Buş da boş getdi... -Əlinizi daha bərk sıxın, bəlkə siz bir şey apara bildiniz?..

Sultan Laçın

Dədə Corc Buşun da yeri boş qaldı... Vay dədə, ABŞ kimi  o boyda super dövlətin  başçısı olmuş başı minbir biliklə, sirlə dolu Buş da əliboş köçdü dünyadan... Amma ruhu günahlarla dopdolu getdi... Hələ o aləmə özündən qabaq da tanker-tanker günahları gedib yazığın... İndi orda həyatı boyu törətdiyi günahlarından nəinki 100-200, 100 milyard mərtəbəlik göydələnlər tikiləcək onun üçün... Cəhənnəm göydələnləri, od göydələnləri, zəqqum göydələnləri...Sonra o göydələnləri 11 sentyabrda oğlu Buşun partladıb uçurtduğu göydələnlərdən də betər formada uçurdacaqlar dədə Buşun məkrli siyasət elmi ilə dolu başına....  Doyunca yanacaq, odlanacaq, zəqqum içəcək... Sonra həmin göydələnləri yenidən qurub bir də təzədən uçurdacaqlar başına... Beləcə sonsuza qədər... Yazıq Buş...

***

Həmişə demişik, yenə də deyirik: insanın dünyəvi vəzifəsi, rütbəsi, postu yüksəldikcə Allah dərgahında  onun yazıqlıq faizi də yüksəlir...

***

Vəzifəli şəxslərin çoxu özündən aşağıdakılara zəif, yazıq kimi baxır. Bəziləri hətta zəiflərə, kasıblara istehza edir, onları  var-güclərilə əzməyə, tapdamağa çalışır... Bundan ləzzət alırlar... Amma bu bədbəxtlər dərk etmirlər ki, ən yazıq özləridir... Çünki Yaradan qarşısında yalnız özlərinə deyil, neçə-neçə insanın taleyinə, yaşamına, haqqının qorunmasına məsuldurlar. Və əgər həmin məsuliyyətin öhdəsindən gələ bilmirlərsə və kürsülərində əyləşməkdə davam edirlərsə,  günaha batırlar.  Ən betəri də odur ki, nəinki vəzifələrini icra etməyələr, əksinə, tabeliklərində olan digər məmurların və talelərinə məsul olduqları vətəndaşların haqqını tapdayalar, rüşvət, sələm girdabına yuvarlanalar... Onda  günahları minə bir artır və yazıqların yazığına çevrilirlər...

***

Kimin əsl yazıq, bədbəxt olduğunu bilmək üçün bu dünyanın vəzifəlisinə də, vəzifəsizinə də, varlısına da, kasıbına da o dünyadan baxmaq gərəkdir. Görək, kimlərin günah qazanmaq üçün imkan və  şansları daha çoxdur. Təbii ki, vəzifəli və varlıların. Vəzifələri, var-dövlətləri böyüdükcə günah etmək şansları da çoxalır. Dindən-imandan uzaq  vəzifəli və varlıların çoxunun ağlı kəsmir ki,  daha çox haram pul qazandıqca, haram qazancları ilə daha çox yeyib-içib qarınlarını doldurduqca nəfs tuluğuna dönərək “n” sayda günah da qazanırlar....  Bir də ayılırlar ki, içdikləri, satdıqları çaxır burunlarından gəlib, tuluqlarını batırıb... Bu, hələ bu dünyadadır... Belələrinin çoxu o dünyada ayılır... Axirət günündə - Allahın Haqq məhkəməsinin qarşısında... Amma daha orada rüşvət-filan keçməyəcək. Bu  HAQQ MƏHKƏMƏSİNDƏ mal-mülk deklarasıyasını gizlətmək mümkün olmayacaq... Nəyin var, bir-bir sayıb burnundan gətirəcəklər... MTN-nin, Beynəlxalq Bankın məhkəmələr seriyası o MƏHKƏMƏLƏRİN yanında bir zərrə də deyil...  

***

İndi, Allaha, Qurana az-çox inanırsınızsa, özünüz düşünün, dədə Buşun o dünyada hansı hala düşəcəyini... Hələ oğlu Buş ondan da yazıq günə qalacaq. Elə yalnız İraqda müsəlmanlara qarşı törətdikləri kifayətdir. Dədəsi bünövrəsini qoyduğu işləri bu Hitlerdən betər məxluq “uğur”la tamamladı, 11 sentyabr Əfqanıstan və s. hamısı onun vicdanındadır... Obama, indiki Tramp da onlar kimi...  Qorbaçov, Yeltsin, Putin də...

***

ABŞ, keçmiş SSRİ və Rusiya liderləri dünyanın ən yazıq adamlarıdır. Çünki bütün planetdəki proseslərə, müxtəlif ölkələrə, xalqlara qarşı törətdikləri cinayətlərə cavabdehdirlər. Milyardlarla insana qarşı etdikləri günahlar və onların şeytani siyasəti, sümürgəçilikləri ucbatından yoxsul gündə yaşayan, qaçqın düşən və bir qarın çörək, bir içim su üçün də cinayət törətməyə məcbur olan adamların da günahları onlara yüklənəcək... Eləcə də Britaniya, Fransa, Çin, Almaniyanın liderləri də belə günahkar yazıqlar sırasındadır...

***

O dünyadan  bu dünyanın super dövlətlərinin liderləri, həmçinin, onların arxasında duran transmilli super oliqarxlar və ayrı-ayrı ölkələrdəki mikro oliqarxlar, mikro başçılara baxanda bu həyatdan şərdən, pislikdən, günahdan başqa heç nə apara bilmədikləri üçün yazığım gəlir  onlara və “ümid”lə deyirəm: “O boyda ABŞ-ın dədə Buşu  o dünyaya əliboş, amma, siz əlinizi daha bərk sıxın, bəlkə gedəndə nəsə apara bildiniz?..”

***

Hərdən dost-tanış məclisdə-filanda bəndənizə yüksək vəzifə-filan arzulayanda  cavab verirəm ki, xahiş edirəm, mənə qarğış etməyin...