Tanınmış batin alimi, misirşünas Firudin Gilar Bəg özünün “Batini Quran” adlı kitabında bütün dünya ölkələrinə məlum olan, haqqında əsərlər yazılıb filmlər çəkilən Nuh tufanı hadisəsi barəsində indiyədək heç yerdə deyilməyən faktın üstünü açıb. Onun fikrincə, Qurana görə Nuhun gəmisi hələ lövbər salmayıb:

“Qurana görə Nuhun gəmisi hələ lövbər salmayıb. Quran yazır: “Onlar səndən, “Nə zaman lövbər salacaq” deyə qiyamət vaxtını soruşacaqlar? De ki: “Bu haqda bilgi mənim Rəbbimdədir, öz vaxtında O, Onu açacaq. O Göydə və Yerdə çox ağır bir işdir. O sizə birdən gələcək” (Quran, 7:187). Qədim mənbələrdə Nuhun gəmisi eyni zamanda “sandıq” kimi də qeyd olunur ki, Quranın digər yerində “lövbər salacaq gəmi” əvəzində Musa və Harun ailəsindən qalan bir sandığın gəlməsi göstərilir: “Peyğəmbərlər onlara: Onun hökmdarlığının əlaməti, içində sizlərə Rəbbinin mövcudluğu və Musa ilə Harun ailəsinin saxladığından qalan bir sandığın gəlməsi olacaqdır. Onu mələklər gətirəcəklər” (Quran, 2:248)”. 

Moderator.az batin aliminin sufi rəmzlərinə əsaslanaraq bu iddiasını doğruldacaq faktları da təqdim edir:

“Məhşur sufi əl-Qəzali görə, Nuhun gəmisi rəmzdir və o quru ilə su arasında, yəni iki dünya arasında yerləşən mənəvi dünya mənasındadır. Başqa sözlə, Nuhun gəmisi ”“ göydə yaradılmış ruhlar dünyasının ”“ cənnətin obrazıdır. “Nuh” rəmzi qədim Misir mənbələrindəki Anx rəmzidir və bu rəmz həyat enerjisini, yəni dirilik suyu mənasında olan ilkin materiyanı bildirir. Nuh obrazı da bu ilkin materiyanı özünə birləşdirərək, onunla vəhdət təşkil edən Amon Allahının obrazıdır. Qədim Misir nağılı olan “Sinuxetin nağılı”na görə, subasmanın üçüncü ayının yeddinci günündə Allah ərşə yüksələrək, orada əvvəlcədən yaratdığı Ra Günəş diski ilə birləşmiş və Ra-Amona (Rəhman) çevrilmişdir. Erməni mənbələrində Nuh/Anx rəmzi “inoq” kimi yazılır və zahidlərin “Böyük səhranın qardaşlığı” cəmiyyətinin dərəcəsi kimi göstərilir. 

Təbrizli Arakel öz kitabında, zahidlərin Sünikdə dağlarında tikdiyi bu “səhranı” cənnət kimi göstərir və bildirir ki, inoqlar bu səhradan çıxdıqda, balıq sudan çıxanda boğulduğu kimi boğulur və səhraya qayıdanda dirilirdilər. Kitabi Dədə Qorqudda İnoq rəmzi (eşikdəki) “inaq” bəgləri kimi qeyd olunur. Bu isə o deməkdir ki, Nuh obrazı və gəmidəki bütün sağ qalanlar cənnətdə ölümsüzlük qazanmış ruhların obrazlarıdır. Əbu Reyhan Biruniyə görə, Nuhun subasması İranın Xulvan dərəsindən o yana keçməmişdir. Nuh gəmisini Kufədə tikmiş, məhz burada ”su ocaqda qaynamışdır” və gəmi buradakı Cudi dağında dayanmışdır. Rəvayətlərin birinə görə isə Nuhun dövründə “Kufə qarısının” ocağında tufan qopur və buna Nuhun tufanı deyilir və s. Bir çox mənbələrdə subasma - ocağda qaynadılmış su, dənizlə əlaqələndirilir. Qədim Misir mətnlərinin birində isə Allahlardan biri deyir: “Mən, saatı və günləri yaradan, ili başlayan, daşqını həyata keçirən və diri odu yaradanam”. Belə çıxır ki, daşqını - saatı, günləri və diri odu yaradan bir Allah, bunu xüsusi məqsədlə həyata keçirmişdir. 

“And olsun o dağa, açılmış dəri üzərində yazılmış kitaba, gələnləri olan evə, ucaldılmış tavana, qızdırılıb qaynadılmış daşqın dənizə ki, sənin Allahının cəzaları enəcək, və Göylərin çalxalandığı, dağların hərəkətə gəldiyi o gün Onu uzaqlaşdıran olmayacaq” (Quran, 52:1-10). Bu isə o deməkdir ki, “subasma” hadisəsi həqiqətən də xüsusi məqsədlə qaynadılmış su ilə bağlı keçirilən magik ritualla əlaqəlidir. Misirin digər adı olan Ta-Meri rəmzi isə eyni zamanda ”“ “subasma torpağı” kimi tərcümə edilmişdir ki, bu da Misir rəmzi altında Göydə yaradılmış ruhlar dünyasının nəzərdə tutulması qənaətinə gətirib çıxarır. Subasmanın Yəhudi və Babil variantlarına görə, Allah insana sirr açaraq, ona gəmi düzəldib, “həyat toxumunu” xilas etməyi tapşırır. Babil variantında qeyd olunur ki, su çəkiləndən sonra insan qurban kəsir və Allahlar səviyyəsinə yüksəlir. 

“Daşqın gəldi”¦ Daşqın gələndən sonra şah hakimiyyəti Göydən yerə göndərildi”. Əhdi-Ətiqdə isə subasma ilə əlaqədar xüsusi nəzərə çatdırılır ki, «Allah subasma üzərində təntənəli surətdə əyləşdi və O, şah kimi əbədi əyləşəcək”. Belə çıxır ki, şahlıq Allah hakimiyyətidir və o sirli daşqınla eyni vaxtda əbədi olaraq yerə göndərilmişdir. Yəhudi variantına görə, daşqın, Göydən tökülən kişi sularının, yerdən qalxan qadın suları ilə birləşməsindən baş vermişdir. 

“Biz Göyün qapılarını şırıltı ilə tökülən su ilə açdıq. Yerdən də suyu püskürtdük və onlar əvvəldən təyin edilmiş iş üçün birləşdilər” (Quran, 54:11,12). İsayın kitabında isə subasma, “Nuhun suyu” adlandırılır. Bu isə o deməkdir ki, “Nuhun suyu” eyni zamanda “həyat toxumudur” və o Göydən tökülən kişi sularının, yerdən qalxan qadın suları ilə birləşməsi, yəni ilkin materiya ilə mistik “qurban” mərasimi zamanı Göyə qalxan “ruhların” birləşməsi ilə bağlıdır və s. Bu haqda mən “Batini-Quran” kitabında geniş məlumat vermişəm. Yunan mənbələrində Nuh rolunda Prometeyin oğlu Devkalion çıxış edir. Prometeyin məsləhəti ilə o subasma zamanı gəmi düzəldir və xilas olur. Sufizmdə “Prometey” rəmzi Pir-Maday kimi açılır ki, bu da Midiya fironu deməkdir. Devkalion obrazı isə Nuh obrazı kimi axirətdə Allahın yerə enəcəyi obrazdır. Bütün bunlardan çıxan nəticə isə odur ki, Nuhun obrazı axirətdə gələcək Mehdinin obrazıdır ki, o da hələ gəlməmişdir”.