Avqustun 26-sı Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın doğum günüdür.

Mehriban Arif qızı Əliyeva 1964-cü ildə Bakı şəhərində anadan olub. 1982-ci ildə Bakı şəhər 23 №-li orta məktəbi qızıl medalla bitirərək Nəriman Nərimanov adına Azərbaycan Dövlət Tibb İnstitutunun müalicə-profilaktika fakültəsinə daxil olub. 1988-ci ildə İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib. 1988-1992-ci illərdə Moskvada Elmi Tədqiqat Göz Xəstəlikləri İnstitutunda işləyib.

1995-ci ildə Azərbaycan Mədəniyyət Fondunu təsis edib və hazırda onun rəhbəridir. 1996-cı ildə Azərbaycan mədəniyyətinin geniş təbliği məqsədi ilə üç dildə (Azərbaycan, ingilis və rus) nəşr olunan “Azərbaycan - İrs” jurnalını təsis edib. 2002-ci ilin oktyabrında Azərbaycan Gimnastika Federasiyasının prezidenti seçilib. 2004-cü ildən Heydər Əliyev Fonduna rəhbərlik edir. 2004-cü ilin avqustunda Azərbaycan şifahi xalq ədəbiyyatı və milli musiqi irsinin qorunub saxlanılması və inkişaf etdirilməsində xidmətlərinə görə UNESCO-nun xoşməramlı səfiri adına layiq görülüb. 2004-cü ilin dekabrında Azərbaycan Respublikası Milli Olimpiya Komitəsinin IV Baş Məclisində MOK-un İcraiyyə Komitəsinə üzv seçilib.

2004-cü ildən Yeni Azərbaycan Partiyası Siyasi Şurasının üzvü, 2013-cü ildən isə partiyanın sədr müavinidir.

2005-ci ildə fəlsəfə üzrə fəlsəfə doktoru alimlik dərəcəsi alıb.

2005, 2010 və 2015-ci illərdə üçüncü, dördüncü və beşinci çağırış Azərbaycan Respublikasının Milli Məclisinin deputatı seçilib.

Prezident İlham Əliyevin 21 fevral 2017-ci il tarixli sərəncamı ilə Mehriban Əliyeva Azərbaycanın Birinci vitse-prezidenti təyin olunub.

Rusiya prezidenti Vladimir Putinin 9 avqust 2019-cu il tarixli fərmanı ilə Mehriban Əliyeva Rusiya-Azərbaycan münasibətlərinin inkişafında və möhkəmlənməsində xidmətlərinə görə “Dostluq” ordeni ilə təltif olunub.

Mehriban Əliyevanın Azərbaycanda keçirilən I Avropa Oyunları, eləcə də IV İslam Həmrəyliyi Oyunlarının Təşkilat komitələrinin sədri kimi fəaliyyəti beynəlxalq ictimaiyyət tərəfindən yüksək qiymətləndirilib.

İctimaiyyətdə tanınan xanımlar “Yeni Müsavat”a açıqlamalarında Mehriban Əliyeva ilə bağlı fikirlərini bildiriblər.

Öncə qeyd edək ki, Heydər Əliyev Fondunun vitse-prezidenti Leyla Əliyeva anası, Azərbaycan Respublikasının Birinci vitse-prezidenti Mehriban Əliyevanı doğum günü münasibətilə təbrik edib.

Leyla Əliyeva “Instagram” səhifəsində Şövkət Ələkbərovanın ifasında “Mehribanım” mahnısını paylaşıb. Paylaşımda Mehriban Əliyevanın həyatının müxtəlif illərinə aid fotolar yer alıb.

Dilarə Əliyeva adına Qadın Hüquqlarını Müdafiə Cəmiyyətinin sədri, hüquq müdafiəçisi Novella Cəfəroğlu “Yeni Müsavat”a dedi ki, qadın cəmiyyəti olaraq Mehriban Əliyevanı təbrik edirlər:

“Mehriban xanım Azərbaycan üçün xeyli iş görüb və görməkdə davam edir. Məktəblər, xəstəxanalar açır, imkansız ailələrə yardım edir və sairə. Xüsusilə də onun şəhid və qazi ailələrinə qarşı diqqəti danılmazdır. Gördüyü işlərin hamısı göz qabağındadır. Həm Heydər Əliyev Fondu gözəl işləyir, həm də problemi olan insanların dərdinə yanıb, problemini həll edir. Bizim yanımıza xeyli insan gəlib və deyib ki, Mehriban xanımın köməkliyini görüb. Mehriban Əliyeva insanların bir ümid yeridir. Yerdəki məmurlar vətəndaşlara kömək etmədikləri halda, Mehriban xanım sonuna qədər insanlara dəstək olur.

Güclü qadındır, Azərbaycanı bütün dünyada layiqincə təmsil edir. Biz beynəlxalq jurnalistlərin, siyasətçilərin ona münasibətlərini görürük. Bunların hamısı xeyli müsbət cəhətlərdir. Bundan əlavə, onu da qeyd edim ki, Mehriban xanımın təşəbbüsü ilə həmişə amnistiya olub. Çox istərdim ki, yenə də belə hal baş versin və həbsdə olan siyasiləri buraxsınlar. Bununla da həm bizi, həm də Azərbaycanı siyasi məhbus sözündən azad etmiş olar. Onun bu təşəbbüsü çox gözəldir. Xahişim odur ki, yenə də davam etsin. Çox istərdik ki, qadın təşkilatlarına da diqqət etsin. Bizimlə görüş təşkil etsə yaxşı olar ki, biz də dərdimizi ona deyə bilərik”.

“Teleqraf Holdinq”in rəhbəri Aynur Camalqızı: “Öncə Azərbaycanın Birinci vitse-prezidenti Mehriban xanım Əliyevanı ad günü münasibətilə təbrik edirəm. Bu təbrik həm də bütün qadınlarımıza düşür, çünki məhz Mehriban xanım Əliyevanın ictimai-siyasi fəaliyyəti Azərbaycan qadınının cəmiyyətin həyatındakı rolunu genişləndirdi, möhkəmləndirdi. Bu gün Mehriban xanım Əliyeva deyəndə Azərbaycan qadınının siması, dövlətin və xalqın həyatında oynadığı rol yada düşür. Bu təsadüfi deyil. Çağdaş tariximizdə Mehriban Əliyevanın yeri və yolu özünəməxsusdur, təkrarsızdır. Bu da səbəbsiz deyil. Tariximizdə müxtəlif missiyaları həyata keçirən xanımlarımız olub. Lakin Mehriban xanım Əliyeva bu missiyaları - istər diplomatiya, istər mədəniyyətin qoruyucusu, istər şəfqətli əlləri ilə insanlara kömək etməsi - ayrılıqda yox, bütöv halında daşıyır, onu həyata keçirir. Bu baxımdan, müasir Azərbaycan tarixində genişmiqyaslı, hərtərəfli ictimai-siyasi fəaliyyətinə görə seçilən ikinci bir qadının adını çəkmək mümkün deyil. Dövləti dövlət edən onun illərlə, əsrlərlə formalaşdırılan ənənələridir. Və Azərbaycan qadınına seçmək, seçilmək hüququnun verilməsi tarixi ilə Mehriban xanım Əliyevanın fəaliyyətində assosiasiya olunan maraqlı detal var. 100 il öncə, 1919-cu ildə Azərbaycanda qadınlara geniş hüquqlar verildi. O zaman cümhuriyyəti quranların məqsədi Azərbaycan qadınının dövlətin idarə olunmasında, xalqın taleyində ən yüksək səviyyədə iştirakına nail olmaq idi. Yalnız 100 il sonra, bu gün Mehriban xanım Əliyevanın timsalında Azərbaycan qadını buna nail ola bildi. Düşünürəm ki, burada İlahi bir missiya var. Bu missiyanı ləyaqətlə üstlənmək Mehriban xanıma nəsib oldu”.

Politoloq Nəzakət Məmmədova “Yeni Müsavat”a bildirib ki, Azərbaycanın müstəqillik qazanması bir sıra məsələlərdə olduğu kimi qadınların siyasətdə rolunun artması məsələsinə də öz təsirini göstərdi: “Lakin ilk onillikdə qanunvericilik və icra orqanlarında qadınlar bərabərhüquqlu şəkildə təmsil olunsa da, ölkəmizin siyasi elitasında nüfuzlu, siyasi proseslərdə aktiv iştirak etmək potensialı olan qadınlar demək olar ki, yox idi. Məhz Mehriban xanım Əliyevanın siyasi proseslərə qoşulması bu stereotipləri aradan qaldırdı. Onun siyasi elitanın praqmatizmi və humanizmi özündə birləşdirən müdrik siyasətçi kimi fəaliyyəti, prezidentin və xalqın ona olan etimadını doğrultması ölkənin ikinci şəxsinə çevrilmək haqqı verdi. Mehriban Əliyevanın ölkə daxilində və xaricində fəaliyyəti ən həssas, ağır sahələri əhatə edir. O, ölkə xaricində, o cümlədən erməni diasporunun fəal olduğu ölkələrdə ermənilərin anti-Azərbaycan təbliğatını alt-üst edir. Azərbaycanın yüksək mədəniyyətin beşiyi olan müasir dövlət olduğunu bütün dünyaya çatdırmaqla, bunun əksini iddia edən ermənilərin və onların havadarlarının qəlbinə öz fəaliyyəti ilə xəncər kimi saplayır. ATƏT-in Minsk Qrupunun həmsədri, BMT Təhlükəsizlik Şurasının üzvü, illərlə anti-türk və anti-Azərbaycan siyasəti ilə seçilmiş, Dağlıq Qarabağın qondarma rejimi ilə qardaşlaşmış şəhərlər adı altında əməkdaşlıq edən Fransanın mərkəzində ölkəmizin təbliğatını qurmaq, bu işdə şəxsən iştirak edərək Fransanın ən nüfuzlu siyasətçilərini Azərbaycanın dostuna çevirmək məhz Mehriban xanımın fəaliyyətinin nəticəsidir. Ermənilərin illərlə xaricdə apardığı anti-Azərbaycan təbliğatı puç edən də məhz Mehriban xanımdır. Onun uğurlu fəaliyyəti həm də dünya siyasətində böyük nüfuza malik olan güc mərkəzi, Avropa ölkələrinə və ABŞ-ın siyasətinə təsir imkanları olan Vatikanla yaxın əməkdaşlıqda da özünü qabarıq göstərir. Ümumilikdə Mehriban Əliyevanın fəaliyyəti həm dünya siyasətində, həm Azərbaycan diplomatiya tarixində yeni bir istiqamətdir”.

Azəri-Türk Qadınlar Birliyinin sədri Tənzilə Rüstəmxanlı bildirib ki, Mehriban Əliyeva çox böyük missiyaları həyata keçirir:

“O, həm YUNESKO-nun və İSESKO-nun xoşməramlı səfiridir ki, bu, çox böyük missiyadır. Həm də ölkənin birinci vitse-prezidenti, prezidentimizin xanımıdır. Mehriban xanımın öz həyat yoldaşı ilə çiyin-çiyinə ölkəmizin taleyüklü məsələlərində rol alması da çox böyük bir missiyadır. Mehriban xanım bu işləri çox ləyaqətlə yerinə yetirir. Biz bunu izləyir və sevinirik ki, ölkəmizi xaricdə çox ləyaqətlə təmsil edən birinci xanım var. Mehriban xanım həm də çox mərhəmətli bir ana simvolu yaradıb. Hələ illər öncədən uşaq evlərini təmir etdirib, onlara çox ciddi qayğı ilə yanaşır. Bütün bunlar onun bir mərhəmətli ana obrazını yaradıb. Bizim gözümüzdə Mehriban xanım Azərbaycan qadınının çox çağdaş bir obrazı kimi fəaliyyətdədir. Biz də ona uğurlar arzu edirik, bu cür şərəfli işində ona dəstəyik. Doğum günü mübarək olsun”.(musavat.com)