“İndi Azərbaycanda nəinki televiziyanı, heç saytı da bağlamaq olmur. O mənada deyirəm ki, televiziyalarımız cərimə olunarlarsa, özlərini yığışdırarlar”

Bunu Moderator.az-a açıqlamasında millət vəkili, yazıçı Aqil Abbas “Space” kanalının məhkəmə tərəfindən 6 min cərimə olunmasına münasibət bildirərkən deyib. A.Abbas bildirib ki, bu təcrübə dünya ölkələrində də var:

“Bununla bağlı parlamentdə də çıxış etmişəm və təbii ki, televiziyalar müəyyən məsələlərə görə cərimə olunmalıdırlar. Amma bununla bağlı Rusiyada, Türkiyədə və bütün sivil ölkələrdə qanunlar var. Onlardan biri də budur ki, əgər müəyyən bir verilişə görə televiziya cəzalandırılıbsa, kanalın yayımı zamanı ekranın qırağında bununla bağlı qara yazılı məlumat yerləşdirilir. Bu təcrübə Türkiyədə tez-tez olur. Əgər hansısa telekanalın cəza olaraq bir günlük yayımını dayandırsalar, bu daha effektli olur. Bunu demişdim, amma başqa formada təqdim edib məni televiziyalarla düşmən etmək istədilər. Dedilər ki, “Aqil Abbas deyir ki, televiziyalar qapadılsın”. Amma məhkəmədən başqa heç kəs televiziyaları qapada bilməz. İndi Azərbaycanda nəinki televiziyanı, heç saytı da bağlamaq olmur. O mənada deyirəm ki, televiziyalarımız cərimə olunarlarsa, özlərini yığışdırarlar. Özəl kanalların üstünə çox gedirik, amma onu da demək lazımdır ki, bunlar maliyyələşmir və məcburdular ki, reytinq xatirinə müəyyən verilişlərin dalınca qaçsınlar ki, onlara reklam versinlər. Amma reklam xatirinə elə verilişlər var ki, onların arxasınca getmək olmaz”. 

Yazıçı deyib ki, bəzən pərdəarxası kadrları saytlara verməklə televiziyalar özlərinə minus qazandırır:

“Bu günlərdə bir yazı yazmışdım. Vaqif Cəbrayılzadə şeirində deyir ki, “Alınmaz vətənin bir qarış torpağı, içindən satan olmasa...”. İndi televiziyanın öz işçiləri öz kanallarını pis vəziyyətə qoyurlar. Məsələn, televiziyada pərdəarxası olan sözləri sonradan çıxarıb saytlarda yayırlar və buna da rəhbərlik nəzarət edə bilmir. Belə çıxır ki, bunları özləri öz içlərindən satırlar. Yadınızdadırsa, Aşıq Ədalət reklam fasiləsində əsəbiləşib bir söz demişdi. Azərbaycanda Aşıq Ədalətdən böyük sənət adamı yox idi, xəstə adamı bir az da çıxılmaz vəziyyətə salmağa çalışdılar. O, sözü canlı efirdə deməmişdi axı. Televiziyalar cəzalanmaqla özləri-özlərini gözdən salırlar. Bütün televiziyalarda canlı yayımlar 3-5 dəqiqə gecikməylə gedir. Yəni bir artıq söz deyilsə, onu dərhal çıxara bilirlər. Niyə bu cür hadisələr AzTV-də, İctimai və Mədəniyyət kanalında olmur? Sizə səmimi deyim ki, xəbərlər olanda Real TV-ə və bir də Mədəniyyətlə, İctimai kanala baxıram. Debat - filan da olanda isə AzTV-ə baxıram. Mədəniyyət kanalı çox baxımlı kanaldır. 

Bir dəfə “Space” kanalının “Space” olan vaxtları idi və onda Həmid Herisçiylə həyat yoldaşı bir veriliş aparırdı. Mən, Sabir Rüstəmxanlı və  Nəriman Qasımzadə verilişdə ziyalılıqdan, filandan danışırdıq. Onda birdən dedim ki, biz özümüzü niyə öldürürük? Bu dəqiqə bizə yalnız ziyalılar baxır və onlar bizdən daha gözəl ziyalıdırlar. Biz onlara nə dərs verəcəyik? Qeyriləri digər kanallarda ancaq sarsaq şeylərə baxırlar. Bu gün Mədəniyyət kanalını izləyən ancaq ziyalı təbəqədir. Özü də hər gün gözəl verilişlər hazırlayırlar. Yaddan çıxmış, kimsəsiz şairləri tapıb haqqında verilişlər çəkirlər. Buna görə Mədəniyyət kanalına beş düşür. O cümlədən də İctimai kanalda İsmayıl Ömərov əvvəldən necə ənənə qoyubsa, çox gözəl şəkildə öz yoluyla gedir və indi də Balaş Qasımov bura bir az da yenilik gətirir”.