun şirkətin qeyri-rəsmi sahibi olması barədə də həqiqətə uyğun olmayan məlumat yaymaqdadır. Özü də bir müddət dustaqlıqda olmuş və həbsxana mərhumiyyətləri yaşamış Ramiz Zeynalovun hazırda həbsdə olan və bu səbəbdən haqqında yayılan iftiralara cavab vermək imkanı olmayan Rəşad Məmmədovun ləyaqətini alçaldan məlumatlar yayması isə nə insanlığa, nə humanizm prinsiplərinə, nə də hüquqşünas əxlaqına sığır. Əslində, keçmiş MTN-nin “mətbəxində” hazırlanıb, dövriyyəyə buraxılmış və bəzi qərəzli şəxslərin əlində hələ də “tutalqa” kimi qalan belə məlumatlardan dörd övlad atası olan R.Məmmədovun ailə üzvlərinin ciddi mənəvi iztirab, psixoloji sarsıntı keçirdiyi ictimaiyyətə dəfələrlə çatdırılmışdır.  

Bir daha bəyan edirik ki, “Azİmport” MMC haqqında əsassız və yalan məlumatların yayılması ardıcıllıığı bunların məqsədli və sifarişli  qarayaxma kampaniyası olduğunu göstərir."