Qarabağ uğrunda gedən döyüşlərdə yüzlərlə gənc həyatını qurban verdisə, bəlkə də bir o qədəri də sağlamlığını itirdi. Bu gün Qarabağ müharibəsinin dəhşətlərini özü ilə gəzdirən kifayət qədər qazimiz var. Kimiləri ayağından, kimiləri qolundan olub, kimiləri də bədənindəki qəlpələrlə yaşamağa məhkumdur. İllər keçdikcə həmin qazilərimiz çox erkən yaşlarında bir-bir sıralarımızdan ayrılırlar. Müharibə zamanı aldıqları zədələr, qəlpələr təəssüf ki, onların çox yaşamağına imkan vermir.  

Torpaqlarımız uğrunda sağlamlığını qurban vermiş və bu gün ölümlə üz-üzə dayanan Qarabağ qazilərimizdən biri də Rəhman Məmməd oğlu Rzayevdir. Rəhman 1991-ci ildə Qarabağ uğrunda gedən döyüşlərdə erməni işğalçılarına qarşı vuruşmaq üçün könüllü olaraq cəbhəyə yollanan  insanlardandır. O, hərbi xidmətini də döyüş bölgəsində keçirib. Əsgəran, Ağdərə,  Ağdamın müxtəlif bölgələri, eləcə də  Şahbulaq,  Canyataq, Gülyataq,  Narışlar,  Xramot  kəndləri uğrunda gedən döyüşlərdə iştirak edib, düşmənlə üzbəüz vuruşub. Qızğın döyüşlərin birində yaralanan Rəhman bir müddət müalicə olunduqdan sonra yenidən cəbhəyə yollanıb  və uzun müddət düşmənlə mübarizəni davam etdirib.  Növbəti dəfə  də ağır yaralanan Rəhmanın bir ayağı amputasiya olunub. Rəhman aldığı yaralara görə  indiyədək altı dəfə əməliyyat keçirib.

Bədənində çoxsaylı qəlpələr gəzdirən Qarabağ qazimiz indi də Hepatit C,  qara ciyər serrozundan əziyyət çəkir. Demək olar ki, ayın yarıdan çoxunu xəstəxanalarda keçirən Rəhman 1 saylı Şəhər Kliniki, Qanköçrmə, 3 saylı Sabunçu Klinik xəstəxanalarında dəfələrlə müalicə alıb və indi də müalicə almaqdadır. Aldığı  qəlpə  yaraları onu anbaan ölümə yaxınlaşdırır. Həkimlər qazimizin qarın boşluğuna su yığılmasının qarşısını almağa çalışırlar.

Yaxınları bildirir ki, indiyə qədər müalicə xərcləri Rəhmanın döyüş dostlarının, doğmalarının maddi köməyi ilə qarşılanıb. Ancaq səhhətindəki problemlər daha da ağırlaşdığından ailəsi müalicə xərclərini ödəyə bilmir. 

Yaxınları bildirir ki, döyüşçümüzün durumu ilə bağlı  yuxarı strukturlara dəfələrlə müraciət edilməsinə baxmayaraq heç bir nəticə olmayıb. Ailəsi Moderator.az vasitəsilə bir daha aidiyyati qurumlara, müvafiq icra orqanlarına müraciət edir. Çünki  onun sağalması  ailəsinə, azyaşlı övladına qovuşması üçün  dövlətin dəstəyinə böyük ehtiyac var.  

Ümid edirik ki, bu müraciətdən sonra dövlət qurumları, həmçinin Rəhmanın xəstəliyinin müalicəsinə maddi və ya mənəvi imkanları çatan şəxslər öz köməyini, dəstəyini əsirgəməyəcəklər. Qarabağ uğrunda sağlamlığından keçən döyüşçümüzün göz görə-görə ölməsinə izin verməyəcəklər.

Rumiyyə MİRASLAN