“Rusiya tərəfindən devrilmək ehtimalı Paşinyanı narahat edir”

Rəsmi İrəvan bu günlərdə Kollektiv Təhlükəsizlik Müqaviləsi Təşkilatında (KTMT) baş nazir səviyyəsində təmsil olunmaq istəyi ilə çıxış edib, bunu ölkə qanunvericiliyindəki son dəyişikliklərlə əlaqələndirib.

Maraqlıdır, Ermənistan bu istəyi həqiqətən də qanunvericilikdəki dəyişikliklərəl bağlıdır, yoxsa bu, hər şeydən öncə düşmən ölkənin KTMT-ə artan ümidinin, Rusiya ilə yaxınlaşmaq cəhdinin göstəricisidir?

Moderator.az-a açıqlama verən politoloq Elşən Manafov Ermənistanın siyasətində bir-birinə zidd olan, bir-birini təkzib edən məqamların kifayət qədər çox olduğuna diqqət çəkdi:

“Ermənistan hakimiyyətinin daxili və xarici siyasətində daban-dabana ziddiyyət təşkil edən xeyli məqam var. Hazırda Ermənistan iqtidarının ən böyük qayğısı nəyin bahasına olursa-olsun ABŞ-ın siyasi və maliyyə dəstəyini almaqdan ibarətdir. ABŞ konqresində 50 konqresmenin Trampa ünvanlanan müraciəti var. Konqresdəki “Ermənistanın dostları” adlı qruplaşma bunu layihələşdirir və görüşün baş tutması üçün əlindən gələni edir. Paşinyanın özü Brüsseldə NATO sammitində Trampla görüşə cəhd etdi. Lakin Trampın sayqısız mövqeyi ilə üzləşdi. Hətta ekspertlər onun qaça-qaça Trampa yetişdiyini və onunla cəmi bir neçə dəqiqə danışmağa cəhd göstərməsinə də diqqət çəkdi. Bunu bəzi siyasilər Ermənistanın Rusiyadan qurtulmaq və ABŞ-la münasibət qurmaq cəhdi kimi dəyərləndirdi. Bu, onu göstərir ki, Paşinyanın Qərbin agenti olması ilə bağlı səslənən fikirlər əsassız deyil. Hərçənd ki, biz Qərb institutları tərəfindən Ermənistana ciddi dəstəyin göstərildiyinə də şahidlik etmirik.

Bu gün Ermənistan həm ABŞ və Avropa, həm də Rusiya üçün ağır bir yükdür. Ermənistanın heç bir ciddi təbii resursu yoxdur ki, bu güclərdən hər hansı biri məhz buna görə Ermənistanla münasibətə xüsusi önəm versin. Ermənistan işğal siyasəti səbəbi ilə bütün regional layihələrdən kənarda qalıb.

Ermənistanın KTMT-da baş nazir səviyyəsində təmsilçiliyinə gəlincə, bu qanunvericilikdəki dəyişikliklərlə də bağlı ola bilər. Bunun həm də, Qərb tərəfindən ciddi dəstəklənmədiyini görən Paşinyanın Rusiya tərəfindən devrilmə ehtimalını zəiflətmək istəyi ilə də bağlı olması mümkündür. Buna görə də Paşinyan Rusiya ilə münasibətlərə daha çox önəm verməyə çalışır. Ermənistanın KTMT ilə münasibətləri guya fərqli bir müstəviyə daşımaq istəyi Paşinyan iqtidarının öz hakimiyyətini uzatmaq arzusu ilə bağlıdır. O, ən azından növbədənkənar parlament seçkilərinə qədər Rusiya tərəfindən atılacaq de-marşlardan sığortalanmağa çalışır”.

Seymur ƏLİYEV