Jurnalist Səxavət Məmmədli iddia edir ki, Türkiyə Azərbaycanda kritik situasiyaya hazırlıq istiqamətində perspektiv siyasi dəyişiklik etmək məqsədilə müəyyən qabaqlayıcı addımlar atır. 

Milliyətçi Hərəkət Partiyası (MHP) artıq dəstəklədiyi namizədin kimliyinə də aydınlıq gətirib. Yanvarın 27-sində MHP başqanı Devlet Bahçelinin dəvəti ilə təşkil edilmiş ziyafətdə namizəd Aqil Səmədbəyli namizəd təqdim olunub. Jurnalist onu da iddia edir ki, A.Səmədbəyliyə digər xüsusiyyətləri ilə yanaşı, Elçibəy ailəsinə yaxın olduğu üçün üstünlük verilib. 

Moderator.az bu iddialara aydınlıq gətirmək məqsədilə Aqil Səmədbəyli ilə əlaqə saxlayıb. O, internet üzərindən suallarımızı cavablandırıb.

- Əvvəla onu deyim ki, bir insanın Prezidentliyə hazırlanması üçün onun özündə bir keyfiyyət olmalıdır. Atalar yaxşı deyib: “Quyuya su tökməklə quyu sulu olmaz, gərək quyunun özündən su çıxsın ki, suyu qurumasın”. Mənim ailəm, çox şükürlər olsun ki, həm ata, həm də ana tərəfdən şərəfli soy-kökə mənsubdur. Atam Həbib Yusif oğlu Səmədov Göyçə mahalının sayılıb seçilən ziyalılarından olub. Xəlil Rza, Aşıq Ədalət, Zəlimxan Yaqub ilə, Hüseyn Arif (bizim evdə qonaq olublar) ilə, eləcə də yüzlərlə ziyalı ilə yaxın olub. Zərkənd orta məktəbinə 35 il direktorluq edib. Kəndimizdən yüzdən çox alim yetişib. Hamısı da Həbib müəllimə rəhmət oxuyurlar. Ana babam Xəstə Bayraməli el şairi olub. Rəhmətlik anam onun kitabındakı şeirlərin hamısını əzbər bilirdi. Dayım Maşallah Xudubəylinin hazırladığı 70-ə yaxın veriliş Qızıl Fondda saxlanılır. Böyük qardaşım Arzu Səmədbəylinin siyasi fəaliyyəti göz önündədir. Özüm orta məktəbi Göyçədə oxumuşam. Üç il Politexnik İnstitutunda Maşınqayırma fakültəsində təhsil almışam. 1989-91-də AXC lideri Əbülfəz Elçi Bəyin mühafizəçisi olmuşam. Eyni zamanda İnstitutdan AXC Məclisinə əlaqəçi seçilmişəm. 

1991-də Türkiyəyə olan sevgimdən ötrü hər şeyi atıb burda təhsil almağa gəlmişəm. Mərmərə Universiteti İqtisadi İdarəetmə Bilimlər fakültəsində oxumuşam. 1994-cü ildə ''ELÇİ BƏY və AZƏRBAYCAN'' adlı ilk kitabım İstanbulda yayınlanıb. Bu kitabı çapa verib Azərbaycana getdim. Məni həbs edə bilərdilər deyə, Bəyin dostu, vəkil Reşit Şaşıhüseyinoğlu adımı kitabda Akın Sametoğlu olaraq dəyişdirmişdi. 

1995-ci ildə “Liderlik'' adlı ikinci kitabım İstanbulda çap edildi. 1996-da Mərmərə Universitetində ''Yönetim ve Orqanizasyon'' ixtisası üzrə yüksək lisans təhsilinə başladım. ''Yönetici Deyerleri'' mövzusunda müdafiəmi uğurla tamamladım. 1992-də bütün Türk Dövlət və toplumlarının gənclərinin təmsil olunduğu ''Genc Türk Temsilçileri Konseyi''nin qurucularından biri  və Baş katibi oldum. 

1996-da Azərbaycandan gəlib Türkiyədə təhsil alan 2000 tələbəni təşkilatlandıraraq ''Gənc Aydınlar Hərəkatı” adlı təşkilat qurduq. Mən bu təşkilatın rəhbəri seçildim. 1999-da Azərbaycana qayıtdım. Elə həmin il ailə qurdum. 2000-ci il Parlament seçkilərində Azərbaycan üzrə birinciliklə millət vəkili seçildim. Ancaq şərtləri qəbul etmədiyim üçün seçkinin nəticəsini ləğv etdilər... 

Qısacası, tələbə yoldaşlarım yaxşı bilirlər ki, mən hələ tələbə olan zamanlardan özümü Azərbaycanın problemlərinin həllinə həsr etmiş şəxsəm. Hər bir Azərbaycan vətəndaşı kimi mənim də belə bir haqqım var. 

Təvazökarlıqdan uzaq da olsa, deməliyəm ki, bu barədə özümə çox güvənirəm. İnanıram ki, Azərbaycanın itirilmiş torpaqlarını işğaldan azad etmək üçün əzmim, iradəm və cəsarətim var. İnanıram ki, cəmi 5 il içində Azərbaycanı bölgədə qabaqcıl dövlətə çevirəcək komandam var. Xalqımızın özünə güvənini və zədələnmiş mənəviyyatımızı tam bərpa edəcəyik. 

 - 1991-ci ildən, İstanbulda Atatürk Tələbə Yataqxanasında qalan zamandan MHP cəbhəsi ilə sıx əlaqəm yaranıb. Bu əlaqə zamanla yaxın dostluğa çevrilib. İndi MHP rəhbərliyində çox yaxın dostlarım var. Başqa partiyalarda da dostlarım var, ancaq say etibarilə ən çox MHP-dədir. MHP-nin də dərdi Türk Dünyasıdır. Zaman-zaman dostlarımla bir araya gəlib, Türk dünyasının problemlərini müzakirə edirik. MHP Azərbaycanın, eləcə də digər Türk Dövlətlərinin əleyhinə olan heç bir addım atmaz və atılmasına da icazə verməz. Bu baxımdan, görüşlərimizdən kimsə narahat olmasın. Bütün görüşlərimiz ancaq Azərbaycanın xeyri üçündür.

- Rusiya indi daha çox siyasi hakimiyyət üzərində təsirlidir. Xalqımızın bu ölkə ilə bağlı kifayət qədər məlumatı var. Türkiyə ilə Rusiyanın münasibətinin yaxşı olması həm Azərbaycan, həm də bölgə üçün faydalıdır. Ermənilər də bu yaxınlıqdan çox narahatdırlar. Bizim Rusiyaya qarşı heç bir ərazi iddiamız yoxdur, baxmayaraq ki, tarixi torpaqlarımızın bir hissəsi indi Rusiya sərhədləri içindədir.

- Mübariz Mənsimovla şəxsi tanışlığım yoxdur. Sadəcə “Facebook” səhifəmdə M.Ə.Rəsulzadə, E.ELÇİ bəy və Mübariz İbrahimov adına gəmilərə görə ona təşəkkür etmişəm. 

- İsgəndər bəylə münasibətimin tarixi kökü var. Onun atası Məcid kişi ilə babam Yusif kişi dost olublar. Mən özüm də milli dəyərlərə önəm verən biri olaraq bu dostluğun davam etdirilməsinin vacib olduğuna inanıram. Biz bir-birimizə müraciət edəndə “əmioğlu” deyirik. 

- Bu günə qədər heç bir siyasi partiyanın üzvü olmamışam. Bir inancım olub: torpaqları işğal altında, qız gəlini düşmən əlində olan bir ölkənin partiyalara bölünməyə haqqı yoxdur! Biz bir Xalq olaraq tək partiya-tək ordu olmalı, torpaqlarımızı işğaldan azad etməliyik! Yalnız bundan sonra siyasi partiyaların fəaliyyəti faydalı olar. 

- Azərbaycanda mövcud rejimin dəyişməsində maraqlı olan heç kimi rəqib kimi görmürəm. Onları müttəfiqim olaraq görürəm. 

- Əsas dəstəyim hakimiyyətin içində olan milli güclər və xalqımızın siyasiləşməmiş kəsimidir. Bir də, Rəsulzadə-Elçi Bəy yolunun səmimi yolçuları. Aydınlar içində də ciddi bir tərəfdar təbəqə var. 

Xalqımızın ruhuna inanıram, güvənirəm. Meydana çıxanda dəstək verəcəklərini bilirəm.

- Çilənay xanım mənə Tanrının hədiyyəsidir. Onun möhtəşəm öncədən hiss etmə qabiliyyəti, məlumatlı olması, Vətən eşqiylə çırpınan gözəl ürəyi var. Siyasəti mükəmməl analiz edir. Mən çox vaxt onunla məsləhətləşirəm. Çünki onun sağlam məntiqinə güvənirəm. Hələlik siyasətlə deyil, elmlə məşğuldur. Ancaq səmimi deyirəm, o, siyasətə başlamağa qərar versə, məmnuniyyətlə onu dəstəkləyərəm. Bu, Azərbaycan üçün ancaq və ancaq uğur gətirər. Ondakı fitri istedaddır. İnanıram ki, elmdə də özünəməxsus iz qoyacaq! Hələlik isə siyasətə başlamaq barədə qərar verməyib.  

- Ərturqut bəy bu günə qədər siyasətlə məşğul olmaq istəməyib. Mən də vaxtında çox istəyirdim ki, o da siyasətə gəlsin, gəncliyə öndərlik etsin. Ancaq o, siyasətdən uzaq durdu. Bundan sonrasını da özü bilər.