Dövlət Bayraq Meydanı İdarəsinin sabiq rəisi Rəşad Məmmədov tezliklə azadlığa buraxıla bilər. Belə ki, həm onun, həm də İsfəndiyar İsfəndiyarovun və Arzu Məmmədovun həbsdə saxlanılması əhəmiyyətini itirib. Çünki hər 3 şəxs Zabil Salmanovdan təzyiq altında alınan ifadə əsasında həbs olunub. 

Moderator.az - a daxil olan məlumata görə, Zabil Salmanov  artıq yazılı şəkildə Milli Təhlükəsizlik Nazirliyinə (MTN) və Baş Prokurorluğa ərizə ilə müraciət edərək həbsdə olan hər 3 şəxsə qarşı verdiyi ifadəsini geri götürüb. O, ərizəsində göstərib ki, onu hər 3 şəxsə qarşı ifadə verməyə məcbur ediblər, indi isə zorla alınan ifadəsindən imtina edib.

Dövlət Bayraq Meydanı İdarəsinin sabiq rəisi Rəşad Məmmədovun vəkili Akif Əlizadə isə deyib ki, dekabrın 12-də Rəşad Məmmədovun barəsində seçilmiş həbs qətimkan tədbirinin müddəti bitir. Onun sözlərinə görə, qanunla müddətin sonuna 7-8 gün qalmış müddətin uzadılıb-uzadılmaması məsələsi müzakirə edilir: “Amma istintaq orqanı heç bir əsas olmadan Dövlət Bayraq Meydanı İdarəsinin rəsinin həbs və istintaq müddətini uzatmaq istəyir. Halbuki faktiki olaraq buna heç bir qanuni əsas yoxdur. Bizdə şübhə var ki, ittihamın əsaslandığı ifadə aradan qalxdığından yenidən nəsə axtarırlar ki, iş üzrə təqsirləndirilənləri həbsdə saxlasınlar”.  

Xatırladaq ki, Rəşad Məmmədovun əsassız yerə həbsdə saxlandığı MTN-in Transmilli İqtisadi Cinayətkarlığa Qarşı Mübarizə Baş İdarəsinin sabiq rəisi, general-mayor Sübahir Qurbanova qarşı irəli sürülən ittihamlar da dolayısı ilə təsdiqləyir. Belə ki, Sübahir Qurbanova qarşı irəli sürülən ittihamlardan biri Rəşad Məmmədovun məhz şərlənərək həbs olunması ilə bağlıdır. İttiham aktında göstərilir ki ki, Sübahir Qurbanov sabiq naziri Eldar Mahmudovun göstərişinə əsasən, Zabil Salmanova zor tətbiq edərək Dövlət Bayrağı Meydanı Kompleksi İdarəsinin keçmiş rəisi Rəşad Məmmədov, İsfəndiyar İsfəndiyarov və Arzu Məmmədova qarşı ərizə yazdırıb. Bu, həmin ərizədir ki, orada Rəşad Məmmədovun külli miqdarda dələduzluq etdiyi iddia olunur.

Bu məsələlərin istintaq orqanları tərəfindən tam aydınlaşdığını və ictimaiyyətin də bundan xəbərdar olduğunu deyən vəkil Akif Əlizadə Rəşad Məmmədovun və digər iki şəxsin tezliklə azadlğıa buraxılacağını gözləyir. Onun sözlərinə görə, Zabil Salmanov istintaqa müraciət edərək ondan zorla alınmış ifadəsindən geri çəkildiyini və Rəşad Məmmədova qarşı heç bir şikayətinin olmadığını yazılı şəkildə bəyan etməsindən sonra Dövlət Bayraq Meydanı İdarəsinin sabiq rəisinin həbsdə qalmasına heç bir hüquqi əsas yoxdur: “Çünki Zabil Salmanovun ifadəsi ortadan çıxandan sonra Rəşad Məmmədova və digər 2 şəxsə qarşı ittiham mahiyyətini tamamilə itirib. Eldar Mahmudov oktyabrın 17-də tutduğu vəzifədən azad olunandan 3 gün sonra Zabil Salmanov MTN-ə və Baş Prokurorluğa rəsmi ərizə ilə müraciət edib. Ərizəsində ona təzyiq göstərərək Rəşad Məmmədov və digərilərinə qarşı ərizə yazdırıldığını, həmin ərizə əsasında tutulan Rəşad Məmmədov və digərilərindən heç bir şikayətinin olmadığını, günahsız insanların azad edilməsini xahiş edib. Rəşad Məmmədov da özünü ittiham üzrə günahkar saymır. Zabil Salmanov isə imtina ərizəsində yazıb ki, onun ifadəsi əsasında günahsız insanların həbsdə yatmasını istəmir. O, xahiş edib ki, imtina ərizəsində yazdıqlarını nəzərə alıb hər 3 şəxsi sərbəst buraxınlar. Amma ərizənin istintaq orqanına təqdim edilməsindən 1 aydan çox vaxt keçsə də, zorla alınmış ifadə əsasında saxlanılan hər 3 şəxs hələ də həbsdə saxlanılır”.

Xatırladaq ki, Dövlət Bayrağı Meydanı İdarəsinin keçmiş rəisi Rəşad Məmmədov 12 may 2015-ci il tarixdə həbs edilib. Səbail Rayon Məhkəməsinin qərarı ilə onun barəsində seçilmiş həbs qətimkan tədbirinin müddəti sonradan uzadılıb. O, hazırda MTN-in İstintaq Təcridxanasında saxlanılır.

Noyabrın 25-də Baş Prokurorluğun yaydığı məlumatda MTN-in 21 sabiq əməkdaşının Cinayət Məcəlləsinin müvafiq maddələri ilə təqsirləndirilən şəxs qismində cəlb edildiyini bildirilib. 19 şəxs barəsində həbs qətimkan tədbiri, 1 nəfər barəsində başqa yerə getməmək haqqında iltizam qətimkan tədbiri seçilib, istintaqdan yayınan 1 şəxs barəsində isə həbs qətimkan tədbiri seçilməklə axtarış elan edilib. Milli Təhlükəsizlik Nazirliyinin əməkdaşlarının törətdiyi cinayət əməlləri nəticəsində hüquqları pozulmuş 57 nəfər zərər çəkmiş şəxs qismində tanınıb. Hazırda ayrı-ayrı vətəndaşlardan yeni müraciətlər daxil olmaqdadır.