Dünən Azərbaycanın Kiyevdəki səfirliyinin qarşısında diplomatik nümayəndəliklərin təhlükəsizliyinin təmin edilməsi ilə bağlı planlı taktiki və xüsusi təlimlər keçirilib. Tədbir səfirlik, Azərbaycan Xüsusi Dövlət Mühafizə Xidməti, nümayəndəliklər və konsulluqlar üzrə Ukrayna Milli Qvardiyasının 22-ci briqadası ilə birgə təşkil edilib. Təlimləri Ukraynada müvəqqəti işlər vəkil Nazim Əliyev, XDMX-nın nümayəndələri və Ukrayna güc strukturlarının rəsmiləri izləyiblər.

Təlimlərin keçirilməsində məqsəd güc strukturlarının kütləvi narahatlıq, diplomatik nümayəndəliklər və ya konsulluqlara hücum zamanı hazırlıq fəaliyyətinin yoxlanılması olub. 

Amma bu təlimlər Azərbaycanda birmənalı qarşılanmayıb. XDMX keçmiş əməkdaşı, Milli Qvardiyanın komandiri olmuş polkovnik Əzizağa Süleymanov Moderator.az - a açıqlamasında deyir ki, təlimin keçirilməsi üçün ünvan seçilərkən ehtiyyatsızlığa yol verilib və daha doğrusu, məkan olaraq məhz Azərbaycan səfirliyinin seçilməsi doğru qərar deyil:

"Hər bir səfirliyin özünün daxili mühafizə sistemi var və bu sistem ölkələrarası XİN-lər tərəfindən xüsusi protokol əsasında tənzimlənir. Beynəlxalq aləmdə qəbul olunmuş qaydalara görə ilk öncə səfirliyin ərazisi xüsusi dəmir və ya daş hasarlarla ətraf aləmlə məhdudlaşdırılır. Eyni zamanda ərazinin və səfirlik binasının qorunmasına xüsusi texniki vasitələr cəlb edilir və mühafizə xidmətinin əməkdaşları tərəfindən sutkalıq qorunma təmin edilir. 

Səfirliyin inzibati ərazisi beynəlxalq qaydalara uyğun olaraq həmin ölkənin ərazisi hesab olunduğundan oranın qorunmasına əsas cavabdehliyi də səfirliyin təmsil olunduğu ölkənin müvafiq güc strukturları daşıyır. Amma səfirliyin ərazisinin digər tərəfində isə yerləşdiyi ölkənin müvafiq strukturları mühafizəni təşkil etməyə borcludurlar və orada hər hansı tədbirləri də ancaq həmin ölkə keçirə bilər. İndiki halda isə səfirliyin önündə bu cür təlimin keçirilməsinə izah tapa bilmirəm. Adətən bu cür təlimləri müəyyən olunmuş qapalı tədris mərkəzlərində keçirmək məqsədəmüvafiq hesab olunur. İstənilən halda bir ölkənin səfirliyi qarşısında bu cür təlimin keçirilməsi mənim düşüncəmə görə doğru deyil. Axı hətta nəzəri baxımdan olsa belə niyə kimlərsə səfirlik binasına hücum etməlidir ki? Azərbaycanla Ukraynanın münasibətləri strateji müttəfiqlik səviyyəsindədir və hətta bu cür təlimlər belə ərazidən təsadüfən keçən insanlarda qəribə hislər yaradacaq və çoxları elə zənn edəcək ki, doğrudan da Azərbaycan  səfirliyi qarşısında nəsə baş verib. Bu xəbərin ölkə üzrə yayılması psixoloji cəhətdən də ikitərəfli münasibətləri risk altında qoya bilər. Ən azı insanlar elə zənn edə bilər ki, artıq bu iki ölkə arasında nəsə soyuq küləklər əsməyə başlayıb deyə səfirliyiə belə hücum təşkil edilib. Sözümün canı odur ki, kimlər belə bir qərarı veriblərsə səhvə yol veriblər. İnanmaq istəmirəm ki, XDMX rəhbərliyi Azərbaycanın Ukrayndakı səfirliyi önündə iki ölkənin mühafizə strukturlarının birgə iştirakı ilə təlimin təşəbbüskarı kimi çıxış etsin, bu azmış kimi belə bir təlimi "Youtube" şəbəkəsində yerləşdirilməsinə icazə versin. Hesab edirəm ki, Prezidentin mətbuat xidməti bu məsələ barədə açıqlama ilə çıxış edəcək və olaya aydınlıq gətirəcək".