Aprel ayının əvvəlindəki dördgünlük müharibədə ordumuz öz gücünü subut etsə də, beynəlxalq təşkilatların istəyi ilə Azərbaycan növbəti dəfə atəşkəsə razılıq verdi. Bununla da ölkə rəhbərliyi hərbi əməliyyatları dayandıraraq əldə olunmuş nailiyyətlərlə diplomatik cəbhədə uğurlar qazanmaq qərarına gəldi.
Ancaq indi aydın görünür ki,
Ermənistanın hakimiyyəti sülh yolu ilə işğal etdiyi torpaqları geri qaytarmaq
niyyətində deyil. Sarkisyanın ilk əvvəl danışıqlardan imtina etməsi, daha sonra
özünün şərtlərini irəli sürməsi aydın şəkildə göstərir ki, Azərbaycanın öz
torpaqlarını işğaldan azad etməsinin yeganə yolu müharibədən keçir.
Qorxaq ermənilərdən fərqli
olaraq Azərbaycan ordusu da, Azərbaycan xalqı da bir nəfər kimi döyüşə hazır
olduğunu, müharibə əmri verildiyi an vətən uğrunda son damla qanlarını belə
axıtmağa hazır olduğunu dəfələrlə bəyan edib. Bəs görəsən bu gün qarabağlılar
necə, döyüş əzmindədirlərmi, qarabağlı jurnalistlərimiz qələmlərini süngüyə dəyişməyə
hazırdılarmı?
Moderator.az bu suallara
aydınlıq gətirmək məqsədilə qarabağlı jurnalistlər arasında sorğu keçirib.
Sorğumuzun ilk iştirakçı
olan professor Qulu Məhərrəmli
yaşına belə baxmayaraq döyüşə hazır olduğunu bildirib: “Bu məsələdə yaş önəmli deyil, ruhun vəziyyəti önəmlidir.
Təbii ki, insane öz Vətənini, milli heysiyyətini qorumaq üçün hər şeyə hazır
olmalıdır. Pafosla danışmaq mənlik deyil, amma deyirəm ki, mən də ölkənin vətəndaşı
kimi hər şeyə hazıram”.
“Türküstan” qəzetinin və
Türküstan.info saytının rəhbəri Aqil Camal da Milli Ordumuzun sıralarında
mücadiləyə hazır olduğunu deyib: “Qarabağ, işğal olunmuş torpaqlar mövzusu
bizim üçün belə deyək ki, daha doğmadır. Gündəlik fəaliyyətimizdən başqa, ictimai
fəal olaraq da, bu sahədə müxtəlif təşəbbüslərimiz olub, tədbirlər, aksiyalar həyata
keçirmişik. Əlbəttə, bütün bunlar atəşkəs dövrü, informasiya savaşı üçün nəzərdə
tutulan işlərdir. Hazırda cəbhədə vəziyyətin gərginləşdiyi, faktiki müharibənin
getdiyi indiki vaxtda hələ ki, biz yenə də öz peşə missiyamızı davam etdiririk.
Və demək olar ki, fəaliyyətimizin əsas ağırlığını cəbhə xəbərləri, düşmənə
qarşı informasiya savaşı təşkil edir. Dövlətin istənilən gün qəbul etdiyi qərara,
əmrə uyğun olaraq Milli Ordumuzun sıralarında torpaqlarımızın azadlığı üçün tərəddüdsüz
mücadiləyə hazıram. Bu, bizim üçün ikiqat borcdur”.
Avtosfer.az saytının rəhbəri
Elməddin Muradlı isə döyüşdə iştirak etmək üçün müraciət də edibmiş: “Mən hər
zaman qələmi silahla əvəz etməyə hazıram. Keçən ilin sentyabr ayında baş verən
döyüşlər zamanı özüm şəxsən Müdafiə Nazirliyinə müraciət etmişdim, amma
çağırmadılar. Sonra jurnalist kimi dəvət etdilər, cəbhə bölgəsinə getdik.
Üç-dörd gün bütün cəbhə bölgəsini gəzib gördüklərimzi qələmə aldıq, cəmiyyətə
çatdırdıq. Bəlkə də Müdafiə nazirliyi hesab edir ki, biz mətbuatda qalmaqla
orduya daha böyük dəstək vermiş olduq. Olsun, əsas odur ki, istənilən şəraitdə
ordumuza dəstək verməyə hazırıq. Fərqi yoxdur ya əsgər kimi, ya da jurnalist
kimi. əsas məsələ odur ki, bir faydam olsun”.
Jurnalist Araşdırmaları Mərkəzinin
sədr Seymur Verdizadə isə hesab edir ki, müharibə başlayacağı təqdirdə təkcə
Qarabağdan olan jurnalistlər deyil, damarlarında azərbaycanlı qanı axan bütün
jurnalistlər qələmini süngüyə çevirəcək: “Bir qarabağlı kimi, mən bu prosesdə
öncüllük etməyə hazıram. Elə yaşdayam ki, ölümün labüd olduğunu daha yaxşı dərk
edirəm. Ölüm qaçılmazdır. Vətən uğrunda ölüm şərəfli ölümdür. Əgər qismətimdə
varsa, buna görə indidən Allaha minnətdar olaram. Açıq danışmaq lazımdır,
Qarabağ problemini atalarımız bizə miras qoyub. Bu ağır yükü övladlarımızın zərif
çiyinlərinə yükləməyə haqqımız yoxdur. Əgər Vətən uğrunda biriləri canını fəda
etməlidirsə, həmin biriləri biz olaq. Əgər mənim həyatım Qarabağı bizə
qaytaracaqsa və övladlarım ömürlərinin sonuna kimi bu torpaqlarda azad, rahat
yaşayacaqlarsa, mən indidən canımı Vətənə qurban deyirəm”.
Regional İnsan Hüquqları
və Media Mərkəzinin sədri Xalid Kazımov ilk
əvvəl canlı şahidi olduğu müharibə ağdısından danışıb. Daha sonra isə qeyd edib
ki, silahımız qələmimizdən daha sərrast olacaq: “Uşaqlığım müharibənin içərisində
keçib. Doğulub, böyüdüyüm kənd birbaşa döyüş zonası olmasa da mühasirə şəraitində
yaşamağın bütün ağırliğini dərk edirdim. 23 il öncə isə ömrümün 14 ilini
yaşadığım kəndimizdən, evimizdən heç bir şey götürmədən çıxaraq, nəinki gələcəkdə,
hətta bir neçə dəqiqə sonra bizi nə gözlədiyini bilmədən sadəcə yeriyirdik. Üç
sutkalıq piyada yol gələrkən dəfələrlə ölümü yaxından duya, hiss edə bildik. Ötən
illərdə nə itirdiyim uşaqlığımı, nə də onu mənə xatırladan şəkillər daxil heç nəyi
bərpa edə bilmədim. 14 yaşımadək olan dövrümü mənə xatirladacaq, xəyallardan
başqa heç nəyim yoxdur. Bu gün böyüdüyüm evin dağılmış divarlarına sadəcə ermənilərin
çəkib internetə yerləşdirdiyi şəkillərdən baxıram.
Aprel ayı həm də ermənilərin
bizim kəndimizdə törətdiyi faciənin ildönümüdür. 2013-cü ildə “Başlıbel faciəsi:
erməni vəhşilikləri şahidlərin dili ilə” kitabını hazırlayarkən bu faciənin
canlı şahidləri ilə danışarkən dərdimizin böyüklüyünü, qarşımızda duran vəzifələri
daha aydın hiss etdim. Belə ki, 1993-cü il aprelin 18-də erməni quldurları
qadın, uşaq və yaşlıların gizləndiyi yeri aşkarlayıb. Orada işğal zamanı doğma
torpaqlarını tərk etməyən 62 nəfər olub. İşğaldan sonra cəmi 16 gün gizlində
qala bilən bu insanlar 2 ov tüfəngi və əhalini
qoruyan əsgərlərdə olan bir neçə avtomat silahla düşmənə müqavimət göstəriblər.
Başlıbelin işğalı zamanı erməni quldurları tərəfindən 27 nəfər güllələnib. Ermənilər
Başlıbel kəndini işğal edərkən II Dünya Müharibəsi iştirakçısı olan bir nəfəri
”“ Hüseyn Hüseynovu diri-diri yandırıblar. Kənd sakini, ruhi xəstəlikdən əziyyət
çəkən Qənaət Ağamirovu işgəncə ilə qətlə yetiriblər. 19 nəfər kənd sakini
(qadın, uşaq və qoca) isə Ermənistan hərbçiləri tərəfindən girov götürülüb.
Düşmən gülləsindən canını qurtara bilən 30 nəfər isə yenidən dağlara çəkilib və
daha 113 gün mühasirə həyatı yaşayıb. Sağ qalan həmin şəxslər dəfələrlə ölümlə
üz-üzə gəlib və günlərlə ac-susuz qalıblar. Mühasirədən çıxaraq dörd sutka
piyada yol qət edən 29 nəfər 1993-cü il iyulun 22-də Daşkəsən ərazisinə keçə
biliblər. Amma 1 nəfər - I və II Dünya
Müharibəsi iştirakçısı Ələsgər Ələsgərov doğma torpağını tərk etməyərək
Başlıbeldə qalıb. Ələsgər Ələsgərov bu günədək itkin sayılır və onun barəsində
hər hansı məlumat yoxdur.
Bu gün jurnalist kimi həqiqətləri
ictimaiyyətə açıqlamaq vəzifəsini öhdəmizə götürmüşüksə, sabah müharibə
başlayarsa, torpaqlarımızın azadlığı üçün silaha sarılacağıq. O zaman silahımız
qələmimizdən daha sərrast olacaq. Bu üzərimizə düşən müqəddəs bir borcdur. Mən
də o qənaətdəyəm ki, torpaqlarımızın işğaldan azad edilməsi missiyasını
övladlarımıza buraxmamalıyıq”.
Rumiyyə