“Bu səfər Azərbaycan-NATO münasibətlərinin göstəricisi sayıla bilər”

Sentyabrın 20-də NATO baş katibinin müavini R.Qottemüllerin Azərbaycana səfəri gözlənilir.

Maraqlıdır, bu səfər Azərbaycan-NATO münasibətlərinin inkişafında yeni bir mərhələnin başlanmasına səbəb ola bilərmi?

Moderaror.az-a açıqlama verən millət vəkili Elman Nəsirov Azərbaycanın NATO ilə münasibətlərin inkişafında maraqlı olduğunu vurğuladı:

“Bu səfər Azərbaycan-NATO münasibətlərinin bir göstəricisi sayılmalıdır. Azərbaycan dövləti ulu öndər Heydər Əliyevin müəyyən etdiyi çoxvektorlu, balanslı, tarazlaşdırılmış xarici siyasət kursu həyata keçirir. Cənab İlham Əliyev isə bu kursu çox sürətlə dəyişən dünyamıza adekvat olaraq davam etdirir. Azərbaycan beynəlxalq təşkilatlarla da əlaqələrin inkişafında maraqlıdır. Burada əsas şərt bərabərhüquqlu, qarşılıqlı etimad və inama söykənən, bir-birinin daxili işlərinə qarışmamaqdır. Azərbaycan-NATO münasibətlərinə də bu prizmadan yanaşmaq lazımdır.

Azərbaycan NATO-nun müxtəlif poqramlarında iştirak edib. 1994-cü ilin may ayından “Sülh naminə tərəfdaşlıq” proqramına qoşulub. Azərbaycan NATO ilə birlikdə Əfqanıstanda sülhün və təhlükəsizliyin təmini prosesində də fəal iştirak edir. Biz logistik və nəqliyyat imkanlarımızdan istifadə üçün şərait yaratmışıq. Azərbaycan son vaxtlar Əfqanıstanda xidmət edən əsgərlərinin sayını iki dəfə artırıb və onların sayı 120 nəfərə çatıb.

Lakin bunu da unutmaq olmaz ki, Azərbaycan 2011-ci ildən Bloklara Qoşulmamaq Hərəkatının üzvüdür. Bu isə o deməkdir ki, Azərbaycan hər hansı hərbi blokda təmsil olunmağı hədəf seçməyib. Həmçinin, Azərbaycan ərazisində heç bir dövlətin və hərbi təşkilatın hərbi bazası yerləşə bilməz.

Biz NATO ilə münasibətlərin dərinləşməsində maraqlıyıq. NATO da bunda  maraqlıdır. Lakin bu əməkdaşlıq üzvlük məsələsini özündə ehtiva etmir. Ancaq qeyd etdiyim kimi, Azərbaycan beynəlxalq sülh və təhlükəsizliyə töhfə verən bir ölkə kimi NATO ilə əməkdaşlığın genişlənməsində maraqlıdır”.

Seymur ƏLİYEV