Sizcə Fətullah Gülən məsələsində Tramp Administrasiyası Ankaraya qarşı səmimidirmi? Şəxsən Siz Fətullah Gülənin nə zamansa Vaşinqton tərəfindən Ankaraya təslim ediləcəyinə inanırsınızmı?

Moderator.az-ın əməkdaşı bu sualla Türkiyənin Ərciyəs Universiteti Ermənişünaslıq bölümünün başqanı, ermənişünas alim, professor Qafar Çaxmaqlıya müraciət edərək ondan aşağıdakı cavabı alıb:

"2016-cı ilin 15 İyulunda Türkiyədə olan çevrilişə cəhd olayından təxminən üç gün sonra mən bir yazı yazmışdım. Və o zaman isti-isti soruşulan bu suala cavab vermişdim ki, Amerika Fətillah Güləni heç vaxt Türkiyəyə təhvil verməyəcək. Çünki Amerikanın dünyanın ən müxtəlif ölkələrində illərcə yetişdirib boynuna missiya qoyduğu minlərcə casusu var, əgər Güləni təhvil versə həmin casusların yanında etibarını itirmiş olar. İndi də o fikirdəyəm. FETÖ-nün fəaliyyəti missionerlik fəaliyyəti olmuşdur, lap 19-cu yüz ildəki Xristian missionerlərinin Osmanlı dövlətini parçalamaq vəzifəsi alması kimi. Gülən camaatını təkcə Türkiyədə deyil, bütün dünyada (o cümlədən Azərbaycanda) etdikləri birbaşa Amerika dövlətinin maraqlarının təmin edilməsinə xidmət etmişdir, o ABŞ dövlətinin illər boyu yürütdüyü siyasətin daşıyıcısı və bəzən də aparıcı qüvvəsi olmuşdur. İndi Donald Tramp siyasət xatirinə belə deyir, hətta bu məsələni, yəni Gülənin Türkiyəyə iadəsini araşdıracaqlarını söyləyir, heç inandırıcı deyil, baxın, rahib Bransonu sərbəst buraxdığına görə Ərdoğana təşəkkür edir, ona "dostum" deyir. Amma bunların heç biri məncə  səmimi sözlər deyil. Hətta Türkiyədə bəzi sadəlöhv adamlar buna inanmağa çalışırlar ki, Tramp Bransonun qarşılığında Güləni verəcək. Mümkün deyil, əgər Amerikanın elə bir fikri olsaydı, yaydan bəri Türkiyənin iqtisadiyyatına bu qədər zərbə vurmazdı. Mən bu fikirdəyəm ki, Güləni  təhvil vermək, Trampın dediyi kimi ABŞ administrasiyasının gündəmində deyil və olmayacaq. Özümüzü aldatmayaq və enerjimizi boş yerə sərf etməyək, mənasız fəaliyyətlərlə  özümüzü yormayaq. Bunun yerinə FETÖ-nun xaricdəki anti-Türkiyə fəaliyyətinə qarşı ortaya effektiv  siyasət qoyaq. Bunu da söyləməyi unutmayaq ki, FETÖ təhlükəsi hələ aradan qalxmayıb və onun bu gün ayaqda durmasının Azərbaycana da Türkiyə qədər zərəri var".