Bir dostum var, məni Ərdoğanın fanatı adlandırdı. Halbuki Ərdoğana qarşı dəfələrlə tənqidi mövqeyimi konkret yazılarımla ortaya qoymuşam. Ümumiyyətlə, mən heç bir siyasətçini tərifləmirəm. Mənim təbiətimdə belə bir şey yoxdur. Simpatiya bəslədiyim siyasətçi Atatürkdür, bir də Rəsulzadə. Onlar da buna görə mənə “təşəkkür etmək” iqtidarında deyillər.

Adam hərbi çevrilişi müdafiə edir. Məncə, demokartik düşüncəli birisi heç bir halda hərbi çevrilişi dəstəkləyə bilməz. Xalqın səsvermə ilə iqtidara gətirdiyi liderə qarşı olan hərbi çevrilişi dəstəkləmək heç olmaz. İkinci, bu hərbçilər niyə qiyam edib, kimin göstərişi ilə edib? Arxasında Amerika dayanan Fətullah Gülənin göstərişi ilə. Bu barədə bütün dünya bilir, amma dostum bilmir. Bir daha vurğulayıram, Türkiyədə dava iki islamçı lider arasında gedir. Dostum isə açar məsələnin üstündən sükutla keçir və elə təəssürat yaratmağa çalışır ki, guya hərbi çevrilişi dəstəkləmək Türkiyədə demokratiyanı dəstəkləmək anlamına gəlir. Qətiyyən belə deyil.

Onu da deyim ki, Türkiyə getdikcə daha çox islam düşüncəsinin dərinliklərinə qərq olacaq. Bu qaçılmaz tarixi bir prosesdir. Keçmiş SSRİ məkanında da, xüsusən digər türk dövlətlərində də vəziyyət eyni. Bu günkü Türkiyədə iqtidar da, müxalifət də islama bağlıdır. Bu artıq inkarolunmaz faktdır. CHP, MHP vəziyyəti dəyişmək gücündə deyil. Elə onlar da getdikcə islama daha çox bağlanırlar. Çünki xalqdan gələn sifariş belədir. Dostum isə deyir ki, məhz bu amilə görə biz Türkiyədən kənarda durmalıyıq. Guya ki, Azərbaycanın demokratiya ilə bağlı hansısa perspektivi var. Yoxdur. Azərbaycanda İlham Əliyevə alternativ yalnız islamçılardır. AXCP və Müsavat üzdə olan müxalifətdir və dekorasiyadır. Qərb Azərbaycanda demokratiyanı avtoritar rejimə qurban verdiyinə görə bu partiyalar faktiki iflasa uğrayıb. Odu sönüb, kül ilə oynayırlar. Yeri gəlmişkən, onlar da açıq şəkildə islamçıları müdafiə edirlər. Düşünürlər ki, islamçıları müdafiə etməklə xalqdan daha çox dətsək ala bilərlər. Tam yanlış. İslamçılar heç vaxt öz liderlərin qoyub Əli Kərimliyə və ya İsa Qəmbərə dəstək verməz. Bəli, hazırda Azərbaycanda güclü islamçı təşkilat görünmür. Çünki İlham Əliyev islamçıları silah gücünə susdurub, bir balaca vəziyyət dəyişsə, onlar qısa bir zamanda təşkilatlanıb İranın əli ilə iqtidara gələ bilərlər. Ümid edirəm ki, Türkiyə və Qərb buna imkan verməyəcək. Amma ilkin münbit şərait olan kimi islamçılar önə çıxacaq və Azərbaycanda at oynadacaqlar. Ümumiyyətlə, Azərbaycanın gələcəyi çox qaranlıqdır və mən ölkəmizin demokratik idarəçilk sisteminə keşəcəyi ilə bağlı islamçıların acığına hərbi çevrilişə dəstək verən dostum qədər optimist deyiləm”¦