Bizdə belə bir söz var, deyirlər “Allah, sən məni dostumdan qoru, düşmənimlə özüm bacararam”. 

Həqiqətən də millətimiz həm millət, həm də fərd olaraq dost dediklərindən çox çəkib. Bir zamanlar SSRİ Xalq artisti, indiki millət vəkili Zeynəb Xanlarova millətimizi uyutmaq üçün “Qarqiya Gürcüstan, sirmem Hayastan, gözəl Dağıstan, ürəyim sizindi” oxuyurdu. Yaxud da bir başqası millətimizin tarixi unutması, torpaqlarına sahib olan, millətimizi yerindən-yurdundan edən düşmənlərini sevməsi, manqurtlaşması üçün “Qardaş olub Hayastan Azərbaycan” mahnısı ilə şüuraltımıza təsir edirdi. Tarixçilərimiz və ədəbiyyatçılarımız azadlığı, elmi, mədəniyyəti bizə Rusiyanın gədirdiyini demək və yazmaqla millətimizi köləyə çevirməyə çalışırdılar. Bu proses bu gün də forma və icraçıları (aktyorları) dəyişilərək davam edir. Dünən mövqe, titul, səlahiyyət, sərvət qazanmaq üçün SSRİ rəhbərliyinə yaltaqlanıb millətimizi mənəvi, fiziki və tarixi baxımdan məhv edirdilərsə, bu gün həmin mövqe, titul, səlahiyyət, sərvət qazanmaq istəyənlərin davamçılarından, varislərindən bir qrupu Azərbaycan hakimiyyətinə yaltaqlanıb, yarınıb, riyakarlıq, saxtakarlıq edərək, digər bir qrupu isə beynəlxalq güclərə satılıb, onların əlində alətə çevrilib millətimizin mənəvi, fiziki və tarixi baxımdan məhv olmasına xidmət edirlər. Dünən əsasən tarixçilər, ədəbiyyatçılar, musiqiçilər və peşəsindən asılı olmayaraq deputatlar bu işin fəal icraçısı idisə, bu gün tarixçilərə, ədəbiyyatçılara, musiqiçilərə, peşəsindən asılı olmayaraq millət vəkillərinə (əziz oxucu, sən elə sovet deputatı oxu), “partiya” sədrləri və  siyasətçilər də qoşulub. 

Rəhmətlik Mirzə Cəlil demiş, “yazıq, biçarə vətən!”,  Məmməd Araz dediyi kimi “səni səndə ələdilər, səni səndə üyütdülər”... Tanınmış aydınlardan biri Mehriban Vəzir təmənnasız fəaliyyətinə, obyektivliyinə, dürüstlüyünə, əyriliklərə göz yummadığına və riyakarlıq və saxtakarlıqlarla barışmadığına görə “Aydınlar birliyi”ndən və “Milli şura”dan çıxarılmasından danışır. Bir vaxtlar Bəxtiyar Vahabzadə bir söz işlətmişdi “Xırda Padşahlar”. 

Hörmətli Mehriban xanım, Azərbaycan ona görə bu gündədir ki, Azərbaycanı HÖKMDARLAR yox, Xırda Padşahlar idarə edir. Xırda Padşahların idarə etməsində isə sənə və sənin kimilərə nə ehtiyac var, nə yer. Allah sənə rəhmət eləsin, Hüseyn Cavid, sən 100 il bundan qabaq sadəcə dövrünü deyil, bu günkü halımızı da çox dəqiq ifadə etmisən: