“Bildiyimiz kimi, Ramazan ayının əvvəllərində də Türkiyədə partlayış baş vermişdi. Atatürk Havalimanında baş verən partlayış da ilk deyil, bundan əvvəl də Atatürk Havalimanında, eyni zamanda Sabiha Gökçen Havalimanında partlayışlar olmuşdu. Bu partlayışlar Ərdoğanın yürütdüyü səhv siyasətin nəticəsidir və o, əkdiyini yavaş-yavaş biçir”.

Bunu Moderator.az-a açıqlamasında politoloq Cümşüd Nuriyev dünən Ankara Havalimanında baş vermiş partlayışa münasibət bildirərkən deyib.

C. Nuriyev bildirib ki, Ərdoğan dövlətin maraqlarını şəxsi maraqlarına qurban verməyə başlayandan Türkiyənin vəziyyəti ağırlaşıb:

“Axı kim Ərdoğanı məcbur edirdi ki, Ərdoğan gedib İŞİD-i dəstəkləsin? Ərdoğan ailə büdcəsini artırmaqdan ötrü, öz ailəsinin vəziyyətini yüksəltməkdən, daha doğrusu şahənşah statusuna keçirməkdən, oğlu Bilalın biznesini qurmaqdan ötrü İŞİD-lə alverə girdi. Ərdoğan birincisi İŞİD-ə kömək etməkdə səhv buraxdı, ikincisi Türkiyənin hansı halına yaraşır ki, 78 milyon əhalisi olduğu halda Suriyadan gələn qaçqınlara nəinki yer versin, hətta ayda onlara 600-800 dollar həcmində yardım göstərsin. Türkiyə bu qədərmi varlı dövlət idi? Üçüncüsü Türkiyədə dövlət artıq kifayət qədər dini dövlətə çevrilib. Çox dəhşətli bir vəziyyət yaranıb. Yaponiya dünyada texnologiyalara görə birinci yerdə olan dövlətdir. Yaponiyanın dövlət büdcəsindən 2016-cı ildə müasir texnologiyanın inkişafı üçün 3.6 milyard dollar vəsait ayrılıb. Türkiyədə isə  ancaq dəyanət vəqfi başqanlığına, yəni mollalara və imamlara 3.4 milyard vəsait ayrılıb. Bu ölkə nə vaxtdan dini dövlət olmuşdu ki? Dövlət məmurlarından çox imamlar pul alırlar. Çox təəssüf ki, dini də xurafata çevirdilər”.

Politoloq Ərdoğanın saxtakar olduğunu da qeyd edib:  

“Ərdoğan o qədər yalan danışıb ki, güya 1981-ci ildə Mərmərə Universitetini qurtarıb, amma həmin universitet 1982-ci ildə açılıb. Universitet açılmamışdan qabaq Ərdoğan oranı bitirib. Bu adamın hər şeyi saxtadır, diplomu kimi soyadı da saxtadır, əsl soyadı Məzarçıdır, onlar Acariyadan gələndə əmisi millət vəkili olub, soyadı Məzarçı. Necə olur ki, qısa müddət ərzində Ərdoğanın oğlunun dünya okeanında üzən 10 böyük tankeri, xanımının 8 böyük 5-6-7 ulduzlu hospitalları, hər bir qızının 15 dənə villası, evi olur? Bunları hesablasaq ən azı 8-10 milyard dollardan söhbət gedir. Ərdoğan 13 ildə 10 milyard dolları hansı əmək haqqı ilə yığıb? Türkiyə hazırda çox yazıq gündədir. Əhməd Davudoğlu kimi savadlı bir adamı çıxarıb, üzündən yazıqlıq tökülən bir adamı gətirib onun yerinə qoydu”.

C.Nuriyev Ankara Havalimanında baş verən partlayışı Türkiyənin Rusiyadan üzr istəməsiylə əlaqələndirib:

“Partlayışın əsas səbəbi Ərdoğanın Putindən üzr istəməsidir. Ya gərək bunu vaxtında edəydi, ya da bu günlərdə üzr istəməyəydi. Yadınızdadırsa, mən saytınıza açıqlamada bildirmişdim ki, Ərdoğan bu addımı atmalıdır. Ancaq həmin fikirlərə görə məni erməni belə çıxartdılar. Biz demişdik axı, Türkiyə İsrail ilə də, Rusiya ilə də barışacaq. Bizi söydülər, təhqir etdilər, ancaq indi biz deyən oldu. Çox təəssüf ki, Azərbaycanda da Türkiyəni sevənlər sağlam düşünə bilmirlər. Onları da qınamıram, çünki insanın sevdiyinə bir şey olanda qəbul edə bilmir. Necə ki, mən dünəndən özümə yer tapa bilmirəm. Ölənlərin hamısı bizim qardaş-bacılarımızdır, Ramazan bayramında, orucluq vaxtı belə bir faciə törədilib. Birmənalı şəkildə Ərdoğan Türkiyəni elə bir vəziyyətə gətirib ki, nə dini, nə milli, nə də dövlət dəyərlərinə hörmət qalıb”.

Politoloq yeganə çıxış yolunu Ərdoğanın istefasında gördüyünü vurğulayıb:

“Atatürk hava limanında partlayış olub, 36 nəfər ölüb, 147 nəfər yaralanıb, yaralananların hansı vəziyyətdə olduğu bilinmir. Ölkənin daxili işlər naziri susur, səhiyyəsi batıb. Yeri gəlmişkən çox maraqlı bir məsələni də qeyd edim. Necə olur ki, Amerikanın kəşfiyyat idarəsi və Almaniya elan edir ki, Türkiyədə partlayış ola bilər və həmin andaca Türkiyədə partlayış olur. Bu nə deməkdir, bunun arxasında nələr durur, əgər Amerika bunu bilmirdisə, nədən belə deyirdi, nədən İstanbulu xüsusi siyahıya salmışdı? Bu dövlətlərin partlayışların hazırlanmasından xəbərləri vardısa, deməli bunun hazırlanmasında da maraqlı olublar. Bütün bunların fonunda partlayış olacağı elan olunur, ancaq Türkiyədə heç bir təhlükəsizlik tədbirləri görülmür. Həm də beynəlxalq hava limanına basqın olunur. Bütün bunlar o deməkdir ki, Türkiyə nə daxilən, nə də xaricən idarə olunur.

Məşhur alman poltoloqu Maks Veber deyir ki, dövlət öz sərhədlərinə daxilən və xaricən nəzarət edə bilməyəndə ifalsa uğramış dövlət sayılır. Artıq Ərdoğanın hakimiyyəti dövründə Türkiyə siyasi, iqtisadi, hərbi, mənəvi iflasa uğradı. Mənim təklifim o olar ki, Ərdoğan istefa verib getsin. İstefa verib getməsi Türkiyə dövlətinə və türk millətinə ən böyük hörməti olar. Ərdoğan istefa verməzsə Türkiyəni yenə də böyük faciələr gözləyəcək”.

C.Nuriyev sonda Türkiyəyə başsağlığı da verib: 

“Bütün Türk dünasına başsağlığı verirəm. Onların acısı acımızdır, acılarını paylaşırıq. Allah ölənlərə rəhmət eləsin!”

Rumiyyə