Qardaş Türkiyə  acılar içərisindədir. Bu ağır günlərdə dərdi bölüşmək bizim namus borcumuzdur. 

Atatürk Hava limanında dəhşətli terror nəticəsində həlak olan günahsız insanlara Allahdan rəhmət, yaralılara şəfa diləyirəm. Qanlı terroru törədənlərin insanlıq adına bağlılığı yoxdur. Bu, bir vəhşilikdir, yerləri də cəhənnəmdir. Terror elə bir yırtıcıdır ki, qarşısını hər zaman almaq mümkün olmur. Artıq neçə illərdir qardaş Türkiyəyə sakitlik vermir. Ancaq heç bir ölkə də terrordan siğortalanmayıb. Dünyanın həqiqi mənada bu qan sıçrayan örgütə qarşı birləşməsi gərəkdir. Dünya “Atatürk”dəki terror hadisəsini lənətləyərək Türkiyənin yanında dayandığını bildirdi. Burası çox yaxşı. Lakin bu qınanmalar, terrora qarşı ucalan səslər ilk dəfə deyil ki, eşidilir. Buna qədər də elə İstanbulun özündə baş verən çoxsaylı insan itkisinə səbəb olan qanlı terrorlarla əlaqədar eyni sözlərə, eyni bəyanatlara şahidlik etmişik. İş bununla bitirmi? Esla, yox. Hərəkətə keçmək, terrorun kökünü kəsmək üçün qəti addımlar atılmalıdır. Niyə təəccüblə danışıram? Səbəbi vardır. Axı Avropanın bir diyarında terror baş verən kimi dərhal dövlət rəhbərləri işlərini yarımçıq kəsib həmən oraya toplaşır və kütləvi yürüşlərə qoşularaq öz etirazlarını çiyin çiyinə söykənərək nümayiş etdirirlər. Adama toxunur. Görəsən, Türkiyəyə nədən bu cür munasibət göstərilmir... Düşündürücürdür, deyilmi? Sadəcə telefon zəngləri, teleqramlar kifayət edir. Əslində bəli, dərin düşünməyə bir məna da görmürəm... Yəqin ki, dediyim aydındır.

İŞİD birdən-birə yaranmayıb. Bu terror təşkilatına məxsus müasir silahlar da onlara göydən düşməyib. Kimlərdənsə alıblar, kimlərsə İŞİD-ə bu silahları bağışlayıb. Bəlaya çevrilmiş bu terror təşkilatı bir zaman gələcək ki, ona nəfəs verənlərin qəniminə çevriləcək. Bax bunu unutmaq olmaz. ABŞ Mərkəzi kəşfiyyat idarəsi hələ 20-25 gün əvvəl Türkiyədə ağır terror hadisəsinin olacağı barədə açıqlama yaymışdı. Fikrimizcə bu məlumat yerdən götürülməmişdi. Müəyyən mənbələrdən alınan məxfi informasiyaya əsaslanmışdı. Bəs bu günlər ərzində hansı tədbirlər görüldü, nə kimi qabaqlayıcı əməliyyat addımları atıldı ki, bunların terrorun önünü kəsməyə  gücü yetmədi?! Üstləlik, terror baş verəndən sonra Türkiyənin müvafiq strukturları da  terror olayından əvvəlcədən xəbərdar olduqlarını  bəyan etdilər.

Ağıl öyrətmirəm, ancaq mübarizə belə aparılmır. Deməli, terroru heyata keçirən cinayətkar örgüt daha hazırlıqlı görünür. Səhv edə bilərəm, ancaq reallıq özü hər şeyi ortaya qoyur. Türkiyənin hökumət və dövlət rəhbərliyi xüsusi xidmət orqanlarının fəaliyyətini təkmilləşdirməli, MİT-in və Daxili İşlər Nazirliyinin çevikliyini gücləndirmək üçün qəti tədbirlər alınmalıdır. Yoxsa, bu cür qanlı olayların önünü kəsmək mümkün olmayacaq.

Pafoslu çıxışlara, qarşılıqlı sancmalara, təhqirlərə son vermək bu qədərmi çətindir? Rusiya və İsrail ilə az qala düşmən həddinə gəlib çıxılmışdı. Şükürlər olsun ki, müdrik zəka qalib gəldi. Artıq yeni əməkdaşlığın üfüqləri açılıb. Əlaqələr bundan sonra daha  bərkiyəcək və dönməz olacaq. Kim qazandı? Öncə hər üç dövlət və onların xalqları! Unutmayaq ki, Türkiyə- Rusiya- İsrail barışığı region dövlətlərinə də müsbət mənada öz təsirini göstərəcək.

Təəssüf ki, iç siyasətdə Türkiyə sanki özü ilə dil tapa bilmir. Ən ağrılı və millətin birliyini poza biləcək  vəziyyəti  aradan qaldırmağa nəinki yaxınlaşmalar nümayiş etdirilir, əksinə biri digərinin ünvanına o söz, ifadə qalmır ki, söyləməsin. Hər şeydə televiziyanın qarşısında baş verir. Doğurdan, bu, rəzalət, ayıb bir işdir. Türkiyəyə yönəlik terror savaşının önünü birlikdə kəsməyin məsuliyyətini Tükiyə iqtidarı ilə müxalifəti dərk etməyincə Dövlət Bağçalı demişkən, partlamayan yer qalmayacadır.

Eldar Sabiroğlu,

MN-nin mətbuat xidmətinin sabiq rəhbəri