Məktəbin direktoru işə təyin olunan zaman ixtisas tələblərinə məhəl qoyulmadan yəni 3 il pedaqoji stajı ola-ola təyin edilib. Vəzifəyə təyinatı zamanı əvəlki direktorun onun qaynatası olması əsas meyar kimi nəzərə alınıb. Bu azmış kimi heç bir İKT və təhsilin idarə edilməsi sahəsində biliyi olmaya-olmaya RTŞ yanında şuranın üzvüdür. Məktəb direktoru təyinatı zamanı ixtisas tələblərinin bu cür ayaqlar altına atılmasının səbəbi görəsən nə ola bilər? Bu məktəbdə direktor vəzifəsi uğrunda gərgin mübarizə kənd camaatının yadından çıxmır. Belə ki, həmin dövrdə bu məktəbin dərs hissə müdiri şantaj edilərək və digər bir müəllimi həbs edilərək rəqiblər sırasından çıxarıldı.

Dəmirçi kənd ümumi orta məktəbində şagirdlərin və siniflərin sayı hətta həmin ərazidə yerləşən Bədəlan tam orta məktəbindən xeyli çoxdur. Ümumi orta məktəb olan bu təhsil müəssisəsində yaxınlıqda yerləşən tam orta məktəbdən şagirdlərin sayının az qala iki dəfə çox, lakin müəllimlərin sayının az qala iki dəfə az olması özü şübhə doğurur. Özü də elə bir şəraitdə ki, Bədəlan kənd tam orta məktəbi bu məktəbin yerləşdiyi kənddən az qala iki dəfə böyük olan dörd kəndin şagirdlərini əhatə edir və bu məktəbdə bir dənə də olsun paralel siniflər yoxdur.

Bu məktəbdə günün ikinci yarısında şagirdlərin məktəbə axını müşahidə edilir. Bu ilk baxışdan fakultativ və dərnək məşğələlərinin bu məktəbdə keçirildiyi qənaətini yarada bilər. Lakin dövlətin müəssisəsində müəllimlərin iş zamanı repetitorluqla məşğul olması, buna görə şagirdlərdən pul alınması və hətta bu işlə məktəb rəhbərliyində çalışanların iştirakı adamı dəhşətə gətirir.

Məktəbin texniki işçilərindən ümumilikdə 10 nəfər belə gözə dəymir. Xüsusən məktəbin təmizliyi ilə məşğul olan xadimlərdən 3-4 nəfər gözə dəyir. Bu yazıqlar azı iki nəfərin əvəzinə işləməli olurlar. Təbii ki, bu texniki işçilərin vəzifəsi vakant deyil və ehtimalən onların maaş kartları kimlərinsə cibindədir. Kəndin əvvəlki ərazi nümayəndəsi gizlədilən vakansiyalar barədə məlumatı ictimaiyyətə sızdırsa da sonda bu admalar onun vəzifədən getməsi üçün müəyyən tədbirlər də görməkdən çəkinmədilər.

Məktəbin psixoloqu məktəb direktorunun əridir. Əvvəllər bu adamın adı məktəbdə coğrafiya müəllimi kimi rəsmiləşmişdi. Özü isə Bakıda yaşayır və burda sahibkarlıqla məşğul idi. İndi isə baza pxisoloq təhsili olmaya-olmaya məktəbdə psixoloq işləyir. Bu azmış kimi adına dərs saatları da yazılıb. Bu da azmış kimi hələ bu adam Bakıda yaşayıb və işləməklə distant yolla məktəbdəki fəaliyyətini də davam etdirir.

Məktəbdə Azərbaycan dili, Ədəbiyyat, Ümumi tarix, Azərbaycan tarixi, Fizika, İnformatika, Biologiya, Texnologiya, Musiqi, Həyat bilgisi və Təsviri incəsənət dərsini deyə bilən ixtisaslı müəllimlər yoxdur. Bu fənlərə aid dərs saatları digər ixtisasdan olan müəllimlər arasında ata malı kimi bölünür. Hətta bu fənləri ibtidai sinif müəllimləri belə deyir. Məktəbdə bütün dərs saatlarını ixtisaslı riyaziyyat, coğrafiya, kimya, xarici dil, fiziki tərbiyə və ibtidai sinif müəlliumləri aparırlar. Bu cür vəziyyətlə məktəbdə keyfiyyətdən söhbət gedə bilərmi? Repetitorluğun hesabına nə qədər bu vəziyyəti nəzarətdə saxlamaq mümkündür? Müasir dövrdə məktəbdə ixtisaslı fizika, biologiya, tarix, dil-ədəbiyyat və informatika müəllimi olmadan və bu dərslərin hətta ibtidai sinif müəllimləri tərəfindən aparılmasına nə ad vermək olar? Bu məktəbdə bir-neçə sinif müəlliminin diplomu müstəqilliyin ilk illərində dövlət qeydiyyatı olmayan kolleclərə məxsusdur. Yəni bu diplomlar saxtadır. Bir neçə müəllim isə müəllimlərin işə qəbulu ilə əlaqədar mərkəzləşmiş müsabiqədən keçə bilməyən şəxslərdir. Hətta bu məktəbdə ibtidai sinif müəllimləri yuxarı siniflərdə fundamental fənləri tədris edirlər və ya ən yaxşı halda qiyabi təhsil aldıqları halda özlərini fənn müəllimi kimi sınayırlar.

Nazirlik illərdir mərkəzləşmiş qaydada müəllim qəbulu həyata keçirdir. Görəsən məktəb rəhbərliyi kimə güvənib bu ştatları vakansiyaya çıxarmır və ya digər məktəblərdən bu dərsləri demək üçün müəllimlər dəvət eləmir? Görəsən məktəb rəhbərliyi hansı cürətlə TN-in vahid formalı dioplomu olmayan müəllimləri, yəni saxta diplomlu ibtidai sinif müəllimlərini məktəbdə saxlayır? Görəsən məktəb rəhbərliyi vakansiyaya çıxartmadığı ixtisasa sonradan müəllimlərin mərkəzləşmiş müsabiqədən kəsilən şəxslərin müəllim kimi işə qəbul edir?

Bu müricətimizdə bəzi halların və insanalrın adını bilərkdən çəkmədik. Bu məktəbdə baş verən qanunsuz əməllərin hansı şəxslər tərəfindən dəstəklənməsini də açıqlamadıq. Biz ümid edirik ki bizim müraciətimizi məktəb rəhbərliyi, müəllimlər və kənd cammatı normal qarşılayacaq və bütün bu halların aradan qaldırılmasına təşəbbüs göstərəcək. Ona da ümid edirik ki, bu nöqsanların və maliyyə pozuntularının baş verməməsi məktəbdə təhsilin keyfiyyətinə və ixtisaslı insanların işlə təmin edilməsinə gətirib çıxaracaq. Müraciətimizin əsas məqsədi də doğma kəndimizdə təhsilin çiçəklənməsidir. Məktəb təhsil ocağıdır və məktəbin əsas işi şagirdlərə təlim və tərbiyə verməkdir. Məktəb kimlərinsə qazanc mənbəyi olmalı deyil.

Hörmətli nazir! Sizdən bu məktəbdəki vəziyyəti yoxlamaq üçün xüsusi komissiyanın göndərilməsini xahiş edirik. Belə olmazsa yerli təhsil idarəetmə orqanlarının bu məsələni dərindən araşdırmağa və məsələni yoluna qoymağa imkanları sona qədər çatmaz. Çünki məsələnin kökü gəlib müəyyən yerlərə çıxa bilər və bu da müəyyən dairələrin maraqlarına uyğun deyil.