"Türkiyə prezidenti   Recep Tayyip Erdoğanın  Türkiyə ermənilərinin dini rəhbərinə yazdığı məktuba çox normal baxmaq lazımdır. Bundan əvvəlki illərdə də oxşar bəyanatlar olmuşdu. Bu məktubu qondarma "erməni soyqırımı" ilə əlaqələndirmək lazım deyil. Onun 24 apreldə yazılmasının da dediyimiz 1915-ci il olayları ilə əlaqələndirmək doğru deyildir". 

Bunu Moderator.az-a açıqlamasında Türkiyənin Erciyes Universitetinin professoru, Azərbaycan-erməni Araşdırmaları Mərkəzinin rəhbəri Qafar Çaxmaqlı Türkiyə prezidenti Rəcəb Tayyib Ərdoğan qondarma erməni soyqırımının növbəti ildönümü münasibətilə İstanbulda erməni patriarxı Aram Ateşyana göndərdiyi məktub haqqında danışarkən deyib. 

"İstanbul Erməni Patrikliyi son vaxtlar özlərinə dini rəhbər seçə bilmir. Bu məktub həm də seçkilərlə əlaqədar arzuların ifadə edilməsidir. Məktubun məzmununu diqqətlə oxusaq belə bir qənaətə gəlmək olar ki, Türkiyədə yaşayan digər xalqlarla birlikdə buradakı milli azlıqlara nə dərəcədə diqqət verilmişdir. Bu bir başsağlığı və hansısa cinayətin etirafı anlamına gəlməz və orada da aydın şəkildə bildirilmişdir ki, Birinci Dünya savaşı illərində yalnız ermənilər deyil, digər Osmanlı millətləri də əziyyət çəkmişlər və həyatlarını itirənlər olmuşdur. "Birinci Dünya Savaşı"nın sıxıntılı şərtlərində həyatını itirən milyonlarca Osmanlı vətandaşına Allahdan rəhmət diləyirəm." Ərdoğan bu adamların hamısı üçün başsağlığı diləyir, məktubunda da ermənilərə ayrıcalıq tanımır və ona da çox normal baxmaq lazımdır. Həm də bu ifadələri ilə 24 apreli provakasyon olaraq önə sürənlərə tutarlı siyasi cavab verir. Ermənilər bütün güclərini bu yalanı Türkiyənin də tanımasına yönəltdiklərindən Ərdoğan onlara açıq mesaj verir". 

"Bəli o illərdə facilər yaşanmışdır, amma bu bir millətə qarşı edilməmişdir. Bundan hamı nəsibini almışdır. İkinci tərəfdən bu məktubun siyasi mənası da var. Məlumdur ki, 24 aprel ərəfəsində erməni diasporası dünyanın müxtəlif liderlərindən 1915-ci il hadisələrinə "soyqırım" dedirtməsi üçün fəaliyyətə keçir. Hər il ABŞ prezidentinin dilindən bu kəlmənin duyulmasını istəyirlər. Tramp da 24 aprel müraciətində "soyqırımı" yox, Obamanın daha əvvəlki illərdə dediyini  "böyük fəlakət" anlamına gələn "Metz yeğerni" deməsi də göstərir ki, erməni yalanları ayaq tutmur, qəbul görmür.

Qarşı tərəfdən həmişə olduğu kimi heç bir reaksiyanın olmaması da göstərir  ki, Ermənistanın xəstə çəmiyyətinin hələ sağalması mümkün görünmür".