Suriyada ABŞ və müttəfiqlərinin müdaxiləsindən sonra genişlənən hərbi əməliyyatlar dünyada sülh və təhlükəsizliklə yanaşı, iqtisadi sabitlik baxımından da ciddi suallar doğurmaqdadır. Maraqlıdır, Suriyada genişlənməkdə olan hərbi əməliyyatlar dünya bazarında neftin qiymətinə hər hansı formada təsir göstərə bilərmi? Yaxın Şərqdəki bu münaqişə neft bazarına necə təsir göstərəcək?

Moderator.az-a açıqalama verən enerji məsələləri üzrə ekspert İlham Şaban müharibə faktorunun neftin qiymətinə artıq təsir göstərməkdə olduğunu qeyd edib:

“Müharibə amili neftin qiymətinə artıq təsir edib, özü də indi yox...Elə ki, cənab Tramp Twitter-də Suriya ilə bağlı bir cümlə yazdı və Rusiyaya da mesaj göndərdi ki, ağıllı raketlərlə gəlirik, qarşılayın. O saat dünya birjaları buna reaksiya verdilər və neftin qiyməti 70-i keçdi. Sonrakı günlərdə Böyük Britaniya və Fransanın da Suriyaya qarşı ABŞ-a dəstək olması xəbərləri özünü doğruldanda və artıq Kiprdəki hərbi bazalarda hücuma hazırlıqla bağlı məlumatlar təsdiqini tapanda, Brent markalı neftin qiyməti London birjasında 2014-cü ilin dekabrından bu yana ən yüksək qiymətinə - 72.99-a qədər yüksəldi. Cümə günü birjalar bağlananda qiymət bir qədər enərək 72.64 qiymətində stabilləşmişdi. Təbii ki, əgər aviazərbələrin endirildiyi an birjalar işləsəydi, o zaman bəlkə yeni maksimumlar qeydə alınardı.

Bazar ertəsi hər halda neftin qiymətinin azalmasına ümid etmirəm. Çünki Suriya böhranı aviazərbələrlə çözülmədi, daha da mürəkkəbləşdi, hazırda bazar iştirakçıları onun sonunda işıq yox, duman görürlər. Bu isə qiymətlərin yaxın günlərdə müəyyən diapazonda azalıb-artma ehtimalını gücləndirəcək. Çünki hər hansı bir mülayim bəyanat təbii ki, münaqişənin sülhə yönümündə ümidlər yaradacaq və bu da qiymətlərin aşağıya doğru istiqamət götürməsini sürətləndirəcək. Yox əgər bundan sonra hansısa terror aktı və ya yeni bir toqquşma olacaqsa, onda əks-proses bazarda öz sözünü deyəcək. Nəticədə neftin qiymətinin stabilliyi qısa müddət üçün olsa da pozulacaq. Bu isə bazar iştirakçıları üçün heç də arzu olunan məsələ deyil, ancaq bazardakı möhtəkirlər üçün böyük vəsaitlər əldə etmək yaxşı bir şansdır”.

Seymur Əliyev