Bu günlərdə millət vəkili Aqil Abbasın maraqlı yazısı dərc olunmuşdu - ”Azərbaycan nağılları: Göydən 5 rayon düşdü”. Müəllif mətbuatımızın yalanları necə tirajladığını, xüsusilə Qarabağla əlaqədar Rusiyanın 5-ci dərəcəli adamlarının, hətta Mariya Zaxarova kimi səlahiyyətlilərin hərdən “nağıl” danışmasını toy-bayram etdiyimizi ironik üslubla məsxərəyə qoymuşdu. Müəllif onu da qeyd etmişdi ki, bu “yalanları, nağılları” adama şirin gəldiyi üçün tez qəbul ediyimizi vurğulamışdı. Əlavə də edək ki, özümüz əlimizi ağdan qaraya vurmayanda, yağlı kökə qabağımıza sinidə gətiriləndə, daha da şirin olur, ona görə də cəmiyyətdə belə bir fikir formalaşıb ki, hansısa sehirli qüvvə Qarabağı bizə qaytaracaq. 30 ildir ki, nə sehr var, nə bunu istəyən başqa birisi. Bunu dövlət və millət olaraq özümüz etməliyik. Bəs, bu işlə guya məşğul olan diplomatiyamız nə deyir?

Hörmətli xarici işlər nazirimiz Elmar Məmmədyarov yanvarın 18-də, yenə ATƏT ”“ in həmsədrləri ilə, erməni həmkarı Nalbandyanla Polşanın tarixi məkanlarından birində - Krakovda görüşlər keçirib. Hər görüşdən sonra “irəliyə doğru bir addım atıldığını” o qədər eşitmişik ki, o addımları atsaydıq çoxdan Qarabağın ortasından girib Ermənistanın sərhəddinə çatmışdıq. Bu dəfə də nazir bizə “şirin gələn” nikbin bəyanat verib. Nazir: “Görüş əsnasında həmsədrlər tərəfindən münaqişənin həlli ilə əlaqədar bir sıra kreativ fikirlər irəli sürülüb. Bu ideyalar əsasında müzakirələr davam etdirmək məqsədilə həmsədrlər fevralın əvvəlində regiona səfər edəcəklər... Ümumi yanaşma ondan ibarətdir ki, münaqişənin həllində irəliləyiş əldə etmək və regionda sülh və sabitliyi təmin etmək üçün daha intensiv, substantiv və məntiqli danışıqlar davam etdirilməlidir” deməklə görəsən nəyi nəzərdə tutub...?

Bəs, görəsən Qarabağ problemiylə bağlı həmsədrlərin fikirlərini "kreativ" edən nədir ki, ona əsaslanıb fevralın əvvəlində bölgəyə səfər edəcəklər? Əminliklə iddia etmək olar ki, heç nə. Siyasətin əlifbasından az-çox məlumatlı hər kəs bilir ki, nazirin diplomatik terminlərlə zəngin ”substantiv, intensiv, kreativ” sözləri bizim, məhz bizim başımızı aldatmaqdan savayı bir şey deyil və özü də bunu hamıdan yaxşı bilir. Nazirin sözü mətbuatda yayılar-yayılmaz statuslu, növbətçi politoloqlar (yeri gəlmişkən, hörmətli Aqil Abbasın həmkarları) tez bunu aparılan siyasətin uğurlu nəticəsi olaraq böyük tarixi qələbə kimi qiymətləndiriblər. Bu açıqlamalardan bir şeyi anladım ki, şərh verənlərin bəziləri heç kreativliyin mənasının nə olduğunu yaxşı bilmir. Lüğətdə “kreativ” sözü “ ...yaradıcılıq qabiliyyəti, prinsipial cəhətdən yeni ideyaların üzə çıxarılmasına və qəbul edilməsinə hazırlıq” kimi izah olunur. Hələ ki, problemin həllində yeni ideyaların, yaradıcı yanaşmanın nədən ibarət olduğunu göstərən nə tarixi-siyasi şərait üfüqdə görsənir, nə də nazir kreativliyin səbəblərini açıqlayıb.

O ki, qaldı sabitliyə - bizim vəziyyətimizdə bu tələdir, “sabitlik tələsi”. Atəşkəs imzalanandan tələyə düşmüşük. Adətən tələyə asan düşülür, amma ordan çıxmaq çətin olur. Biz həm status-kvo ilə razılaşmırıq, həm də sabitlik istəyirik. Klassik bir deyim var: “zərərli sabitlikdənsə, qeyri - müəyyənlik daha yaxşıdır”. O qeyri-müəyyənlik ki, hərəkətdə olursan, çabalıyırsan, nəhayət, müəyyənləşirsən. 

 

Bu, kreativ yalandır. Reallıqsa başqadır. Reallıq odur ki, erməni gecə-gündüz fəxr etdiyimiz Cocuq Mərcanlıda tikdiyimiz evlərdən on dəfə çox evləri təkcə Dağlıq Qarabağ ətrafındakı işğal etdikləri ərazilərdə tikiblər. Lələtəpənin o biri üzündə, aprel döyüşlərindən sonra kilsə də tikiblər, zabitlər üçün evlər də. Talışın başının üstündəki təpəni ələ keçirmişik, amma Talışda erməni milyonçuların ianəsi ilə bərpa işləri görülür. İrəvanda neçə vəzifədə olan varsa, arada gəlib Qarabağda qırmızı lenti kəsib nəyinsə açılışını edir. Yüksəklik alırsan ki, qarşı tərəfə hərtərəfli nəzarət edəsən? Bu necə nəzarətdir ki, erməni Talışda Yeni ili arxayın keçirir, ev, kilsə tikir? Tutaq ki, təbliğatdır. Razıyam, amma reallığa əsaslanan təbliğatdır. Kinoda deyilən kimi ”“ bəs, o reallığa əsaslanan təbliğatdan bizdə niyə yoxdur? Yəni biz onların təbliğatını niyə bir gecədə dağıtmırıq, partlatmırıq? O tikilən kilsə, o açılışı olan evlər, obyektlər səhərisi gün dağıdılsaydı, olardı KREATİVLİK! Bir də tikməzdilər, bir də Serjik qırmızı lenti kəsməyə gəlməzdi. Həmsədrlər də adam balası kimi bizi dolamaqdan çəkinib başqa kreativlik axtarardılar...

İndiki halda həmsədrlərin “kreativ fikri” bilirsiniz nədir? Bir ildir ki, Qarabağ cəbhəsində heç yüngül atışma da yoxdur. Bu, erməninin də, həmsədrlərin də işinə yarayır. Erməni arxayın qurub-yaratmaqla məşğuldur, Anjey Kasprşik də evindəki kimi oturub rahat maaşını alır. Bax bu kreativ reallıqdır. 

Reallıq Bakının ortasında Azərbaycan vətəndaşlarının Əli Xamneyinin portretini gəzdirib onu “rəhbərimiz” deyə qışqırması, bizim də onu sükutla qarşılamamızdır. Mane olmayaq, birdən İranın xətrinə dəyər...

 Reallıq Çexiyadakı səfirimizin erməni səfirlə bir yerdə, hansısa Konevdən ötrü Rusiyanın hazırladığı etiraz məktubuna qol çəkməsidir. Qol çəkməliyik, yoxsa Rusiyanın xətrinə dəyər...

Bəs, Qarabağın erməni tərəfdən işğal olunması kimin xətrinə dəyməlidir?! Burda niyə susmuşuq?

P.S. Hörmətli Aqil Abbasın sözünə qüvvət olaraq: hiss olunur ki, bundan sonra “göydən düşən beş rayon” deyəsən “kreativ” nişanı ilə düşəcək. SSRİ-nin “ znak kaçestvası” kimi...