Bu gün ADP İdarə Heyətinin növbəti toplantısı keçirilib. Toplantıda ölkə və beynəlxalq aləmdə baş verən icyimai-siyasi proseslər əsas müzakirə obyekti olub. Toplantı iştirakçıları ilk növbədə aprelin əvvəlində işğal altında olan Qarabağ ətrafında baş verən döyüşlər, bu döyüşlərdə ordumuzun əldə etdiyi nailiyyətlər, beynəlxal təşkilatların, ayrı-ayrı dövlətlərin ölkəmizə vediyi dəstək, bütün cəbhə boyu düşmən ordusunun ağır itkilər hesabına geri oturdulması barədə müzakirələr aparıb. Qeyd edilib ki, müharibədə verilən itkilərə baxmayaraq üç gün ərzində davam edən döyüşlər ordumuzun peşə hazırlığının üstünlüyündən, hərbi potensialımızın yüksək olmasından, xalqla ordu arasında vəhdətdən xəbər verməklə əldə edilən döyüş nəticələri erməni ordusunun məğlubedilməzliyi barədə miflərə son qoydu, Azərbaycan xalqının və ordusunun qüdrətini nümayiş etdirdi.

İdarə Heyəti  Türkiyə, Pakistan, Ukrayna, Belorusiya, İran və digər dövlətlərin xalqlarının, nüfuzlu Avropa qurumlarının bu savaşda Azərbaycanın haqlı mövqeyini müdafiə etdiklərinə görə xalqımız adından həmin dövlət və birliklərə daxil olan xalqlara təşəkkürünü ifadə edib və beynəlxalq təşkilatları, arxasında rus imperiya ambisiyasının durduğu erməni işğalına qarşı mübarizədə  Azərbaycanın ədalətli mövqeyini daha ciddi şəkildə müdafiə etməyə çağırıb.

İdarə Heyəti postsovet məkanında baş verən münaqişələrin, etnik, dini çarpışmaların əsas kökünün Rusiyadan qaynaqlandığına, Qarabağ münaqişəsinin məhz Rusiyanın əli ilə törədildiyinə diqqət çəkib və hazırki şəraitdə Dağlıq Qarabağ probleminin həllininin, Azərbaycanın suverenliyinin, müstəqilliyiyinin qorunmasının Türkiyə, Amerika və Avropa dövlətləri ilə strateji müttəfiqlikdən keçdiyini bildirib və hakimiyyəti xarici siyasətimizin prioritetlərinə daxil olan avroatlantik məkana inteqrasiya kursundan heç bir halda geri durmamağa çağırıb.

İdarə Heyəti Dağlıq Qarabağ ətrafına daxil olan bir neçə rayonun qaytarılması şərti ilə Azərbaycanı status-kvonu saxlamağa səsləyən, rus qoşunlarını sülhməramlı qüvvə adı altında Dağlıq Qarabağ ərazisində yerləşməyə dəvət edən çağrışlardan narahat olduğunu bildirib və Dağlıq Qarabağ probleminin siyasi yolla həllinin artıq iflasa uğramasına diqqət çəkərək hakimiyyəti münaqişənin müddətinin uzadılmasına xidmət edən status-kvodan imtina etməyə, Dağlıq Qarabağ da daxil olmaqla işğal altında olan ərazilərimizi beynəlxalq hüququn ortaya qoyduğu bütün vasitələrə azad etməyə çağırıb.

İdarə Heyəti İstambulda baş tutan İƏT-nın zirvə toplantısının nəticələrini və bu sammitdə  islam ölkələrinin birliyinə xidmət edən müzakirələri təqdir edib. Qeyd edilib ki, ADP-nin hələ bir necə il bundan əvvəl BMT Təhlükəsizlik Şurasında müsəlman ölkələrindən birinə veto hüququnun verilməsi ilə bağlı irəli sürdüyü ideyanın bu sammitdə yenidən gündəmə gəlməsini, vahid islam ordusunun yaradılmasını, islam birliyinə nail olunması, isalm ölkələri daxilində təfriqələr və məzhəb davalarının aradan qaldırılması, həmrəyliyin əldə edilməsi üçün məzhəb və təriqətlərdən imtina edilməsi haqqında səslənən fikirləri alqışlayıb.

İdarə Heyəti  son vaxtlar bu və ya digər şərtlər daxilində Azərbaycanın hər hansı bir ölkəyə birləşdirilməsi barədə səsləndirilən bəyanatların Azərbaycan Konstitusiyasının təməl prinsipi olan suverenlik və müstəqqilliymizlə bir araya sığmadığını bildirib və bu cür fikirlərin dövlətçiliymiz üçün zərərli olduğunu bir daha diqqətə çatdırıb.

İdarə Heyəti ölkəmizdə yerli şöbələrə malik olan və payçıları arasında  Azərbaycan vətəndaşlarının da olduğu bildirilən Rusiyanın VTB bankının erməni hərbçilərinin ailəsinə yardım etməsi haqqındakı xəbərlərdən hiddətləndiyini qeyd edib və Respublika Prokurorluğunu adıçəkilən məsələ ilə əlaqədar araşdırma aparmağa çağırıb.