Fevralın 14 - də ölkənin ikinci paytaxtına səfəri zamanı şəhər sakinləri ilə gözlənilməz görüş keçirən və hamıda xoş təəssürat yaradan birinci vitse prezident Mehriban xanım Əliyevanın həmsöhbət olduğu gənclərdən biri, Almaniyanın nüfuzlu Freie Universitetinin doktorantı, biologiya elmləri üzrə fəlsəfə doktoru, Azərbaycan Milli Elmlər Akademiyası, Botanika İnstitutunun keçmiş əməkdaşı, Aqrar Universitetin elm şöbəsinin elmi işçisi Tural Paşa oğlu Qasımov olub. 

Moderator.az-ın əməkdaşı onun görüş təəssüratını öyrənib:

"14 fevral hər kəsin həyatında bir cür qaldı, mənim isə heç bir zaman yaddaşımdan silinməyəcək xoş bir tanışlıq tarixi kimi. Günorta saat 13 radələri idi, nahar fasiləmin bitməsinə hələ 30 dəq qalmışdı. Çalışdığım Aqrar Universitet Xan bağının yaxınlığında yerləşdiyindən bağda bir az gəzişib təmiz hava almaq daha sonra isə işimə davam etməyi qərara aldım. Bir az gəzişdim və skamyaların birində oturub anamla telefonla danışırdım. Birdən parkda olan insanların irəliyə doğru hərəkətini gördüm. Sağ tərəfə baxdığımda Ölkəmizin birinci vitse-prezidenti Mehriban Əliyeva, Heydər Əliyev fondunun vitse-prezidenti Leyla Əliyevanı və Gəncə şəhər icra başçısı Niyazi Bayramovu gördüm. Həm təəccübləndim, həm də bilmirəm necə deyim, çox xoş hisslər yarandı. Çünki, bu şəxslərin mənə bu qədər yaxın məsafədə olduğunu ilk dəfə görürdüm. Tez ayağa qalxıb insanların onları əhatə elədiyi yerə gəldim. Hər kəs onları görməkdə çox sevinirdi. Kimisi birinci xanıma öz problemlərini çatdırır, kimisi həll edilmiş problemlərinə görə təşəkkürünü bildirirdi. Mehriban xanım isə hər kəsi diqqətlə və sonadək dinləyirdi. 

Mən ilkin olaraq Mehriban xanımdan bir az kənarda dayanmış Leyla xanımı salamladım, özümü xaricdə təhsil almış gənc bioloq, botanik alim kimi təqdim etdim. Leyla xanım bildirdi ki, o bitkiləri çox sevir, təbiətin vurğunu və heyranıdır. Mən isə öz növbəmdə bir botanik kimi hər şeyin başlanğıcının məhz bitkilər olduğunu və bütün canlıların qida zəncirində bitkilərdən asılı olduğunu, bitkilərin hər bir növünün mühafizəsinin mütləq olduğunu dedim. Söhbət əsnasında ətraf mühitlə bağlı fikirləşdiyim layihənin mövzusunu Leyla xanıma bildirdim. Çünki Leyla xanım IDEA İctimai Birliyinə rəhbərlik edir. Bu cür işlər məhz həmin təşkilat tərəfindən dəstəklənir. Leyla xanım ideyamı çox bəyəndiyini və bu işin tezliklə həyata keçiriləcəyinin zəruriliyini dedi və öz köməkçisinə mənim əlaqə vasitələrimi qeyd etməyi tapşırdı. Köməkçi mənim ad soyad və əlaqə nömrəmi öz dəftərində qeyd etdi. Bir neçə gündür səbrsizliklə məni arayıb ideyamla daha yaxından maraqlanaclarını gözləyirəm. Çünki, əgər bu ideyamı reallaşdıra bilsəm, bu Azərbaycan və dünya florası üçün Leyla xanımın dəstəyi ilə çox böyük bir yenilik olar (Layihə barədə geniş demək istəmirəm, çünki bu mənə məxsus yeni bir ideyadır). Hər kəs kimi sonda məndə gülərüz və mehriban Leyla xanımla bir selfi şəkli çəkdirdim.

Daha sonra isə ölkəmizin birinci vitse-prezidenti Mehriban xanım Əliyevanı salamladım, özümü Almaniyanın Fray Universitetində doktorantura təhsili almış bir gənc kimi təqdim edərək, hazırda Gəncədə Aqrar Universitetin elm şöbəsində elmi işçi kimi çalışdığımı və Universitetimizin  rektoru İbrahim müəllimin gənclərə hərtərəfli qayğısını diqqətə çatdıraraq, 2007-2015-ci illərdə Azərbaycan gənclərinin xarici ölkələrdə təhsili üzrə Dövlət proqramının təqaüdçüsü kimi Ölkə rəhbərimiz Ali Baş Komandan cənab İlham Əliyevə gənclər adından və öz adımdan təşəkkürümü bildirdim. Mehriban xanım isə mənim təşəkkürümün cənab prezidentə çatdıracağını bildirdi.

Bir gənc alim kimi özümdə çox böyük qürur hissi duyuram ki, Ölkəmizin birinci vitse-prezidenti Mehriban Əliyeva və Heydər Əliyev fondunun vitse-prezidenti Leyla Əliyeva ilə qısa zaman kəsiyində səmimi söhbət apara bildim və müəyyən fikirlərimi çatdırdım. Bu cür görüşlərin davamınlı olmasını və bir gün eyni təsadüflə Prezidentimiz İlham Əliyevlə görüşəcəyimə ümid edirəm.

Ən böyük arzularımdan biri bir gənc alim kimi Ölkəmizdə eləcə də xaricdə qazanmış olduğum bilikləri, yenilikləri növbəti gənc nəslə çatdımaq, tətbiq etmək və Azərbaycanın Təhsil sistemində aparıcı vəzifələrdən birini tutmaqdır. Çünki, bu ulu Öndərin biz gənclərə tapşırığıdır və hər bir gənc gələcək həyat yollarında bu tapşırığı özünə amal seçməlidir. Uzaqgörən siyasətçi Heydər Əliyev hələ illər əvvəl Azərbaycan gənclərinə inanırdı və O, 1998-ci il ölkə gəncləri ilə görüşündə bunu dilə gətirərək demişdi: “Əziz övladlar! Sizin kimi gəncləri olan, gələcəyi olan Azərbaycan basılmazdır, sarsılmazdır! Məni hədsiz sevindirən odur ki, Azərbaycanın gələcəyini möhkəm əllərdə saxlaya bilən, Azərbaycanı daim bütün bəlalardan qoruya bilən, Azərbaycanın dövlət müstəqilliyini, demokratik dövlətini qoruya bilən gəncliyi var. Bunlar sizlərsiniz, əziz övladlar!