Amerika Birləşmiş Ştatlarında yaşayan azərbaycanlı idmançı Asif Bayramovla müsahibə
- Asif bəy, xahiş edirəm, oxucularımıza özünüz haqqında məlumat vərəsiniz...
- 1964-cü ildə Qərbi Azərbaycanın Qafan şəhərində anadan olmuşam. Peşəkar idman fəaliyyətinə 1985-ci ildə Sankt-Peterburq şəhərində başlamışam. 1985-1989-cü illərdə cüdo və şərq idman novü (kökşinkay) üzrə məşqçi müəllim, 1989-1990-ci illərdə Sankt-Peterburq şəhərində “LOTOS” idman klubuna direktor təyin olmuşam. Cüdo üzrə idman ustalığına namizədəm.
Kitab yazmaq fəaliyyətinə elə həmin illərdən başlamışam. İlk elmi kütləvi kitabım “Karate” 1994-cü ildə çapdan çıxıb. 1996-ci ildə isə elmi metodik kitabım “İstedadınıza meydan tapın” işıq üzü görüb.
1997-ci ildə Azərbaycan tarixində ilk dəfə olaraq ixtira idman trenajorunun müəllifiyəm.
1992-ci ildə Bakıda keçirilən “Kavkazda yaşayan yəhudilərin tarixi, mədəniyyəti və məişəti” adlı sərginin təşkilatçılarından biri olmuşam. Sərgini hazırlayarkən bir neçə yəhudi idmançılarının fəaliyyəti diqqətimi çəkdi. Belə qərara gəldim ki, bu sahədə mövzunu genişləndirim. Bundan əlavə, bildirməliyəm ki, tarix boyu deportasiyalara məruz qalmış bir xalq yaşadığı yerdən asılı olmayaraq daim inkişaf edir və o cümlədən də Azərbaycanda idmanın inkişafını diqqətdən kənarda qoymayıblar. Qərbi Azərbaycandan qaçqın düşməyim məni vadar etdi ki, belə bir mübariz xalqın (yəhudilərin - red.) idmançıları barədə kitab yazım.
Kitab günü-gündən güclənən Azərbaycan-İsrail munasibətlərində elmi və mədəni sahənin tərkib hissəsi olub xüsusi yer tutacaq. Eyni zamanda, hər iki ölkənin idman alimlərinin və tədqiqatçılarının işində mühüm rol oynaya bilər. Azərbaycan və yəhudi icmalarına gəldikdə isə, deyə bilərəm ki, artıq bu barədə Bakıda olan dini yəhudi icmaları və digər yəhudi icmaları belə bir kitabın çıxmasını sevinclə qarşılayıb və kitabın tarixi hadisə olduğunu vurğulayıblar. Azərbaycan Respublikasının səfirliyində, ABŞ Konqresi kitabxanası, Vaşinqton meriasi, AJC (Amerika Yəhudi Komitəsi), International Jews Sports Hall of Fame (Beynəlxalq Yəhudi İdmançılarının Şöhrət və Şərəf Salonu) və The Jewish Muzeum of Maryland (Mərilənd Yəhudi Muzeyi), B'NAI B'RITH INTERNATIONAL (lobbi təşkilatı ) və digər möhtəşəm yerlərdə kitabın təqdimatı alqışla qarşılandı. Kitab gələcəkdə Azərbaycan və yəhudi icmaları arasında qarşılıqlı münasibəti daha da gücləndirəcək və digər icmalar üçün örnək olacaq. Kitabın ABŞ-dakı təqdimatı ilə bağlı B'NAI B'RITH INTERNATIONAL tərəfindən benəlxalq sertifikata və İsrailin baş naziri cənab Benyamin Netanyahu tərəfindən təbrik məktubuna layiq görüldüm.
2006-2015-ci il tarixlərdə Neftçi İdman Sağlamlıq Mərkəzində müxtəlif vəzifələrdə çalışmışam. Qəribədir ki, kitabın ABŞ-dakı təqdimatından sonra ixtisara salınaraq işdən azad olundum.
- Bildiyimiz qədər, məşhur şahmatçımız Teymur Rəcəbovla bir yerdə çalışmısınız. Sirr deyilsə, bu iş fəaliyyəti nədən ibarət olub?
- Teymur Rəcəbovla fəaliyyətim 1993-cü ildən başlayıb. O zamanlar Teymur 6 yaşa yenicə qədəm qoyurdu. İlk illərdə maliyyə çətinliklərini şəxsi əlaqələrim vasitəsilə aradan qaldırmağa müvəffəq oldum. Beynəlxalq yarışlara ezamı nəzərdə tuturam. Gələcək yarışları analiz etmək və hansı yarışda oynamasını atası Boris Yefimoviç Şeyninlə birgə qərar verirdik. Lakin buna baxmayaraq, yüklər 2 hissəyə bölünmüşdü. Şahmatın inkişaf hissəsi atasının, fiziki-psixoloji və taktiki tərəfi isə mənim üzərimə düşürdü. Bu minvalla birgə fəaliyyətimiz 2003-cü ilin sonunadək davam etdi. Fəaliyyətimizlə bağlı respublikanın qəzet və teleradio şirkətləri lazımi qədər məlumat vermişdi.
Müəyyən səbəbdən sonra mən birtərəfli qaydada komandadan ayrılmalı oldum. Bu da öz növbəsində yarışlardakı nailiyyətinə təsirini göstərməli oldu. Fəaliyyətimiz dövründə daim 1-ci 10-luqda gedirdisə, hazırkı durum 40-da qərarlaşıb.
- Bostonda Azərbaycan diasporu fəaliyyət göstərirmi?
- Azərbaycan diasporunun Massaçusetts Ştatında Bostonda fəaliyyətinə gəldikdə, məndə olan məlumata görə, yoxdur. Çünki 15-25 il burada yaşayan azərbaycanlıların bu haqda bilgiləri yoxdur, lakin olmasını istəyirlər. Yəni bunun üçün ilkin baza (insanlar) var.
- Qarşıda hansı planlarınız var?
- ABŞ-da artıq idman klubu yaratmaq ərəfəsindəyəm. Bunun üçün hər şərait və zərurət var. Hazırda fəaliyyətim Türk Kültür Mərkəzləri ilə sıx əlaqə yaratmaqdır. Bundan sonra Hollivudda “Azərbaycan Yəhudiləri İdmanda” yazdığım kitabın ssenarisi əsasında sənədli filmin çəkilməsi barədə hazırlıq işləri görürəm və kitabın ABŞ-da təkrar nəşrini planlaşdırıram. Azərbaycanın təbliği haqda daha geniş işlər görmək olar. Bunun üçün ABŞ-da informasiya bürosu yaratmaq lazımdır.
- Erməni diasporu fəaliyyəti Boston şəhərində hiss olunurmu?
- Sözsüz. Bu barədə daha ərtaflı yazmaq olar. Ehtiyac varmı buna? Ay işığı altında hər şey aydın görünür.
Elnur Eltürk
