Dünən elə bir təsadüflə üzləşmişəm ki, onu oxucularımla paylaşmasam rahatlıq tapa bilmərəm. Lütfən kimsə bunu jurnalist kəmfürsətliyi kimi qiymətləndirməsin, Qüdrət bəysə çox yaxın dostum olduğundan ərklə ona demədən yazmaq cəsarət edirəm...

 Mövzuya keçid etmədən bir məqamı xatırladım ki, Gülər Əhmədova olayının ilk günlərində onunla görüşüb Moderator.az üçün silsilə açıqlamalar alanda sözgəlişi belə bir fikir işlətmişdim ki, artıq siz 24 saat mətbuatın gündəmini elə zəbt etmisiniz, hətta asqırmağınız da xəbər kimi qəbul olunur...

Bu günlərsə Lamiyə Quliyeva və Ülkər İsayeva mətbuatın gündəminə pərçimləndi, Aslan Aslanovun palaz-palaz şəkilləri sayt səhifələrini, televiziya ekranlarını bəzədi. Mirşahin də haqlı olaraq ANS-də “bəlkə Məryəm İsanı doğanda belə ajiotaj yaranmamışdı” kimi çox orijinal fikir səsləndirdi...

Dünənsə dostum Qüdrət Həsənquliyevin bacısının “Təzə Pir”də keçirilən yas mərasimində başıma maraqlı bir hadisə gəldi. Mərasim zalına daxil olub boş yerlərin birində əyləşsəm də məni Qüdrət bəy oturan masaya dəvət etdilər. Heç 10 dəqiqə oturmamışdım, birdən Aslan Aslanov zühur etdi və gəlib Qüdrət bəyin yanında, düz qarşımda əyləşdi. Ordan-burdan xeyli söhbətləşdik, təbii ki, kimliyimi bilmədi və mən də kəmfürstəlik edib nəsə demədim. Durub gedəndən sonra Qüdrət bəy təəccübümü, gözlərimdəki sual yağışını “arifə bir işarə də bəsdi” məntiqiylə havadaca tutub dedi ki, onunla yaxınlığım olmayıb, cəmisi ikicə dəfə rastlaşmışıq. Onun yas yerinə gəlməsi mənim üçün də gözlənilməz oldu. Amma bir neçə dəqiqədən sonra Aslan Aslanovla birlikdə zala gələn bir məhşur persona onu yola salaraq qayıdıb yanımızda oturanda söhbət əsnasında bildirdi ki, sən demə, onun gözlənilməz zühurunda Moderator.az-ın da payım varmış. Necə? Tələsməyin, indicə biləcəksiniz...

“Amma məni narahat edən məsələnin birtərəfli işıqlandırılması və ittihamın sanki qəsdən Aslan Aslanova tərəf yönləndirilməsidir. Təbii ki, soyuq başla və məntiqlə məsələlərə yanşamaq lazımdır və nəzərə alınmalıdır ki, xaraktercə Lamiyyə Quliyeva heç də Azərbaycan xanımlarının adət etdiyimiz xasiyyətində olmayıb. O 13 yaşından zorlandığını iddia etsə də həmin dövrdə nə valideyninə, nə müəlliminə, nə hüquq-mühafizə orqanlarına bir şey bildirməyib. 15 yaşında isə gözünü də qırpmadan bıçaqla adam qətlə yetirib. Mən məsələyə bir hüquqşünas və vaxtilə müstəntiq işləmiş şəxs kimi yanaşdıqda öz-özlüyümdə bəzi suallara cavab axtarmaq zorunda qalıram. Yəni əgər kiçik yaşlarında belə aqressivlik və emosional davranış sərgilənibsə, mümkündür ki, 10 illik həbsxana həyatı da onun xarakterində, psixologiyasında dərin izlər buraxsın və həqiqətən də o həbsxana nəzarətçisinə qarşı növbəti dəfə cinayət törətsin. Təbii ki, bunların hamısı ehtimallardır və mətbuatdakı dostlarımızı da ona səsləyirəm ki, həqiqəti öyrənmədən insanlar haqqında onların taleyinə ciddi təsir edəcək informasiyaları verərkən ehtiyatlı olsunlar. Təbii ki, ortada çox əcaib fakt var və buna ictimaiyyəti qane edəcək səviyyədə aydınlıq gətirilməli, günahkarlar cəzasını almalıdır. Amma belə deyək ki, İmam üçün ağlayanda Yezidi də unutmayaq. Yəni insanların həyatı, taleyi ilə oyun oynamaq hər şeydən öncə günahdır."

Dəyərli oxucum, sən demə, Aslan Aslanovu dünənki yağışlı havada Şəmkirdən Bakıya gətirən Qürət bəyin fevralın 6-da Moderator.az-a verdiyi müsahibədə dediyi bu fikirlər imiş...(//moderator.az/index.php?xeber=69112)

Yəni Aslan Aslanov Qüdrət Həsənquliyevin bu jestinə minnətdarlıq əlaməti olaraq onun matəm günündə təsəlli verən yaxınlarının içində olmaq istəyib... 

İndi Allahdan mərhum bacımıza rəhmət diləyir və Qüdrət bəyə təşəkkür edərək düşünürəm ki, Aslan Aslanovun Moderator.az-a da səbəbkar olaraq bir minnətdarlıq borcu var. Sayta minnətdarlıq borcu da təbii ki, bir maraqlı müsahibə verməyə razılaşması olar. Köhnə palan içi tökmək yox, sadəcə ötənlərin ən məhşur personasıyla həmsöhbət olmaq hələm-hələm ələ düşməz...

 Mən ona bu barədə mesaj göndərəcəm və ümumiyyətlə vəfa borcu məsələsində onun nə dərəcədə səmimi olduğunu siz də biləcəksiniz. Yəni müsahibə alınsa, əminəm ki, hamınız feyziyab olacaqsınız, alınmasa da Şeytana lənət, adamımızı tanıyacağıq...