«Son on ildə meliorasiya tədbirlərinə ayrılan vəsaitin həcmi 7,3 dəfə, bütün maliyyə mənbələri hesabına bu sahəyə əsaslı kapital qoyuluşu isə 48 dəfəyə yaxın artıb». Bu fikrləri YAP-ın rəsmi portalına müsahibəsində «Meliorasiya və Su Təsərrüfatı» ASC-nin rəhbəri Əhməd Əhmədzadə bildirib.

Onun sözlərinə görə, meliorasiya və irriqasiya obyektlərinin istismarı xeyli yaxşılaşıb, sahənin maddi-texniki bazası gücləndirilib. 1481,2 km suvarma kanalları, 1036 km kollektor-drenaj şəbəkələri tikilib istifadəyə verilib, 279,1 min hektar suvarılan torpaqların su təminatı və meliorativ vəziyyəti yaxşılaşdırılıb, 21 min hektar torpaq yararlı vəziyyətə gətirilərək kənd təsərrüfatı dövriyyəsinə cəlb edilib, 722 ədəd subartezian quyusu qazılıb.
«Son illərdə mühüm dövlət əhəmiyyətli su təsərrüfatı obyektlərində, Yuxarı Xanbulançay su anbarının qülləli suburaxıcı qurğusunda, Ağstafaçay sağ və sol sahil magistral kanallarında, Mil-Muğan və Samurçay hidroqovşaqlarının aşağı byefində, Türyançay hidroqovşağında, Yuxarı Qarabağ kanalının İncəçay çayı ilə kəsişməsindəki sutullayıcı qurğusunda, Yuxarı Şirvan kanalının Türyançay və Girdimançay dükerlərində, Şəmkir Maşın kanalının I və II pillə nasos stansiyalarında, Göygöl rayonunda Gəncəçay baş suqəbuledici qurğusunda, 130 ədəd subartezian quyusunda, Zərdab, Kürdəmir, Ağsu, Imişli, Ismayıllı, Yevlax, Şamaxı və Xızı rayonlarının ərazisindəki nov kanallarda, ayrı-ayrı rayonların qış otlaq sahələrində yerləşən boru kəmərlərində, dağ çaylarında mövcud olan kilometrlərlə daş-beton mühafizə bəndlərində, suvarma kanallarında və bir sıra digər obyektlərdə əsaslı təmir, bərpa və yenidənqurma işləri həyata keçirilib. Kür və Araz çayları boyunca 876 km uzunluğunda mövcud torpaq mühafizə bəndlərində əsaslı surətdə hündürləndirmə, genişləndirmə və möhkəmləndirmə işləri görülmüş, çayların daha təhlükəli yerlərində 5,8 km uzunluğunda daş-betonla sahilbərkitmə işləri aparılıb», deyə Ə.Əhmədzadə vurğulayıb.
ASC sədri əlavə edib ki, bütün maliyyə mənbələrindən ayrılan vəsait hesabına 2003-2012- ci illərdə sahilbərkitmə tədbirləri həyata keçirilib: «Ölkə əhalisinin daxili istehsal hesabına çörək və çörək məhsulları ilə təmin edilməsi məqsədi ilə iri taxılçılıq təsərrüfatlarının yaradılması ilə ədaqədar olaraq Yuxarı Mil kanalının 10,7 km -lik hissəsinin tikintisi tamamlanıb, Beyləqan və Ağcabədi rayonları ərazilərində 4800 ha sahədə özəl taxılçılıq təsərrüfatları yaradılıb».
Kənd təsərrüfatı üzrə mütəxəssis Vahid Məhərrəmov su və melorasiya sahəsində görülən işlərə qiymət verərək deyir ki, 21 min ha torpağın yararlı vəziyyətə gətirilməsi elə də böyük ərazi deyil: «Nəzərə alsaq ki, bu gün deqradasiyaya məruz qalmış torpaqların sahəsi 3 milyon 700 min ha-dır, o zaman 21 min ha-nın cüzi olduğunu görərik. Ona görə də, bunu xüsusi qabartmağa dəyməz. Bu gür Kür ətrafı torpaqlarda güclü şoranlaşma, erroziya gedir. Bunun da başlıca səbəbləri var».
V.Məhərrəmov ASC-nin üzərinə düşən işlərin müəyyən qədər yerinə yetirdiyini deyir. Onun sözlərinə görə, bu gün əsas problem ASC-nin necə fəaliyyət göstərməsindən çox, hökumətin problemə məsuliyyətsiz yanaşmasıdır: «Müəyyən dövlət proqramları qəbul olunmalı, torpaqların dövriyyəyyə qaytaılması üçün xüsusi işlər görülməlidir. Bütün bunların hamısı hökumətin vəzifə borcudur. Melorasiya və Su Təsərrüfatının fəaliyyətini də hökumət qiymətləndirməlidir. Bu istiqamətdə ayrılan maliyyə vəsailərinin şəffaf xərclənməsrnə nəzarət etməli idi».
«Rayonlarda apardığımız tədqiqatlar zamanı maraqlı mənzərə ilə üzləşirik. Suvarma işlərinin həyata keçirilməsi üçün kanallar çəkilib, amma oraya su verilmir. Suvarma sistemi ilə bağlı mütərəqqi texnologiyaların tətbiqinə rast gəlmirik. Məsələn borular vasitəsilə suyu çəkilməsin tövsiyyə edirik ki, nə ətraf torpaqlara zərər dəysin, nə də su itkisinə yol verilsin. Son illər kanllarda boğulma hallarına çox rast gəlinir. Bunun da qarşısının alınmasının ən başlıa yolu iri boruların çəkilməsidir. Amma hökumət hələ də köhnə üsullardan istifadə edir. Apardığımız araşdırmalar zaman subartezian quyularının tikilməsi ilə bağlı nöqsanlar aşkarlamışdıq. Dövlət proqramında qarşıya qoyulan məqsəd həyata keçirilmir. Bəzən maliyyə çatışmazlığı əsas gətirilərək, Səhmdar Cəmiyyət tərəfindən işlər yarımçıq saxlanılır və bu vaxta kimi çəkilən xərclər batır. Belə bir hala Qəbələ rayonunda rast gəlmişdik», deyə mütəxəssis qeyd etdi.

Vüsalə RÜSTƏMOVA