Bədii Şuralar televiziya kanallarımızda ictimai nəzarəti gücləndirmək və efirdə saf-çürük işini həyata keçirəmək məqsədilə yaradılır. İlk olaraq, bu ilin fevral ayının 6-da “Azərbaycan Televiziya və Radio Verilişləri” QSC-nin nəzdində bir qrup tanınmış mədəniyyət və incəsənət xadiminin daxil olduğu Bədii Şura yaradıldı. Beləliklə, artıq həmin gündən dövlət televiziyasınsa şura tam fəaliyyət göstərir. Bəs, tanınmış şəxslərdən ibarət olan Bədii Şura bu gün öz işini lazımı şəkildə görə bilirmi və hansı qərarlar qəbul edilib?

Az TV-nin Bədii Şurasının üzvü, Xalq artisti, Faiq Sücəddinov Moderator.az-a   açıqlamasında bu istiqamətdə müəyyən işlərin görüldüyünü qeyd edir:

“Biz demək olar, 3 aydan çox müddətdir ki, Rövşən Məmmədovun sədrliyi ilə-Bədii Şura olaraq artıq formalaşmışıq. Bədii Şurada 10 nəfər adam var, biz görüşlər təyin edirik və bunların birində Rövşən müəllim çox gözəl bir söz dedi: “Mənə müsbət şeylər yox, nöqsanları deyin”. 

Təbii ki, nöqsanlar çox idi. Məsələn, konsertlər olanda işıq məsələsi, rejissorun öz baxışı, onun fon tərəfi və belə incə ancaq çox peşəkar şeylər barədə orda öz fikirlərimizi söyləyirik. Hər hansı bir işi kim aparırsa, onu nöqsanlarını özünə deyirik, məsələn,  müğənninin paltarı o mahnıya uyğun deyildi və s. kimi xırda məsələlər...

 Az TV Azərbaycan televiziya məkanında bir mayak, işıqdı ki, başqa kanallar da işlərini ona uyğun qurmalıdırlar. Mən bunu ona görə deyirəm ki, son zamanlar Azərbaycan Dövlət Televiziyası və Mədəniyyət kanalı tamamilə öz simasını dəyişib, yaxşılığa doğru gedib. Bəzi adamlar deyir ki, televiziya sahəsində nəyi və haradan öyrənək? Bu sözü deyən adamlar  indiki Azərbaycan televiziyasını izləsinlər və görsünlər ki, Az TV həmin Az TV deyil. Məsələn, mən təklif etdim ki, yeni alətlər,  səsyazma avadanlığı almaq lazımdı. 20-25 ildi Azərbaycan Televiziyasında Bədii Şura fəaliyyət göstərmirdi. 

AzTV-nin “Qızıl Fondu”nda 1990-cı ildən bu günə kimi çoxlu səs yazmalar yığılmışdı. Belə fikrə gəldik ki, onları  Bədii Şuraya təqdim etsinlər. Siz bilirsiniz ki, 1950-1960-cı illərdən qalan səs yazmaları böyük bəstəkarlar, böyük müğənnilərə aiddir və onlar böyük xəzinə, tarixdirlər. Bundan başqa, kimsə solist olmaq istəyir. 

Bəstəkar Bədii Şuranın həyata  keçirdiyi digər missiyanı isə konkret nümunə əsasında səsləndirir:

“Səidə adlı şuşalı bir qız  gəlmişdi, çox gözəl səsi, oxumaq tərzi və xarici görünüşü var. Biz hamımız yekun qərarla onu işə götürdük. 3 ay sınaq müddəti keçdikdən sonra  televiziyanın solisti olacaq. Həmçinin, biz bölgələrə gedirik: İsmayıllı, Gəncə, Şamaxıda olduq. Biz bunu nəyə görə etdik? Ona görə ki, insanların fikirlərini öyrənək. İnsanlar serialları  bəyənmirlər və deyirlər ki, Azərbaycanın ailə mədəniyyətini göstərmək lazımdır. Gözəl ssenarilər, gözəl tamaşalar olsun. Burada təbii ki, tariximizi əks etdirən tamaşalar da olacaq. Səhər verilişlərinə iradlar var idi və onlar dərhal dayandırıldı. Azərbaycan Dövlət Televiziyası sədri, "Mədəniyyət" kanalının müdiri, baş redaktorlar, müavinlər, radionun müavini  oturub, bu məsələləri dərhal həll edirlər”. 

Faiq Şücəddinov Şuranın  bundan sonrakı fəaliyyəti haqqında bunları deyir:

Yeni verilişlər haqqında düşünürük. Bəziləri hal-hazırda  hazırlanır da. Montaj və digər proseslərdən sonra efirə buraxılacaq. Biz onu da düşündük ki efirdə səsləndirilən  musiqi mütləq canlı olmalıdır. Həmçinin mən də  bir təklif irəli sürmüşəm. Məsələn, Baba Vəziroğlu folklor musiqisindən, aşıq musiqisindən, onun sözündən, tarixindən, daha sonra bir başqası isə geyimindən danışacaq. 

Baxın, "Mədəniyyət" kanalı 24 saat yüksək səviyyədə Azərbaycan mədəniyyətindən danışır. Mən özüm də son vaxtlar bu kanalları seyr edirəm və təklif edirəm ki, siz də Azərbaycan televiziyasını izləyəsiniz və öz fikrinizi söyləyəsiniz. Biz bütün fikirlərə, düzgün iradlara və onları düzəltməyə hazırıq”.

Az TV-nin Bədii Şurasının digər üzvü, Xalq artisti, xanəndə Mənsum İbrahimov da Moderator.az-a   açıqlamasında şuranın fəaliyyəti və gördüyü işlər barədə fikirlərini bildirib:

“Mən şuranın fəaliyyətini çox yüksək qiymətləndirirəm. Çünki burada yaradıcı insanların fikirləri ilə razılaşırlar, mötəbər insanlar orada olurlar və biz ayda 2 dəfə görüşürük, Azərbaycan televiziyasını müzakirə edirik, çatışan-çatışmayan cəhətlər barədə fikirlərimzi, iradlarımızı bildiririk. Bununla da bu günə qədər 16 yeni veriliş açılıb və artıq bir neçəsinin də layihəsi hazırdır. Özünüz də görürsünüz ki, Az TV-də bir yenilik baş verir. Təbii ki, Az TV illərdir mövcuddur və onun öz ənənəsi var. Biz bu ənənəyə sadiq qalaraq yeniliyi edirik. Mən həmişə bütün verilişlərdə nə qədər yenilik olsa da, milliliyin qorunub saxlanılmasının tərəfdarı olmuşam. Burada Azərbaycançılıq özünü göstərməlidir. O baxımdan  iclaslarımızı çox demokratik şəkildə keçiririk.  Sədr əvəzi Rövşən müəllim çox demokratik insandır, fikirlərimizə hörmətlə yanaşır və o fikirlər qeyd olunur, hamısı da demək olar ki, həyata keçirilir”.