“Təhsil müəssisələrinin media ilə əməkdaşlığı alqışlanmalıdır”

Son bir neçə ildir ki, ölkəmizdəki ali təhsil müəssisələrində keçirilən imtahanların müşahidəsinə media əməkdaşları da cəlb olunmaqdadır. Maraqlıdır, media əməkdaşlarının bu prosesdə iştirakı imtahanların şəfafflığını təmin edən amil kimi nə dərəcədə önəmlidir? Bu, ictimai nəzarət mexanizmi kimi mediaya verilən önəmin daha bir göstəricisi hesab edilə bilərmi?

Moderator.az-a açıqlama verən Mətbuat Şurasının sədr müavini, Jurnalistlərin Həmkarlar İttifaqının sədri Müşfiq Ələsgərli məsələ ilə bağlı maraqlı fikirlər səsləndirib:

“Bu məsələ bildiyiniz kimi, qanunla tənzimlənir. İctimai iştirakçılıqla bağlı Azərbaycan Respublikasının qanunu mövcuddur və bu qanun əsasında da İctimai Şuralar təşkil olunur. Nazirliklər yanında, təhsil müsəssiələrində və ictimaiyyətlə işləyən digər qurumlarda bu cür İctimai Şuralr yaradılıb. Onlar işin gedişatının monitorinqini aparır, proseslərlə yaxından tanış olur, qiymətləndirmələr aparırlar.

Təhsil müəssisələrində də bu cür İctimai Şuralar formalaşıb. Bu İctimai Şuralarda yalnız media əməkdaşları deyil, QHT nümayəndələri də təmsil olunur.

Bu, iki baxımdan önəmlidir. Birincisi, təhsil müəssislərinin vətəndaş cəmiyyətləri il iş imkanlarının və vərdişlərinin artırılması baxımındn müsbət bir addımdır. İkincisi, bu əməkdaşlıq cəmiyyət üçün də faydalıdır. Təhsil müəssisələri ilə bağlı mediada həm pozitiv, həm də neqativ yönümlü informasiyalar yer alır. Bu baxımdan, media təmsilçilərinə şərait yaradılır ki, proseslərlə yaxından tanış olsunlar, onları düşündürən suallara cavab alsınlar, obyektiv informasiya versinlər.

Hesab edirəm ki, işin bu şəkildə təşkili həm vətəndaş cəmiyyətinin, həm cəmiyyətin, həm də təhsil müəssisəsinin marağına cavab verir və bu fəaliyyət alqışlanmalıdır”.

Seymur Əliyev