“İran-Azərbaycan hərbi əməkdaşlığının inkişafı hər iki ölkənin marağına cavab verir”

İranın Baş Qərargah rəisi general Məhəmməd Baqqeunin Azərbaycana səfəri, bu səfər əsnasında ölkəmizin müdafiə naziri Zakir Həsənovla keçirdiyi görüşlər, bu görüşlər əsnasında hərbi əməkdaşlığın inkişafı ilə bağlı əldə edilən razılaşmalar son günlərin ən çox müzakirə edilən olaylarından biridir.

İranla hərbi əməkdaşlığın inkişafı ölkəmiz üçün nə dərəcədə zəruridir? Bu əməkdaşlıq Azərbaycanın hərbi potensialının inkişafı, eləcə də Qarabağ probleminin həlli baxımından ölkəmizə nə verə bilər?

Moderator.az-a açıqlama verən hərbi ekspert Şair Ramaldanov İranla hərbi əməkdaşlığın inkişafının ölkəmiz üçün müsbət nəticələr doğuracağını qeyd etdi:

“İran qonşu dövlətdir. İranla bizim sərhəddimiz var. İran islam ölkəsidir. Son iki ildir ki, İran-Azərbaycan hərbi əməkdaşlığında ciddi irəliləyişlər müşahidə olunmaqdadır. Əgər bu gün İranın hərbi rəhbərliyi bəyan edirsə ki, biz Qarabağla bağlı Azərbaycanın ərazi bütövlüyünü tanıyırıq, Qarabağ məsələsində Azərbaycanın mövqeyini dəstəkləyirik, bu, İranın ölkəmiz olan isti münasibətindən, habelə onunla əlaqələri genişləndirmək niyyətindən irəli gəlir.

Azərbaycanın beynəlxalq aləmdə nüfuzunun yüksəlməsi ölkə başımızın düzgün xarici siyasətinin nəticəsidir. Iran-Azərbaycan münasibətlərinin inkişafı da bu siyasətin təzahürüdür.

Azərbaycanın müdafiə naziri general-polkovnik Zakir Həsənov İran hərbi rəhbərliyi ilə iki dəfə görüşdü. Məyyən sənədlər imzalandı, müəyyən planların həyata keçirilməsi nəzərdə tutulur. Hesab edirəm ki, bu planların birgə həyata keçirilməsi fonunda iki ölkə arasında hərbi əməkdaşlıq daha da genişlənəcək.

İran zəif ölkə deyil. İran hərbi sənayesi olan, hərbi potensiala malik bir ölkədir. İran güclü ölkədir. Bu baxımdan İranla hərbi əlaqələrin genişlənməsi ölkəmizə ancaq xeyir gətirər. Bu əməkdaşlığın inkişafı hər iki ölkənin maraqlarına uyğundur”.

Seymur ƏLİYEV