Yeniyetmə yaşlarımda böyüklərimizdən tez tez məsləhət olaraq eşidirdim ki, insan gördüyü hər bir işə görə bu dünyada və o dünyada, niyə və nə üçün suallarına cavab verməyə hazır olmalıdır. O zamanlar mən bu sualların mahiyyətini anlamırdım. Ancaq zaman ötdükcə anladım...

22 il hərbi xidmətdə keçdiyim dövr ərzində bu suallara əsasən qurulmuş xidmətimin mənə çox faydası oldu. Gördüyüm hər bir işi bu suallara əsasən qururdum. 22 il ərzində çox prinsipial bir xidmət keçdim. Hər zaman doğru və ədalətli oldum. Ancaq heç bir vaxt prokurorluq orqanları ilə problemim olmadı. Belə ki, hər zaman qanunla işlədim və qanun keşikçisinin mənə verə biləcəyi “niyə” sualına mənim hər zaman cavabım var idi.

Hal hazırda mülki həyatdayam. İndi də eyni prinsiplə işləyirəm. Ancaq hazırda məni başqa bir məsələ düşündürür. Respublikanın ən kasıb aqrar rayonlarından birində bu sualların mahiyyətini anlaya və anlada bildilər, lakin dövlətin bir çox rəsmi strukturları bu sualların mahiyyətini bu günə dək anlaya bilmədi. Misal üçün, minlərlə hərbi qullquçu hal hazırda kirayyə mənzillərdə yaşayır. Lakin dövlətimizin büdcəsində kifayyət qədər vəsait var ki, bu insanları mənzillərlə təmin etsin. Bunun niyəsini kim və necə cavablaya bilər?

Köhnə İttifaqın məhşur marşallarından olan Jukov bir zamanlar yazırdı: “Kimsə döyüş ruhunun döyüşçüyə qalib gəlməkdə təsirinin silahın təsirindən az olduğunu sübut edə bilməz.“ Sadə dillə desək, ordunun qələbə qazanmasında silah sursat nə qədər rol oynayırsa, ruh yüksəkliyi bir o qədər rol oynayır.

Çox şükür ki, ordumuzun silah sursatla təminatı yüksək səviyyədə həyata keçirilir. Lakin silah sursat sədəcə dəmirdir. Bu dəmirə canı, ondan istifadə edən döyüşçü verir. Döyüşçü isə 20 il orduda qulluq etməsinə baxmayaraq öz ailəsi ilə birlikdə kirayyə mənzillərdə yaşayır. Bu zabitin bütün diqqəti bölməsinin döyüş qabiliyyətinin yüksəldilməsinə sərf edilməli olduğu halda, o kirayyə mənzildən qurtulmağın yollarını arayır. Allah eləməmiş 2-ci Qarabaq müharibəsində ordumuz gözlənilən uğuru qazana biməsə niyə suallarından biri də hərbi qulluqçuların sosial təminat məsələsi olacaq. Maraqlıdır bunun niyəsinə necə cavab veriləcək?!

İki oğul övladım var. Arzu edirdim ki, hər ikisi zabit olsun, vətənə qulluq etsin. Lakin övladlarım 22 il ordumuzda qüsursuz xidmət etməyimə baxmayaraq nədən öz mənzillərində deyil, kirayə mənzildə yaşadıqlarını məndən soruşurlar. Mən cəmi bir sualın qarşısında aciz qalaraq övladlarımı zabit olmağın doğru olmasına inandıra bilmirəm. Bəlkədə mənim günahım onlara verdiyim tərbiyədədir. Ancaq dövlət də yaxasını kənara çəkməsin... Cavanların seçiminə görə mən qədər dövlətin də günahı var... Zaman gələcək rəsmilərin qarşısında o qədən niyə və nə üçün suallar olacaq ki, onları mütləq cavablandırmaq lazım gələcək.

Cəbhə bölgəsindən gələn xəbərləri eşitdikcə ürəyimiz dağa dönür. Şükür ki, ordumuz erməniyə meydan oxumağa başlayıb. Hətta elə bir vəziyyət yaranıb ki, ermənilərin hər yerdə gözünə Azərbaycan diversantları görünür. Mən rəsmi xəbəri yayan orqanlardan fərqli olaraq bu sözü dırnaq arasına almayacam. Belə ki, bəli, bizim diversantlar işqalçının canına vahimə salaraq iti qovan kimi torpaqlarımızdan qovmalıdır. Bunu dırnaqlamağa ehtiyac yoxdur.

Etiraf edək ki, ordumuzda olan indiki sıçrayış MN postuna general-polkovnik Zakir Həsənov təyin edildikdən sonra baş verdi. Lakin elə bir zaman gələ bilər ki, bu sıçrayışın nə üçün 10 il əvvəl başlamaması sorula bilər.

Və yaxud, nədən axı kimsə eyni vəzifədə 22 il oturmalıdır ki, sıçrayış indi başlasın?! Söz söhbət gəzir ki, ölkənin bir saylı sabiq əsgəri Çexiya vətəndaşı olub. Mən, sadə kapitan ordudan ehtiyyata buraxılanda mənim xaricə getməyimə qadağa qoyulmadı. Lakin bir zamanlar məxfi məlumat daşıyıcısı olduğumu nəzərə alaraq ölkədən yaxın 4-5 ildə çıxmağı heç ağlıma belə gətirmərəm. Nədən axı dövlətin sabiq MN ölkədən çıxsın? Bəlkə gələcəkdə verilə biləcək niyə və nə üçün sualları onu qorxudur?! Ancaq unutmayın, bu gün o sualları verməyənlərə gələcəkdə eyni suallar verilə bilər!