Ötən həftə dünyanın nəhəng alimlərindən biri, bəşəriyyətin elmi istiqamətini dəyişən əslən azərbaycanlı olan professor Lütfi Zadə dünyasını dəyişdi. Lütfi Zadənin bir alim kimi böyüklüyündən çox yazılıb, çox danışılıb. Amma yenə də nə qədər danışılsa, azdı.

Moderator.az 96 yaşında vəfat edən və böyük ehtimalla bir neçə gündən sonra Azərbaycanda dəfn olunacaq alim barəsində silsilə yazıları onun haqqında olan təəssürat və xatirələrlə davam etdirəcək.

Fuad Qurbanov Lütfi Zadə adına Beynəlxalq Müasir Elmlər Akademiyasının vitse-prezidentidir. Həmçinin, nəhəng alimin sağlığında onunla elmi əlaqələri çox güclü olub. Beynəlxalq elmi konfranslarda görüşüblər. Lütfi Zadənin 95 illiyinə həsr etdikləri kitabçada onun nəzəriyyəsi haqqında maraqlı faktı qeyd edib: 

“Vaxtilə, bir qrup alimlər Zadə ideyalarının yeniliyinə və dəyərinə  kifayət dərəcədə şübhə ilə yanaşırdılar. Onlar bu ideyaların əsas mahiyyətini düzgün qiymətəndirmirdilər. 

Hər  şeyi qarışdıran və bu nəzəriyyəyə düzgün yanaşmanın qarşısını alan, paradoksal hal olsa da nəzəriyyənin adının “qeyri-səlis” olmasıdır. Bir çox alimlər elə düşünürlər ki, bu nəzəriyyənin özü də adı kimi qeyri-səlisdir. Əslində isə, burada qeyri-səlis nəzəriyyə yox,  onun öyrəndiyi çoxluqlardı. Daha dəqiq desək, əslində, bu nəzəriyyə qeyri-səlis deyil, əksinə, daha səlis məntiqlə qeyri-səlis obyektləri tədqiq etmək üçün yaradılıb. O yerdə ki, adi riyaziyyatın gücü tükənir, orada yeni yaradılmış qeyri-səli riyaziyyat və qeyri-səlis məntiq fəaliyyətə başlayır. Belə hallar Lütfi Zadənin dediyi kimi əsasən, humanistik sistemlərdə baş verir. 

Bizim fikrimizcə də, belə gözəl nəzəriyyənin adı heç də kifayət qədər uğurııu qoyulmayıb. Bu fikri Lütfi Zadənin özü də 2008-ci ildə Bakıda olarkən təsdiq edib. Nəzəriyyənin adının “Kontinual” və ya “kəsilməz məntiq”  olması daha məqsədəuyğun olardı".