“Sərkisyanın bu fikirləri yenə də bir məsələni təsdiq edir ki, Ermənistan sülh istəmir, Ermənistan öz təcavüzkar siyasətini davam etdirmək istəyir. Hazırda Ermənistanın bütün istəkləri status-kvonu və  Azərbaycanın işğal olunmuş ərazilərini öz nəzarətində saxlamaqdır”. 

Bunu Moderator.az -a açıqlamasında millət vəkili Asim Mollazadə Ermənistan prezidenti Serj Sərkisyanın Qarabağ məsələsi ilə bağlı danışıqlardan rəsmən imtina etməsinə münasibət bildirərkən deyib. 

A.Mollazadə bildirib ki, Sərkisyanın belə bəyanatlarına, siyasətinə yaxşı olardı ki, beynəlxalq ictimaiyyət, beynəlxaql təşkilatlar, MİNSK qrupu qiymət versin: “MİNSK qrupu təcavüzkarın siyasətini qınayan bəyanatlar vermir. Ermənistan görür ki, onlara qarşı nə sanksiyalar, nə təziqlər var və təbbi olaraq da Sərkisyan belə açıqlamalarında “öz siyasətimizi, təcavüzümüzü davam etdirəcəyik, Azərbaycanın işğal olunmuş torpaqlarını qaytarmayacağıq” fikirlərini səsləndirir. Bu sözlərə biz beynəlxalq təşkilatlardan, ilk növbədə ATƏT və BMT-dən müvafiq qəraralar və müvafiq reaksiyalar gözləyirik”.

Deputat vurğulayıb ki,  Azərbaycan sülh istəyir və sülh danışıqlarının nəticə verməsini istəyir: “Azərbaycan böyük səbrlə beynəlxalq təşkilatlardan, Qarabağ münaqişəsinin həlli ilə məşğul olan qurumlardan dəstək istəyir. Bilirik ki, Azərbaycan Ermənistanın istənilən təxribatına cavab verə bilər, amma Azərbaycan hansısa hərbi əməliyyatlar planlaşdırmır. Sadəcə olaraq Azərbaycanın yetərincə silahlı qüvvələri var ki, Ermənistanın istənilən təxribatını cavabsız, cəzasız qoymasın. Biz bu gün də böyük səbrlə beynəlxalq təşkilatlardan sülh yolu ilə Qarabağ münaqişəsinin həllini tələb edirik”. 

Qeyd edək ki, ötən gün İrəvanda “Bloomberg” agentliyinə müsahibə verən Ermənistan prezidenti Serj Sərkisyan danışıqlardan rəsmən imtina edib. Sərkisyan bildirib ki, Dağlıq Qarabağ münaqişəsi zonasında müharibə “istənilən an” başlaya bilər və münaqişənin nizamlanmasına dair danışıqların perspektivi çox azdır”.