Azərbaycan Demokrat Partiyası sədrinin birinci müavini, keçmiş hərbi həkim Həsrət Rüstəmov Silahlı Qüvvələrimizin bayram günündə Moderator.az-a düşüncələri əks olunmuş təbrik yazısı göndərib:

Azərbaycanda ordunun, silahlı qüvvələrin ərazilərimizi Rusiyanın açıq dəstəyi ilə işğal edən Ermənistan ordusundan güclü olması haqqında çox danışılır. Hakimiyyət təmsilçilərinin sonuncu bəyanatında məsələ kifayət qədər konkretləşdirildi. Deputat, hərbi xidmətdə olub olmadığı bilinməyən   S.Novruzov Erevanı almaq üçün üç gün lazım olduğunu göstərdi. Bunu əlbəttə ki, siyasi blef, metafora, düşmənə qarşı ideoloji hücum və daha nələrsə kimi adlandırmaq olar və zənnimcə bu əhəmiyyəti olmayan məsələdir. Məni isə məsələnin daha ciddi tərəfi düşündürür - görəsən ordumuz həqiqətənmi dövlətimizin təhlükəsizliyini qorumaq iqtidarındadırmı? Azərbaycan ordusu həqiqətənmi döyüş qabiliyyətinə və döyüş ruhuna, həmçinin təminatına və peşəkarlığına görə qonşulardan irəlidədirmi? Statistik və sxematik dolaşlıqlığa düşmədən bu suallara cavab axtarsaq görərik ki, deyilənlərin hamısı el dili ilə desək boğazdan yuxarı deyilmiş sözlərdir.

Ordunun qüdrətindən danışanlar öz yaxınlarını, övladlarını müxtəlif yollarla orduda xidmətdən yayındırırsa, ən azından cəbhədə, səngərdə deyil arxa- rahat bölmələrdə xidmət etməsini təmin edirsə ordunun gücündən danışanlara inanmaq olarmı?! Azərbaycan ordusunun düşmənlə təmas xəttində xidmət etmiş zabiti kimi dəqiq bilirəm ki, xidmət etdiyim dövrdə hətta orta səviyyəli bir vəzifəli məmurun, imkanlının balasına rast gəlmədim. Bu günə olan vəziyyətin daha da pis olması haqda da dəqiq məlumatlara malikəm.

Ordunun gücündən danışan vəzifəlilər, silahlı qüvvələrimizin həqiqətən də güclü olmasını istəyən öz əlləri ilə silahlı qüvvələri didib dağıdan korrupsiya məkanına çevirərmi?! Bu gün bütün vətəndaşlarımıza məlumdur ki, hərbi çağırışdan başlayaraq korrupsiya və rüşvət zənciri əsgərin xidmət etdiyi sonuncu günə kimi davam edir. Güclü ordu istəyən haramxorlar, Vətənə bundan böyük xəyanət olarmı?! Başqa yerlərdə rüşvət və korrupsiyaya bəlkə də dözmək olar, bəs ordu, bəs Vətənin müdafiəsi, bəs namus, bəs qeyrət?! Bunlar yalnız bəyanat vermək üçünmü lazımdır?!

Müstəqilliyin 23-cü ilində orduda köklü kadr dəyişikliyinə ehtiyac yaranırsa, Müdafiə sistemində əksər yüksək rütbəli məmurun birdən birə dəyişdirilməsi zərurəti yaranırsa və kadr təyinatlarında gah Rusiya, gah NATO  arasında ləngərləyiriksə, hansı gücdən, hansı qüdrətdən danışırıq cənablar?! Yeni müdafiə naziri xeyli müddətdir ki, iş başındadır, müsbət dəyişiklikləri, neqativlərin pozitivə keçməsini hiss edirsinizmi? Mən vəziyyətin heç də yaxşılaşmadığını, əksinə pisləşdiyini hiss edirəm.

Azərbaycanın ən kiçik məmurunun, bütün həyatının beş qəpiklik dəyəri olmayan insanların məlum və qeyri məlum mənbələr hesabına Bakıda çoxsaylı mənzilləri, bağ evləri, dəbdəbəli hayatı qarşılığında 20 il orduda xidmət etmiş zabitin evsiz olması, ailəsini kirayələrdə yaşatması bəlkə ordumuzun qüdrətini artıran amillərdəndir?!

Haqlı, haqsız əsgər, gizir, zabitləri ağlasığmaz müddətlərə həbs edən, hərbi prokurorluğu ordunun başına domokl qılıncı kimi asan, adamı olmayan, rüşvət verə bilməyən zabitləri adi bir səhvə görə sözün əsil mənasında bədbəxt edən hərbi məhkəmələri bu ordunun canına daraşdırmaqla gücləndirdiyinimi düşünürsünüz?!  

Qarabağ qazilərini, şəhid balalarını, təqaüddə olan əlil hərbçiləri düşünün, onlar da sizin kimi həyatlarından razıdırmı, hörmətli iqtidar mənsubları?!

Silahlı qüvvələr gününü bayram edirik, dostlara təbrik mesajları yazırıq. Yəqin ki, məni qınayanlar da olacaq ki, bayram günü ovqatı korlayan məsələlər haqqında danışmaq nəyə lazım idi. Bəli yazdıqlarım ürəkağrıdıcıdır. Amma bunlar dərdimizdir, ilk növbədə də ordudakı ləyaqətli, savadlı, cəsur zabitlərimizin dərdidir. Bu bayram təkcə rütbə almış, mənzil almış azsaylı bir qrupun bayramı deyil, bu həqiqi hərbi xidmətdə və ehtiyyatda olan bütün hərbi qulluqçuların bayramıdır. Azərbaycan ordusunda şəhid Mübariz İbrahimov kimi oğullar olub, var və həmişə olacaq. Bunu heç kim dana bilməz. Orduda inkişaf da var, ordumuz 20 il əvvəlki ordu deyil. Bu inkişafın əsasında da həmin ləyaqətli, vicdanlı və savadlı zabit, gizirlərimiz durur. Başqa cür desək, Azərbaycan ordusu ləyaqətli və vicdanlı insanımızın, zabitlərimizin çiynində durub. Ordudakı dərdlərimizi isə sağaltmağa çalışmasaq, yalnız qüsurları ört basdır edərək, təriflər yağdırmaqla məşğul olsaq güclü ordu arzu olaraq qalacaqdır.

P.S. Düşmənlə cəbhə xəttində, səngərdə, sığınacaqda xidmət edən əziz əsgərlərimizi - Vətənin mərd oğullarını, habelə bütün ləyaqətli, vicdanlı və cəsur hərbçilərimizi ordu günü münasibətilə ürəkdən təbrik edir, qələbə arzu edirəm.