"Facebook"dakı "Deputat2015" səhifəsinin müzakirələrinin növbəti qonaqları millət vəkili Qənirə Paşayeva və parlamentinin Hüquq siyasəti və dövlət quruculuğu komitəsinin sədri Əli Hüseynli olublar. Müzakirələr zamanı onlarla bağlı userlər tərəfindən  həm müsbət, həm də bəzi hallarda reallığa və həqiqətəuyğun olmayan fikirlər səsləndirilib. Odur ki, həm onlarla, həm də daha bir neçə millət vəkili ilə bağlı həmin səhifədə yazdığım  şərhləri oxucularla bölüşürəm:

-Azərbaycan parlamentinin və Azərbaycan siyasətinin ən parlaq simlarından biri! Əli müəllim istər siyasətdə, istər parlamentdə, istərsə də hüquq sahəsində öz yeri, öz çəkisi, öz dəst-xətti olan əsl peşəkarlardan, ləyaqətli və mənəviyyatlı siyasilərdən biridir. Çox mədəni, çox savadlı, çox intellektual bir insan-millət vəkilidir. Siyasətin "ağyaxalıqlı"larındandır. İndiki hakimiyyətə, Əliyevlər siyasətinə və komandasına ən sadiq və ən sədaqətlilərdəndir. Bu hakimiyyət üçün etdiklərini qətiyyən dilə gətirməyənlərdən, gözə soxmayanlardan, təzavökarlardandır. Gündüzləri iqtidar, gecələri müxalifət olanlardan, "nala-mıxa" vuranlardan deyil. Bir sifətli və bir simalıdır. Parlamentin ən fəal üzlərindən, ən aktiv və ən işgüzar komitə sədrlərindəndir (bu sıraya Hadi Rəcəblini, Eldar müəllimi, Rəbiyyət xanımı da əlavə etmək olar). Elə bir plenar və komitə iclas olmur ki, Əli müəllimi hansısa qanun layihəsini müzakirəyə təqdim etməsin. Parlamentdə müzakirəyə çıxarılan və qəbul olunan qanunların böyük əksəriyyəti məhz onun komitəsindən-Hüquq siyasəti və dövlət quruculuğu komitəsindən gəlir və Əli müəllim də onları çox əsaslandırılmış şəkildə və professionalcasına həm komitə iclaslarına, həm də plenar iclaslara təqdim edir. Əli müəllim həm də çox səbrli və çox təmkinli siyasətçi və insandır. Heç zaman bəziləri kimi yeri gəldi-gəlmədi özü ortaya atanlardan olmayıb, abrını gözləyib, özünə və başqalarına hörmət qoyub. O, həm də çox milli-Türkçü bir insandır. Bunu təxminən 7-8 il öncə 1nyus.az və "525" üçün götürdüyüm geniş müsahibə zamanı kəşf etdim...Danışdıqca heyran qalırdım...Odur ki, Əli müəllim kimi intellektuallara və peşəkarlara hər zaman ehtiyac var. Bəlkə də onun özündən daha çox Azərbaycan siyasətinin və parlamentinin ona ehtiyacı var. Odur ki, Əli müəllimə bundan sonrakı fəaliyyətində də uğurlar arzulayıram və arzu edirəm ki, onu növbəti-4-cü dəfə də parlamentdə Millətinin Vəkili görək! 

-Bacı qədər xətrini çox istədiyim, özümə doğma, əziz bildiyim, güvəndiyim, etibar etdiyim Qənirə xanım--Ganire Pashayeva, Ganire Paşayeva! Azərbaycanımızın fəxrlərindən biri! Həm parlamentdə, həm siyasətdə, həm jurnalistikada-publisistikada, həm İnsanlıqda öz yeri, öz çəkisi, öz cığırı, öz yolu, öz dəst-xətti olan bir Azərbaycan-Türk xanımı! Etdiyi təmənnasız xeyirxahlıqları, yaxşılıqları dilə gətirməyən, ona edilən yanlışlıqları, haqsızlıqları, qədirbilməzlikləri, üzünə gülüb "səndən yoxdur" deyənlərin arxasınca nadanca və şərəfsizcəsinə dedi-qodu yapmalarını unudan, bağışlayan, Allahın, İlahinin təqdirinə və əfvinə buraxan, kin-küdurət bilməyən Yücə Könüllü İnsan! Hər zaman hər yerdə olan, xalqının, dövlətinin, millətinin ağrı-acıları ilə yaşayan, nəfəs alan, onun uğurlarına sevinən və bu uğurlara öz təmənnasız töhfəsini verməyə çalışan, öz töhfəsini verən, əlindən gələni əsirgəməyən bir Vətən Övladı! Qənirə xanım tək tovuzluların, öz dairəsinin deyil, hər birimizin, bütün Azərbaycan türklərinin millət vəkilidir, Millətinin Vəkilidir. O, bizim Qənirə xanımdır, bizlərdən, sadə insanlardan, Xalqdan biridir! Özünü gözə soxmayanlardan, deputatam, millət vəkiliyəm deyib özünü dartmayanlardan, başqaları, sıravi insanlarla və ya həmkarları ilə arasına sədd, məsafə qoymayanlardan, "ulduz xəstəliyi"nə tutulub özünü Göyün 7-ci qatında hesab etməyənlərdən biridir və birincilərdəndir! Sadədir, səmimidir, mehribandır, sədaqətlidir, canı yanandır! Kimsəsizlərin, arxasızların, imkansızların, mənəvi-maddi köməyə, yardıma ehtiyacı olanların, haqqı tapdalananların haqq səsidir! Onunla neçə illərdir dostluq, bacı-qardaşlıq, ailəvi dostluq edirəm və bunu da özüm, ailəm üçün şərəf, fəxr hesab edirəm! Fəxr edirəm ki, belə bir gözəl bacım, dostum var! Allah Onun bu millətə, bu dövlətə, bu vətənə, cəmi Türk Dünyasına çox görməsin! Min kərə Amin!

-Sədaqət xanım plenar iclaslarda hərdəndir, amma komitə iclaslarında (Sosial siyasət komitəsinin) tez-tez çıxışlar edir...Mətbuata da bir o qədər həvəsli görünmür.

-Əliağa Hüseynov parlamentin ən qeyri-fəal üzvlərindəndir...

-Şəmsəddin müəllim rəhbərlik etdiyi komitənin iclaslarında aktivlik göstərsə də, plenar iclaslarda nadir hallarda çıxış edir...