“Avropadakı anti-türk qüvvələri sanki dopinq alıb”

Son bir neçə gündür ki, Avropanın bəzi şəhərlərində PKK tərəfdarlarının Türkiyə əleyhinə aksiyaları keçirilməkdədir. Aksiyaçılar Türkiyədən Afrin əməliyyatından imtina etməyi, Suriyada hərbi əməliyyat keçirməməyi tələb edir.

Maraqlıdır, Avropada anti-Türkiyə aksiyalarının “birdən-birə” alovlanması nə ilə bağlıdır? Qərbdəki soydaşlarımız Avropadakı anti-türk aksiyalarına qarşı mübarizədə türk fəallarına, diasporlarına dəstək verməlidirmi?

Moderator.az-a açıqlama verən politoloq Tofiq Abbasov bu aksiyaların səbəblərinə aydınlıq gətirib:

“Avropa dövlətlərində, xüsusilə də Fransa və Almaniyada anti-türk meyilləri həmişə yüksək olub. Bu dövlətlərdə hər zaman Türkiyə dövlətinə, Türkiyə xalqına qarşı aksiyalar keçirilib. Indi isə bu aksiyalar yeni bir nəfəs qazanıb. Indiki məqamda bu aksiyaların keçirilməsi təsadüfi deyil. Kürdlərdən ibarət anti-türk emiqrasiyası həmişə Avropa ölkələrində fəal olub. Indi isə onlar sanki dopinq alıblar.

Bunun əsas səbəblərindən biri odur ki, ABŞ Suriya və İraqdakı kürdləri birmənalı şəkildə dəstəkləyir. Türkiyə sərhədləri boyunca Suriyada kürdlərdən ibarət 30 minlik kontingent cəmləyir.

Təbii, Türkiyə dövlətinin öz haqını qorumaq üçün kifayət qədər gücü və imkanı mövcuddur. Ərdoğan da vurğuladı ki, Türkiyə öz həqiqətini qətiyyətlə qoruyacaq və hərbi əməliyyatlara başlayacaq.

Vaxtiylə Azərbaycan siyasi rəhbərliyinin təşəbbüsü ilə erməni probleminə qarşı mübarizədə Azərbaycan diaspor təşkilatları ilə Türkiyə dispor təşkilatları mütəşəkkil cəbhə yarada bildilərsə, bu məsələdə də birgə fəaliyyət göstərə bilərlər.  Avropadakı soydaşlarımızın bu məsələdə türklərə dəstəyinə gəlincə, bu məsələdə heç bir problem görmürəm”.

Seymur Əliyev