Moderator. az saytında  “Mirmahmud Mirəlioğlundan qəribə etiraf “ başlıqlı yazıya rast gəldim. Guya, müsahibəndə demisən ki, ”Bu iqtidarın qarşısında bizim müqavimətimiz sıfıra bərabərdir”. Gözlərimə inanmasam da, səndən  də bu yazıya təkzib gəlmədi və bununla da sözlərin müəllifi olduğun bəlli  oldu. Uzun illər səni tanıyan bir insan kimi hələ də inana bilmirəm ki, həmişə təmizliyi, savadı, mübarizliyi ilə seçilən və çoxlarının “Ağa“ deyə müraciət etdiyi bir şəxs millətini zəlil gününə qoymuş bu iqtidarın qabağında belə acizanə pas gedir. Hələ də başa düşə bilmirəm ki, adını “Azadlıq“ bloku qoyub guya müxalif partiyaları bir araya toplayan şəxs millətin olan-qalan ümidini də puç edir, inamını öldürür. Axı, sən məndən də yaxşı bilirsən ki, insanların inamını öldürmək onların özünü öldürməyə bərabərdir. Axı elə rəhbərlik etdiyin partiyada, Milli Şurada, Xalq Cəbhəsi Partiyasında, Musavatda, digər  partiyalarda, hüquq müdafiə sahəsində  yüzlərlə insanlar vardır ki, bu hakimiyyətin haqsızlıqlarını, ədalətsizliklərini, özbaşınalıqlarını, bir sözlə, qanunları ayaqları altına atıb tapdalamasını qəbul etmir və gücü daxilində mübarızəsini davam etdirir, haqsızlıqla barışmır. Məgər, sizə məlum deyilmi ki, bu hakimiyyətin gücü ədalətdə deyil-dubinkadadır, zordadır, özbaşınalıqdadır?    

Dünyanın hansı ölkəsində hakimiyyət ədalətsizliklə barışmayan onlarla sayma-seçmə oğullarını, qızlarını zindanlara doldurur, bir yetim “mersi”yə  görə bir yoluq “malades”  xatirinə  60 manat pensiya alan millətinin büdcəsini dağıdaraq Avropa Oyunlarına milyardlar xərcləyir?                                                              

Hələ bir, siz belə hakimiyyətlə guya danışıqlara gedirsiniz, ondan müsbət, Allahın ümidinə qalmış xalqın xeyrinə nəsə  gözləyirsiniz ? Sizinlə dialoqda yox, görüşdə seçkilərlə bağlı danışıqlara hazır olmadıqlarını bəyan edən, əvəzində məzələnib ilk Avropa Oyunlarını müzakirə edən, “Azadlıq“ , “Qaraba𔝠 bloklarına daxil olan partiya rəhbərlərinin cibinə oyun biletləri dürtüb avtobusa  doldurub stadiona aparan iqtidar sizinlə necə səmimi, ədalətli ola bilər, sizi necə layiqli rəqib hesab edə bilər? Bilmirəm, başa düşmürəm, inanclı insan kimi Allah xatirinə, bəlkə mənə də izah edəsiniz: Gecə-gündüz iqtidara dəsmal tutan Araz Əlizadənin qardaşı Zərdüşt Əlizadənin “Müxalifət prezident aparatından  mandat dilənir” sözlərinə necə dözürsünüz, necə həzm edirsiniz?                                                                                                                                       

Mənim tanıdığım Mirmahmud  bəyin mandatdan ötrü ürəyi getmir, haqqı  nahaqqa vermir, öz millətini səfalət içində boğan hakimiyyətlə bazarlığa getmir, qürurunu heç nəyə dəyişmir. Mənim tanıdığım Mirmahmud  bəy Azərbaycanda yeganə şəxsdir ki, vaxtilə layiq olduğu mandatı götürməkdən imtina etməklə ilkə imza atdı, bu yolla  hakimiyyətin seçki saxtakarlıqlarına kişiyana etirazını bildirdi.  Bəlkə, elə bilirsiniz ki, bu hakimiyyət sizin kimi təmiz, millət qayğısına qalan  şəxslərin  seçilməsində  maraqlıdır? Vaxt gələcək,  mən ölü- siz diri, uzun illər yalnız  saxtakarlıqla hakimiyyəti əlində saxlayan bu iqtidar yağlı vədlər verməsindən asılı olmayaraq sizə heç vaxt mandat verməyəcək. Bu  həmən  hakimiyyətdir ki, 2010-cu ildə də çoxlarına gizlin vədlər verdi, min hiylə ilə, beynəlxalq təşkilatların gözünə kül üfürmək xatirinə 16 siyasi partiyanı deputat seçkilərinə cəlb etdi, nəticəsi də göz qabağında.                                                           

Əzizim Mirmahmud bəy! Müsahibənizdə deyirsiniz ki, parlament seçkiləri haqqında indidən heç nə demək olmaz. Məgər, bu iqtidarın indiyə qədər keçirdiyi seçkilərin hansı normal olub ki, bundan sonra da normal olsun? Onlardan nəsə ədalətli addım gözləmək mümkündürmü?  Qətiyyən yox, bir daha yox. Necə deyərlər, görünən kəndə nə bələdçi ? Nağıllarda olduğu kimi, divin canı şüşədə olduğu kimi, bu hakimiyyətin də canı saxtakarlıqdadır. Nə qədər ki: bu millətin mütləq əksəriyyəti yatır, hələ yuxudan oyanmayıb; nə qədər ki, ziyalısının bir hissəsi vicdanını qəpik-quruşa satıb seçkilərdə səs oğurluğu kimi cinayətdə iştirak edir ; nə qədər ki, üzdə olan ziyalıların  bir hissəsi  satılıb və yaxud, məqsədli  didişmələrdə baş girləyir, bu hakimiyyət hələ ki, kef çəkəcək, şəxsi mənafelərini qorumaq naminə ləyaqətini itirmiş, qarınlarının quluna çevrilmiş  ziyalıcıqlardan  maksimum yararlanacaq. Bu gün hakimiyyətdəkilər  ona görə güclü deyildir ki, ölkəni ədalətlə idarə edirlər, xalqın həqiqi dəstəyinə arxalanırlar. Onların gücü xalqın ifrat passivliyində və bütün sahələrdə saxtakarlıqdadır, riyakarlıqdadır. Belə olan halda sizin bu sözləriniz həqiqi müxalifətə arxadan vurulan zərbə deyilmi? Mən bu sualı bir tikə çörəyə görə hakimiyyətə yaltaqlanan, xaricdə  hakimiyyətin hesabına təhsil  alan oğluna görə “ konstruktiv müxalifət” olana ünvanlamıram, görünür vaxtilə onu yaxşı  və haqlı əzişdiriblər. Mən bu sualı o şəxsə də ünvanlamıram ki, tribunalardan “əsl” müxalifət  adı ilə bar-bar bağırır, Cəmil Həsənli kimi ləyaqətli kişiləri aşağılayır, eyni zamanda, hakimiyyətə xidmət etmək müqabilində  qardaşının tikdiyi hündürmərtəbəli  çoxsaylı binalardan  millətin başına tüpürür. Bu maskalanmış  adamlar elə bilirlər ki, bu həmişə  belə də davam edəcək, iqtidarla müxalifət arasında haça-paça dayanmaqla ləyaqətli insanları aldadacaqlar.                                                                                                                 

Amma çox nahaq yerə. Bir gün  millətin hesab günü gələcək və onda bu hakimiyyətin, eləcə də ona züy tutanların maskası yırtılacaq, hərə öz layiqli qiymətini alacaqdır.                                                                                                                                                                              

Sən isə, çox hörmətli Mirmahmud ağa, seyyid adamsan, təmiz insansan, bu gedilən yol sənin yolun deyil.                                                                                                                 

29.06.2015.