Çox hörmət bəslədiyim sayğıdəyər Mustafa Hacıbəyli bizim "Siz heç AB-ABD-nin Şərq ölkələrində demokratiya yaratdığını gördünüzmü?" başlıqlı yazımıza münasibət bildirmişdir. 

İlk öncə qeyd edim ki, Ə.Elçibəy hakimiyyəti devrildikdən sonra, heç vaxt əqidəmi və siyasi düşərgəmi tərk etməmişəm. Sadəcə təmsil olunduğum partiyadan getmişəm. Eyni zamanda, zaman zaman siyasi düşərgəm içində siyasi düşüncələrin və fikirlərin dəyişildiyini də görmüşəm və bunu təbii qəbul edirəm, lakin əsla dəstəkləmirəm. Beləki, təmsil olunduğum düşərgə Məxməri inqilabların çəhrayı köynəyini əyninə geyindiyi çağlardan, Azərbaycanın Avroatlantik məkana inteqrasiya olunması stratejisini hayqırdığı çağlardan içimdə bir qopuqluq yaranıb. Mən AB-ABD-nin ixrac etdiyi Məxməri inqilabların çəhrayı köynəyini əsla geyinmərəm və bunu özümə həqarət bilirəm. Mən öz milli köynəyimizi geyinməyin tərəfdarıyam. Deyəcəksiniz ki, milli köynəyin obrazladığı milli siyasi strategiya. ənənə hanı. Mən də cavab verəcəyəm ki, O tarixin dərinliklərində və mənim ruhumda, vicdanımda yatır. Mənim amacım Azərbaycanı Qərbin periferiyasına sürükləyən siyasətlərə,Qərb şüarlarına qarşı, Qərbin və Rusiyanın alternativi olan , öz siyasi şüarları və stratejisi olan Azərbaycan qurmaqdır. Lap elə Səfəvilərdə olduğu kimi, Osmanlılarda olduğu kimi. Mənim düşərgəmin, Ə.Elçibəy siyasi düşərgəsinin son illərdə sərgilədiyi aşırı AB-ABD yanlısı siyasət mənimlə düşərğəm arasında məsafələrin açılmasına səbəb olmaqdadır. Bundan çox üzgünəm. Yeri gəlmişkən, bu mövzumuza aid olmasa da qey etməliyəm ki, biz siyasətdə prinsipləri və ideyaları müdafiə edirik. Biz indi düşərgəmizdə dəb olan şəxsiyyətlərin və liderlərin arxasınca getmək ənənəsinə arxa çeviririk. Düşərgəmizdə siyasət prinsiplərdən daha çox şəxsiyyətlər ətrafında formalaşmışdır və bu da çoxlu bölünmələrə yol açmışdır. Biz şəxsiyyətlərə yox ideyalara təzim edirik.

Mən Azərbaycanın birmənalı olaraq nə Rusiyanın təmsil etdiyi KTMT, Avrasiya blokuna, Nə də AB-ABD-nin təmsil etdiyi qurumlara üzv olmasını dəstəkləmirəm. Azərbaycan nə Qərbin, nə Rusiyanın əyaləti, forpostu, periferiyası olmamalıdır və Azərbaycanın sivilizasion identifikasiyası da bunu istisna edir. Bizim şüarımız belədir. Nə Qərb,Nə Rusiya. Türk birliyi. Azərbaycan mərkəzli Qafqaz, Azərbaycan mərkəzli Turan. Azərbaycan mərkəzli İslam.Azərbaycan mərkəzli Avrasiya. Azərbaycan mərkəzli dünya. Bunlar indi xəyal, gələcəkdə isə gerçək ola bilər. İndi siyasətləri maliyyə və iqtisadi-texnoloji-hərbi güc müəyyənləşdirir, 50 ildən sonra isə, ruh, düşüncə, əxlaq, mənəviyyat, mədəniyyət və sivilizasiya identifikasiyaları müəyyənləşdirəcək. 

Subyektiv mülahizələrimə görə, İndiki siyasi şəraitdə ən yaxşı seçim balanslaşdırılmış siyasətdir. Lakin bununla yanaşı Azərbaycanın özünün regional bloklar qurmaq, Azərbaycan mərkəzli siyasi strategiyasını qurmaq siyasətləri də olmalıdır ki, İ.Əliyev rejimi hələlik bunu həyata keçirə bilmir. Hətta bu barədə heç düşünmək marağında da deyil. Əliyev rejimi siyasi düşüncələrin və fəlsəfələrin formalaşmasına, doğulmasına nəinki imkan vermir, marağında deyil, həm də siyasi fəlsəfələrin qatilidir. Siyasətçilərin və siyasi düşüncələrin doğulması diktator rejimlərini təhdid edən əsas faktordur.

Acınacaqlı haldır ki, mənim düşərgəm rejimə qarşı millətin şüarlarını yox, Qərbin şüarlarını səsləndirir. Acınacaqlı haldır ki, 30 ildir müxalifət AB-ABD-nin qərar və qətnamələrini Azərbaycanda müxalifətin böyük qələbəsi kimi təbliğ edir, bayram edir. Bütün bu təbliğatların, bayramların içində, başımı qaldırıb soruşuram. Dostlar, Azərbaycan Qərbin bir əyaləti, bir ştatıdırmı. Bu nə ruhdur, bu nə düşüncədir. Biz Rus imperiyasına qarşı azadlıq mübarizəsi aparan bir millətdən, ingilis-Qərb maraqlarını müdafiə edən bir millətəmi çevrilmişik?. Əvvəl Rus nökərləri idik, indi də Qərb nökərlərimi oluruq? Nə fərqi var ki, XX əsrin əvvəllərindən Yaxın və Orta Şərq, Uzaq Şərqin bir çox ölkələri, Afrika, Latın Amerikası ölkələrinin yarısı Rusiyanın, Yarısı da Avropanın müstəmləkələri idi. Son yüz ildə bütün milli azadlıq hərəkatları Rusiya və Qərb müstəmləkəçiliyinə qarşı aparılmayıbmı. Son yüz ildə bizim tariximiz budur. Son 500 ildə bütün planetdə hakim olan Qərb sivilizasiyasının iki fazası var. Avropa fazası, Amerika fazası. Qərb sivilizasiyasının hakim olduğu dünyada xalqlar və milli dövlətlər iki siyasi tale yaşamışlar. 1950-ci illərə qədər Qərb müstəmləkəçiliyi, 50-ci illərdən sonra da Rusiya və Avropa Periferiyaçılığı. Əziz Mustafa Hacıbəyli. Mən Azərbaycanı Qərb-Rusiya periferiyasına sürükləyən düşüncələrə qarşıyam. 50-ci illərdən etibarən dünya xalqları və dövlətləri -internasionalizm-sosializm proqramını qəbul edənlər Rusiyanın, liberalizm-demokratiya ideyasını qəbul edənlər Avropanın ətrafında cəmləşərək onların periferiyasına çevrilmişlər. Bu siyasət sanki indi də davam etdirilir. sadəcə başqa adlar və ideologiyalar adı altında. Nə isə.

Azərbaycanı Qərbin bir ştatı kimi təqdim edən müxalifətdən də uzağam, Azərbaycanı Rusiyanın bir əyalətinə çevirən iqtidardan da uzağam. Şəxsi qürurum daim pıçıldayır- Azərbaycanda Azərbaycan qanunları keçərli olsun. Zülmə, harınlığa, dövlət malını soyanlara qarşı mübarizə aparan Mehman kimi gənclərimiz çox olsun və onlar heç tutuqlanmasın da, əksinə belə gəncləri hakimiyyət, dövlət özü dəstəkləsin və əlbəttə ki, belə gəncləri şərləyib tutuqlayan bir hakimiyyətin, rejimin də Azərbaycan dövlətini idarə etməyə mənəvi haqqı yoxdur. Azərbaycan xalqı Azərbaycan xalqının, gənclərinin, ziyalılarının, müxalif yönümlü vətəndaşlarının düşməni olan bir rejimi əsla yaşatmamalıdır. 

Çox istərdim ki, Sayın Mustafa Hacıbəyli bir gün tutuqlansa, onu Qərb institutları yox, Azərbaycan xalqı və öldürülmüş ziyalı kütləsi müdafiə etsin. 

Azərbaycanda hakimiyyətləri , parlamenti, rejimləri dəyişmək qərarını Azərbaycan özü versin. Azərbaycan özü öz taleyini, müqəddaratını təyin etsin. Milli Azadlıq Hərəkatı zamanlarında olduğu kimi. Biz meydanlarda kükrəyən, siyasi baxımdan fəal olan, azad ruhlu millət görmək istəyirik. 

Heyf, Əliyev rejimi o milləti də, o milləti öz vicdanından doğuran ziyalıları, ziyalılığı da məhv etdi. 

Lakin dostlar dərin düşünün. Bunu həm öz maraqları üçün, həm də AB-ABD, Rusiya maraqları üçün etdi. Çünki bu millət bir gün ayağa qalxıb İranda Müsəddiq dövründə olduğu kimi Qərb ölkələrinə axıdılan neftin hesabını soruşa bilər, Qarabağı Erməni işğalından azad edə bilər, İrəvanda , Tehranda, Moskvada milli haqq-hesablarını çəkə bilər. Masaya milli maraq və milli iradəni təmsil edən proqramlar yatıra bilər.

Mustafa Hacıbəyli öz yazısında vurğulayır ki, Qərb ölkələri Mehman Hüseynovun azadlığını tələb etdiyi halda və mənim də həbs olunmağım gözləndiyi halda niyə məqalə məhz indi yazılmışdır. Həmçinin Mustafa Hacıbəyli məni Mehman Hüseynovu müdafiə etməməkdə qınamışdır.

1. İlk öncə qeyd etdim ki, Mən Mehman Hüseynovu müdafiə etmişəm. Öz facebook səhifəmdə.günlərlə təbliğat aparmışam. Mən Təkcə Mehman Hüseynovu yox, bütün siyasi dustaqlarımızı müdafiə edirəm. Bəli bu gün bizim hüquqlarımızı qorumaq üçün Avropa məhkəmələrinə müraciət etməkdən başqa yolumuz və çarəmiz qalmayıb. Azərbaycan müxalifətini və xalqını AB-ABD-nin qucağına itələyən İlham Əliyev hakimiyyətidir. 

2.Azərbaycan xalqına 30 ildir divan tutan, pozulmuş hüquqlarını müdafiə etmək üçün Azərbaycanda azad məhkəmə tapmayan və bu üzdən AB məhkəmələrinə üz tutan Azərbaycan vətəndaşlarında və xalqında AB-ABD-nin xilaskar obrazının yaradılmasında da günahkar İlham Əliyev hakimiyyətidir. İlham Əliyev hakimiyyəti Azərbaycan dövlətini Rusiyanın, Azərbaycan xalqını isə AB-ABD-nin qucağına itələməkdədir. Bu da Azərbaycanda dövlətlə millətin arasında çat yarandığını, qopuqluq olduğunu gözlər önünə sərir. Dövlət xalqın əlindən alınıb, xalqa qarşı işləyən, xalqa divan tutan mexanizmə çevrilib. Xalqla Dövlət arasında bu qopuqluq Azərbaycanı fəlakətə, üsyana, qana aparır. Biz bunu həmişə demişik, indi də deyirik. 

3. Mustafa Hacıbəyli diqqət etdinizsə məqalədə Şərqdə bütün diktatura rejimlərini Qərb qurmaqdadır yazmışam. Prezident və Parlament seçkilərində Avropa ölkələrindən gələn 2-ci, 3-cü dərəcəli müşahidəçilər və diplomatlar seçki qutularında saxta bülleteinlərin şəkillərini çəkib bir iki hesabat yaysalar belə, sonunda bu seçkinin nəticələrini tanıyırlar. Bəs niyə tanıyırlar?. Son 30 ildə Qərb ölkələri heç Azərbaycan xalqının iradəsini nəzərə alıbmı, hesablaşıbmı?. Saxta Seçkinin nəticələrini tanımaqla diktatura rejimini dəstəkləmirlərmi, qorumurlarmı?

4. Son 30 ildə AB-ABD-nin Azərbaycanın demokratik müxalifətinin mübarizəsini ciddi dəstəklədiyini görməmişəm. Dəstəkləsəydi, Azərbaycanda Əliyevlər rejimi, hakimiyyəti 30 ilə yaxın davam etməzdi.

5. AB-ABD saxta "Erməni soyqırımını" tanıyır. Qarabağın Ermənistana birləşdirilməsinə çalışır, Ermənistanı dini, siyasi, maliyyə baxımdan himayə edir, Qarabağdakı ermənilərin haqqını qoruyur, Ermənistan adlanan ölkədə yerli türklərin soyqırıma uğradılmasına, deportasiyasına göz yumur və səsini çıxarmır,Türkiyəni bölərək Kürdüstan dövləti qurmaq siyasəti yürüdür, Kərkükdə, Suriyada Türkmənlərin soyqırıma uğradılmasına susur və hətta bu cinayətlərdə iştirak edir.

6. Ə.Elçibəy hakimiyyətinin devrilməsində BP-nin iştirakı və Qərb "demokratiyasının", "demokratlarının" susmasını da hələ unutmamışıq. Necə ola bilər ki, İrina Lasotanın demokrat dediyi Ə.Elçibəy hakimiyyətinin devrilməsinə AB- ABD susdu və Əliyev hakimiyyətinin qurulmasına dəstək verdi. Niyə? Səbəbləri siz də bilirsiniz. Neft-enerji kontraktlarının Azərbaycanın yox, qərbin maraqlarına uyğun bağlanması məqsədilə. Elçibəy höküməti Qarabağın qeydsiz-şərtsiz işğaldan azad edilməsi uğrunda mübarizə aparırdı, işğal olunmuş torpaqların 58 faizi işğaldan azad edilmişdi bax buna görə bu hakimiyyətin devrilməsində AB-ABD susdu və həm də dolayısıyla iştirak etdi və bircə kəndi belə ala bilməyən Əliyevlər hakimiyyətinin qurulmasına şərait yaratdı.

7. Türk-Müsəlman-Şərq ölkələrinə qarşı Qərbin yeritdiyi ikili standartlar siyasəti bu ölkələrdə demokratiyanın, hüquqi dövlətin qurulmamasında əsas səbəblərdən biridir.

8. Son yüz ildə AB-ABD-nin strateji müttəfiqi olan Türkiyə Qərb modeli əsasında demokratik, hüquqi dövlət qurmuşdu. Bəs bu demokratik dövləti çöktürmək üçün Kürt kartını, etnik kartları istifadə edən AB-ABD deyilmi? Görürsünüzmü demokratik Türkiyə Qərbin çoxsaylı hücumları qarşısında yapayalnız. 

Faktlar o qədər çoxdur ki...Yazsaq kitab cildlərinə sığmaz. Və bütün bunları əlbəttə ki, siz də bilirsiniz. Bəs siz hansı faktlara əsaslanaraq , AB-ABD-ni müdafiə edirsiniz?. Müxalifəti Əliyevlər rejiminin qurbanına çevirən bu AB-ABD deyilmi. Biz heç vaxt siyasi düşüncələrimizi AB-nin bəyanatları, AŞ-nın qərarları əsasında qurmuruq, pərdə arxasında oynanılan siyasətlərə, bütün tarixə baxırıq, keçmişlə bu günü sintez edərək nəticələr çıxarırıq. Türk-Qacar və Osmanlı dövlətlərini-bizim dövlətlərimizi çöktürüb paramparça edənlər, Ermənistan, Fars-İran, kürdüstan quran bu ölkələr deyilmi?. Son 30 ildə yaxın orta Şərqdə radikal dini-etnik terrorist təşkilatlarını quranlar bunlar deyilmi?

9. Biz , Elilin-Yunan-Roma sivilizasiyasının iki varisinin- nə Rusiyanın internasionalizm-sosializm ideyalarına, nə də Qərbin liberalizm-demokratiya-insan haqları ideyalarına ölkəmizi və millətimizi peşkaş edə bilmərik. Rus internasionalizm-sosializmi Rus İmperializminin, AB-ABD-nin ixrac etdiyi demokratiya və insan haqları ideyaları da AB-ABD imperializminin araclarıdır. Bu gün Yer kürəsinin digər ölkələri bu iki imperialist güclərin siyasətindən, işğallarından və soyqırımlarından əziyyət çəkirlər.

10.Mustafa Hacıbəyli soruşur ki, niyə məhz indi Qərbin əleyhinə məqalə yayınlamışam. Dogrusu mən yazarkən heç zaman məqsədyönlü şəkildə zaman seçmirəm. Oxuduqlarım zamanı doğulmuş fikirlər toparlanır, cilalanır və anidən sistemli bir düşüncə halını alır. Biz də onu yazırıq, yayırıq. Yəni bu yazını Azərbaycan müxalifətinə mane olsun deyə məhz bu zamanda yaymaq fikirl ağlımdan belə keçməyib. Niyə öz düşərgəmə mane olum ki. Mən mane olmaq yox, subyektiv mülahizələrimi əsas alaraq səhv hesab etdiyim məsələləri, düşüncələri sizinlə paylaşıram. razilaşmadığım məsələləri müzakirəyə çıxarıram. Məncə bu da müxalifətə zərər gətirməz, əksinə bir anlıq durmağa, öz mübarizəsinə, yoluna nəzər salmağa köməklik edər.

11. Azərbaycanda hakimiyyət dəyişiklikləri nə Rusiyanın, İranın, nə də AB-ABD-nin iradəsi ilə yox, Azərbaycan xalqının, millətinin iradəsi ilə olmalıdır. Rusiyanın dəstəklədiyi güclər Rusiyanın, AB-ABD-nin dəstəklədiyi güclər AB-ABD maraqlarını qoruyacaqlar. Bəs bizim, Azərbaycanın maraqlarını kim qoruyacaq. Azərbaycanın maraqları Rusiyanın da, AB- ABD-nin də maraqlarından fərqli ola bilməzmi?.

12. Bu yazıları yazdığım zamanlarda Əsəd rejiminə qarşı mübarizə aparan Suriya müxalifətini düşünürəm. Azad, demokratik, unitar Suriyanı qurmaq üçün Qərb silahları və şüarları, zehniyyəti ilə silahlanmış müxalifət nümayəndələri indi hardadır. İndi onlar ərazisi və dövlət suverenliyi paramparça edilmiş Suriyanı yenidən bərpa etmək üçün 100 il çalışmalı olacaqlar. Suriyanı AB-ABD dağıtdı, böldü diktator Əsəd rejimini yıxıb, demokratik Suriya höküməti qurmaq adı altında.... Mən Azərbaycanda Suriya olaylarının təkrar olacağından qorxuram.