Rusiya xarici işlər naziri Sergey Lavrovun verdiyi son bəyanatı Azərbaycan ictimaiyyəti arasında geniş narazılıqla qarşılanıb. Onun "Qarabağ problemi Azərbaycanın daxili işi deyil sözlərinə ölkəmizdə narazılıq ifadə edənlər artmaqdadır. 

Politoloq Şahin Cəfərli Moderator.az-a açıqlamasında məsələyə münasibət bildirib:

"Qarabağ probleminin nə vaxtsa bizim xeyrimizə həll olunacağına ümidlər onsuz da çox az idi. Bunun ən başlıca səbəbi odur ki, biz çox təəssüf ki, öz taleyimizə hökm verəcək durumda deyilik. Söhbət iqtidarın yanlış və ya doğru siyasətindən getmir. Azərbaycan kiçik dövlətdir, Qarabağ münaqişəsi isə Rusiya kimi regionun lideri olan böyük dövlətin dolayı da olsa cəlb olunduğu bir məsələdir. Bu münaqişədə Rusiyanın çox ciddi marağı var, zatən münaqişəni yaradıb indiyə qədər həlinə imkan verməyən dövlət də Rusiyadır. Biz Azərbaycan dövləti və xalqı olaraq təkbaşına bu gücə qarşı dura, açıq şəkildə onun maraqlarına meydan oxuya bilmərik. Hərbi yola əl atsaq, aydındır ki, Rusiya Ermənistanın tərəfini tutacaq və torpaqlarımızın azad olunmasına imkan verməyəcək. Siyasi həll yolunun isə bizi hansı nöqtəyə gətirib çıxardığı ortadadır.  

Hazırda sülh danışıqları bizim üçün əlverişli olmayan hüquqi təmələ - Madrid prinsiplərinə əsaslanır. Bu prinsiplərdə problemə yanaşma kökündən səhvdir. Madrid prinsipləri Azərbaycanın işğal olunmuş torpaqlarını iki fərqli kateqoriyaya ayırır: Dağlıq Qarabağ mübahisəli ərazi sayılır və işğal olunmuş ərazilər kimi yalnız ətraf rayonlar nəzərdə tutulur. Dağlıq Qarabağın hüquqi statusunun bu ərazidə keçiriləcək plebissit vasitəsilə müəyyənləşdirilməsi əksini tapıb. Dağlıq Qarabağda keçiriləcək referendumdan separatçıları və Ermənistanı qane edən nəticənin çıxacağı isə hamıya aydındır. Vaxtilə Dağlıq Qarabağda yaşamış azərbaycanlı əhalinin öz evlərinə qayıtması da səsvermənin nəticələrinə həlledici təsir göstərməyəcək. Bu cür yanlış təməl üzərində ədalətli sülh qurula bilməz. Burada əlverişsiz məqam həm də ondan ibarətdir ki, ətraf rayonların qaytarılması ilə status məsələsi birgə götürülür və paket həll nəzərdə tutulur. Yəni Azərbaycan ətraf rayonları təhvil almaq üçün faktiki olaraq Dağlıq Qarabağın itirilməsi variantına razılaşmağa məcbur edilir. Lavrov da məhz buna işarə vurub. Üstəlik, rayonlar qaytarılarkən təmas xəttinə və Ermənistan-Dağlıq Qarabağ dəhlizinin təhlükəsizliyi üçün Laçın və Kəlbəcərə sülhməramlı kontingent yerləşdirilməsi planlaşdırılır. Bu kontingentin komandanı və əsgərlərin önəmli bölümü yəqin ki, ruslar olacaq. Rusiya çalışacaq ki, münaqişə həll olunsa da, olunmasa da, Azərbaycanı öz nüfuz dairəsində saxlasın və onun avroatlantik inteqrasiya yolu ilə getməsinə imkan verməsin.

Mən hazırkı durumda Dağlıq Qarabağ münaqişəsinin ədalətli həllini qeyri-mümkün sayıram. Çıxış yolu kimi bunu qeyd etmək olar ki, əlverişsiz sülhə getməkdənsə, məsələnin daha bir müddət donmuş şəkildə qalması daha sərfəlidir. Ola bilsin, gələcəkdə qlobal və regional proseslərin inkişafı nəticəsində daha fərqli bir mənzərə və əlverişli fürsət yaransın."