Erməni mediası bu dəfə də səfərbərliklə bağlı geniş kampaniyaya başlayıb. Armenianow.com saytında bildirilir ki, birinci Qarabağ müharibəsində iştirak etmiş döyüşçülər yenidən orduya gətirilir. “İkinci dəfə əsgər gedənlər. Qara Panterlər yenidən Qarabağa qayıdır” yazısında qeyd edilir ki, Azərbaycanın 1-2 yüksəkliyi tutması boş şeydir: “Düşmənin sayca daha çox olması və daha müasir silahlarla təmin olunması da önəmli deyil. 1990-cı illərdə də belə idi. Ancaq biz onlara qalib gəldik. Bu dəfə də elə olacaq”.

Xatırladaq ki, panter pişik cinsindən olan yırtıcı heyvandır. Və düşmən özünün də etiraf etdiyi kimi, həm sayca çox, həm də yüksək döyüş hazırlığına malik Azərbaycan ordusunun qarşısına “qara pişiklərini” çıxartmaqla qalibiyyət xəyalları qurur. 

Moderator.az-a bununla bağlı açıqlama verən Qarabağ Azadlıq Təşkilatının sədri Akif Nağı bildirib ki, ermənilərin səfərbərliklə bağlı kampaniyası bir daha Ermənistan ordusunun heç nəyə yaramadığını göstərir.  

A.Nağı ilk əvvəl qeyd edib ki, Azərbaycan ordusunun gücünə nəinki düşmən, hətta bütün beynəlxalq təşkilatlar da şahid oldu: “Ermənilərin bu cür reaksiyası təbiidir. Aprelin əvvəlindəki göyüşlərdə də erməni ordusunun heç nəyə yaramadığı aydın şəkildə göründü. Azərbaycan ordusu onların öyündükləri müdafiə xəttini çox asanlıqla yardı. Düşmən Azərbaycan əsgərinin də, zabitinin də, silah-sursatının da gücünü gördü. Hər cəhətdən, istər döyüş hazırlığı, istərsə də yüksək döyüş ruhu baxımından Azərbaycan ordusunun da, Azərbaycan xalqının da ermənilərdən üstün olduğu isbat olundu. Bunu nəinki düşmən, hamı gördü, bütün beynəlxalq təşkilatların rəylərində də bu barədə məlumat var. Dünyada nüfuzlu Stratfor araşdırmalar mərkəzinin verdiyi açıqlamada da aydın şəkildə qeyd olundu ki, Azərbaycan Ermənistana öz gücünü, Ermənistandan qat-qat güclü olduğunu sübut etdi. Sadəcə hərbi əməliyyatları dayandıraraq əldə olunmuş nailiyyətlərdən diplomatik cəbhədə uğurlar qazanmaq qərarına gəldi. Bu rəylər hər yerdə var, Ermənistanın siyasi, hərbi rəhbərliyi də dolayısı ilə də olsa Azərbaycan ordusunun gücünü etiraf etdi”.  

Akif Nağı erməni saytlarında səfərbərliklə bağlı yazılan yazıların təbliğat xarakterli olduğunu deyib: “Ermənilərin 20-25 il əvvəl döyüşmüş veteranları, xüsusi təyinatlıları bu gün heç nəyə yaramırlar. Ermənistan öz ordusunun zəif olduğunu gördü və indi  də ümidi onlara qalıb. Ermənistan müxalifəti də hakimiyyəti ittiham edir ki, bu neçə ildə ordunu yarada bilməyiblər. İndi görün nə günə qalıblar ki, 50-60 yaşlı köhnə döyüşçülərə ümid bağlayıblar. Bir daha qeyd edirəm ki, bu ermənilərin düşdüyü ağır vəziyyətin göstəricisidir. Ona görə də indi təbliğat vasitəsilə nəsə etməyə çalışırlar. Ancaq bu da mənasız bir şeydir. Aprelin əvvəllərində Azərbaycan ordusunun xüsusi təyinatlıları düşmənin istənilən hərbi obyektinə, məntəqəsinə girdi, dağıdıb çıxdı. Bunu da ermənilər çox yaxşı bilirlər”. 

Təşkilat sədri sonda onu da vurğulayıb ki, erməninin qara panterləri varsa, bizim də gözünü qisas hissi bürümüş Qarabağ veteranlarımız var: “Biz dünən ölkə rəhbərliyinə müraciət etdik ki, döyüşmüş insanları səfərbər etsinlər. Biz yaxşı bilirik ki, ordumuz güclüdür, ermənilərə də, onların arxasında dayananlara da qalib gələcəyik. Amma veteranların da müəyyən döyüş təcrübəsi var və o təcrübədən də lazım bildikləri məqamda istifadə edə bilərlər. Bunun üçün biz hazırıq. Bütün parametrlərlə Azərbaycan ordusu kimi Qarabağ müharibəsi veternaları da, Azərbaycan cəmiyyəti də ermənidən qat-qat üstündür. Bu bir reallıqdır ki, ermənilər Azərbaycanın qarşısında duruş gətirə bilməzlər”.