Jurnalist istintaq orqanının 1 il 6 aydır şübhəli şəxsləri məsuliyyətə cəlb etməməsindən narahatdır: "Redaksiyanın iş fəaliyyəti pozulub”¦"

Xəbər verildiyi kimi, dünən "Turan" İnformasiya Agentliyinin direktoru Mehman Əliyev Prezident İlham Əliyevin istintaq orqanlarına tapşırıqlarından sonra dərhal həbsdən azad edildi. M.Əliyevin həbsdən azad edilməsi ATƏT və ABŞ Departamenti, həmçinin digər beynəlxalq qurumlar tərəfindən də təqdir edildi, bu addım Azərbaycan Prezidentinin mediaya diqqət və həssas münasibəti kimi qeyd olundu.

Azərbaycan Mətbuat Şurasının sədri, millət vəkili Əflatun Amaşov isə jurnalist Mehman Əliyevin həbsdən azad olunması ilə bağlı Prezidentə minnətdarlıq məktubu ünvanladı. Ə.Amaşov APA-ya açıqlamasında xüsusi olaraq qeyd edib ki, «Mehman Əliyevin həbsdən azad edilməsi ölkə başçısı cənab İlham Əliyevin media ilə bağlı məsələlərə həssas yanaşmasının növbəti bariz nümunəsidir. Biz Mətbuat Şurası olaraq həmişə buna inanmışıq və əmin idik ki, yaranmış insident dövlət başçısının şəxsi diqqəti sayəsində ədalətli şəkildə araşdırılaq, Mehman Əliyevə münasibətdə qanunvericilikdə nəzərdə tutulan humanist addım atılacaq».

MŞ sədri, həmçinin bildirib ki, prezident İlham Əliyev çıxışlarında Azərbaycanda jurnalist həbsi ilə bağlı məsələlərdə bir növ, moratoriumun qeydə alındığını bildirib. Burada başlıca məqam ümumən media təmsilçilərinin fəaliyyətinin cəmiyyətdə söz və ifadə azadlıqlarının dərinləşməsinə yönəlməsidir: «Söz və məlumat azadlığı ali demokratik dəyərdir. Buna görə də kütləvi informasiya vasitələrinin əməkdaşları sırf peşə fəaliyyətinə görə cinayət məsuliyyətinə cəlb edilmirlər. Cənab Prezidentin iradəsi belədir və hələ 2009-cu ildə bununla əlaqədar rəyi olub. Prinsipial məqam budur. Bir neçə il öncə "Təzadlar" qəzetinin baş redaktoru Asif Mərzili həbs ediləndə də cənab İlham Əliyev eyni prinsipiallığı nümayiş etdirmişdi. Prezidentin mövcud istiqamətdəki yanaşması jurnalistika baxımından böyük jestdir. Bir daha cənab İlham Əliyevə Mətbuat Şurası və ölkəmizin media ictimaiyyəti adından dərin təşəkkürümüzü bildiririk".

 Göründüyü kimi, "Təzadlar"ın Baş redaktoru Asif Mərzilinin adının xüsusi olaraq qeyd edilməsi təsadüfi deyildir. Çünki 2009-cu ildə o, əsassız və qanunsuz olaraq sırf peşə fəaliyyətinə görə Yasamal rayon Məhkəməsinin hökmü ilə (hakim Tahir İsmayılov idi) azadlıqdan məhrum edilmişdi və məhz Prezidentin jurnalistin həbsinə sərt reaksiyasından sonra o, 2 gün sonra məhkəmə qərarı ilə həbsdən azad edilmişdi.

Lakin məlum olduğu kimi, baş redaktorun mənzili və şəxsi avtomobili isə ötən ilin mart və iyul aylarında benzin tökülərək yandırılmışdır. Bəs istintaq jurnalistin peşə fəaliyyəti ilə əlaqədar başına gətirilmiş bu cinayət hadisələrində hansı nəticəyə gəlib, cinayətkarlar həbs olunubmu? Mətbuat Şurasının sədri Ə.Amaşovun Asif Mərzilinin neçə il əvvəl həbsdən azad edilməsi ilə jurnalistlərin peşə fəaliyyəti ilə bağlı həbs olunmamasınin ölkə rəhbərliyinin xüsusi diqqət mərkəzində olması fikirlərinin ardınca bu və ya digər suallara cavab tapmağa çalışdıq. Asif Mərzili ilə telefon əlaqəsi yaratdıq və o, bu gün məhz həmin cinayət hadisəsi ilə bağlı hansısa beynəlxalq təsisatın Bakıdakı nümayəndəliyinə dəvət olunduğunu bildirdi, sonra sualımıza konkret cavab verdi: «”¦Diqqətinizə görə təşəkkür edirəm, amma etiraf edim ki, ötən 1 il 6 ay ərzində istintaq orqanı yekun qərara hələ də gələ bilməyib. Ötən ilin martın 13-də şəxsi mənzilim, həmin ilin iyulun 9-da isə şəxsi avtomobilim yaşadığım binanın həyətində, gecə saat 03:20 radələrində benzin tökülərək yandırılıb. Fakt üzrə Xətai RPİ-nin ictintaq şöbəsində başlanan cinayət işinin materialları sonradan Bakı şəhər Baş Polis İdarəsinə verilib. Hələ də istintaq hərəkətləri davam etdirilir. Cənab nazir Ramil Usubov məni şəxsən qəbul edib, bu istintaq həmçinin Baş Prokuror Zakir Qaralovun nəzarətindədir”¦ Aşkar şəraitdə törədilmiş, şübhəli şəxslərin özlərinin bilmədən, naşılıqdan ortaya qoyduqları maddi sübutlar olduğu halda, niyə bu cinayətin istintaqı uzadılır, bilmirəm. Hətta həmin cinayətkarlar mənə məktub da göndərib ki, 3-cü dəfə mənim özümü benzin töküb yandıracaqlar və s. Bu nə deməkdir, istintaqa meydan oxumaq, yoxsa”¦ Ona görə də istintaq sirri olduğundan başqa heç nə deyə bilmirəm, amma cənab daxili işlər naziri Ramil Usubova inanıram və odur ki, cənab nazirlə sonuncu dəfə görüşmək, bəzi məsələləri diqqətinə çatdırmaq istəyirəm. Çünki ilyarımdır redaksiyanın iş fəaliyyəti pozulmuş kimidir, cinayətkarlar isə öz keflərində və fəaliyyətlərindədir”¦Â».

Biz də inanırıq ki, baş vermiş məlum cinayət işinin istintaqı tezliklə yekunlaşacaq, cinayətkarlar qanun qarşısında cavab verəcəklər. Çünki, yuxarıda qeyd etdiyimiz kimi, ölkə Prezidenti cənab İlham Əliyev də jurnalistlərin peşə fəaliyyətinə mane olan, bu fəaliyyətin pozulmasına yönələn hər bir faktı diqqətlə izləyir, alternativ tədbirlər görülməsinə tapşırıqlar verir.