ABŞ Dövlət Departamentinin məlum bəyanatında ABŞ vətəndaşlarının Azərbaycana səfər etməsi tövsiyyə olunmur, müəyyən risklər, terror təhlükəsinin mümkünlüyü barədə xəbərdar olunur. Biz, ikinci qrup riskli ölkələr sırasındayıq. Burda Almaniya, Fransa kimi dövlətlər də var. Rusiya daha pis-3-cü kateqoriyaya aid edilərək, daha riskli ölkələr siyahısındadır. Bu təzə iş deyil. ABŞ az qala yarım ildə bir dəfə bu tip bəyanatlarla vətəndaşlarını xəbərdar edir. ABŞ-ın bəyanatında sözün birbaşa mənasında terror qorxusu axtarmaq lazım deyil. ABŞ-da terror bizdən daha çox olur. Son on ildə Amerikada daha irimiqyaslı terror hadisələri baş verib, nəinki Azərbaycanda. Məsələ terrorda deyil, buna qalsa terror hadisəsinin olmadığı ölkə Şimali Koreyadır, amma dünyada  bu ölkəyə səfər etmək istəyənləri barmaqla saymaq olar.  

   

Rusiya Xarici İşlər Nazirliyinin sözçüsü Mariya Zaxarovanın adı çəkiləndə Azərbaycan vətəndaşlarında xoş olmayan hisslərin oyanması mübahisəsizdir. Bu xanım dəfələrlə Azərbaycanın mövqeyinə, xüsusilə Qarabağ problemində və digər məsələlərdə  maraqlarımıza qarşı həmişə sərt, neqativ münasibətilər bildirib. Dəfələrlə keçirdiyi brifinqlərdə, hətta ölkəmizi aşağılayacaq səviyyədə ifadələr işlədib, mətbuatımızı “ xamstvo”- “qanacaqsızlıq, tərbiyəsizlik, yekəbaşlıq” kimi ifadələrlə təhqir edib. Zaxarova Lavrovun kəşfidir. Rusiya xarici siyasətini əks etdirən aynadır. Zaxarovanın  yalnız bizə qarşı deyil, Rusiyanın bütün rəqiblərinə, düşmənlərinə qarşı etikadan, diplomatiyadan uzaq ifadələr süsləməyi yenilik deyil. 

Gələk xanım Mariyanın ABŞ Dövlət Departamentinin  bəyanatına olan reaksiyasına. Zaxarova yenə diplomatik deyil, “blatnoy” termin işlədib. “...departament vətəndaşlarında Rusiyaya qarşı heyvani qorxu hissi yaratmağa çalışır”. Bu öz işidir. Bəs, nə yaxşı Mariya Zaxarova birdən ”“ birə Azərbaycanın da təhlükəli siyahıda yer almasına etiraz edib? Mariya nə vaxtdan bizim maraqlarımızı qoruyan oldu?  ABŞ Dövlət Departamenti 2015-ci ildə Dilqəm Əsgərovun və Şahbaz Quliyevin azad olunması üçün Ermənistan dövlətinə olan müraciətini hörmətli Mariya xanım o zaman niyə müdafiə etmədi? Baxmayaraq ki, D.Əsgərov Rusiya vətəndaşıdır. Qarabağ probleminin həllində Rusiyanın rolu barədə jurnalistin verdiyi sualı süngü ilə qarşıladığı da yadımızdan çıxmayıb.  Mariya Zaxarovanın bizi müdafiəsi  “cəhənnəmə gedən özünə yoldaş axtarar” dan başqa bir şey deyil, hətta “ayı xidmətidir”. ABŞ Azərbaycanda beynəlxalq idman yarışlarının keçirildiyini çox yaxşı bilir və ən azı burdakı səfirliyi və digər mənbələri vasitəsilə Azərbaycandakı ictimai-siyasi, iqtisadi və təhlükəsizliklə bağlı vəziyyəti pis bilmir. Əlbəttə, departamentin bəyanatı yüzdə-yüz reallığı əks etdirmir. Burda siyasi münasibət də açıq görünür.  Beynəlxalq təşkilatların Azərbaycanı qeyri-azad ölkələr siyahısına salması da burda rol oynayır. Bizim Rusiyanın yanında yer almağımız Amerika üçün faciə deyil, sadəcə əlavə baş ağrısıdır və ABŞ bilir ki, burda Rusiyanın təzyiqi, qorxusu, hədəsi hələ ki, başlıca rol oynayır. İranda baş verən son hadisələrdən sonra İranın ABŞ-ı bu hadisələrdə günahkar tutması da ABŞ-ın vətəndaşlarını xəbərdar etməsinin səbəblərindən biri hesab oluna bilər. Yaxşı olar ki, Mariya Zaxarovanın “müdafiəsi” ilə özümüzə təskinlik verməkdənsə, az qala toy-bayram etməkdənsə qüsurlarımızı ortadan qaldıraq. Ötən il Dövlət Departamenti konkret olaraq Azərbaycan haqqında iki dəfə bəyanat verib, ümumiyyətlə elə bir il yoxdur ki, ABŞ ölkəmizdəki bəzi proseslər və hadisələr haqqında bəyanatlar verməsin. Yox, ABŞ-ın deyil, Rusiyanın yanındayıqsa, Dövlət Departamentinin nə deyib-deməməsindən niyə narahat olmalıyıq?!

 

Mariyanın  bizə “məhəbbətini” yoxlamaq elə də çətin iş deyil. Sabah növbəti brifinqlərin birində  Dağlıq Qarabağ haqqında Azərbaycanın beynəlxalq hüquqa söykənən mövqeyi barədə danışıb Rusiyanın niyə konstruktiv mövqe tutmadığı barədə sual verin, o zaman  Zaxarovanın əsl üzünü bir də görəcəksiniz. Necə ki, onun şefi ötən ilin noyabrında Bakıya gələndə bildirmişdi ki, Qarabağ Azərbaycanın daxili işi deyil.