Avropa Şurası Parlament Assambleyası (AŞPA) Müşahidə Missiyası üzvlərinin Azərbaycan hakimiyyəti tərəfindən “ələ alınması” ilə bağlı telefon danışıqlarının ABŞ kəşfiyyatının dinləməsi və Azərbaycan müxalifətinə bu barədə məlumatlar ötürməsi barədə deyilənlər tam cəfəngiyyatdır.

Ümumiyyətlə, AŞPA müşahidəçilərinə qarşı seçkilərdən sonra Milli Şura və ona yaxınlığı ilə seçilən mətbu orqanları, xüsusilə, bu məsələdə canfəşanlıq göstərən “Yeni Müsavat” qəzeti tərəfindən səsləndirilən çeşidli iddiaların heç bir əsası yoxdur və ola da bilməz.

Bunu Gün.Az-a açıqlamasında Yeni Azərbaycan Partiyası (YAP) İdarə Heyəti və Siyasi Şurasının üzvü, parlamentin komitə sədri Eldar İbrahimov dilə gətirib.

YAP rəsmisinin dediyinə görə, bütün bu ittihamlar, iddialar hamısı müxalifətin radikal kəsiminin və onun nəzarəti altında olan mətbu orqanların mövzu qıtlığından, eyni zamanda, cəmiyyətin və öz ətraflarında olan məhdud saylı insanların onlara yönələ biləcək və artıq yönələn ciddi suallardan yayınmaq, əsas mətləbdən diqqəti yayındırmaq, həmçinin, dünya əksər dövlətləri və aparıcı beynəlxalq təşkilatları, onların müşahidəçiləri tərəfindən seçkilərin yüksək dəyərləndirilməsinə kölgə salmaq cəhdindən başqa bir şey deyil.

Millət vəkili bildirib ki, nəinki müxalifətin qınaq obyektinə çevrilən AŞPA müşahidəçiləri, eləcə də, ATƏT, onun Parlament Assambleyası, digər nüfuzlu qurumlar və onları müşahidə missiyaları 9 oktyabr seçkilərinə, onun nəticələrinə obyektiv, düzgün qiymət, rəy verərək, seçkilərin Avropa və dünya standartlarına uyğun şəkildə azad, demokratik və şəffaf keçirildiyini bəyan ediblər.

E. İbrahimovun qeyd etdiyinə görə, bu günlərdə özünün də iştirak etdiyi ATƏT PA-nın son payız sessiyasında  Azərbaycanda keçirilən seçkilər ciddi müzakirə mövzusu olub və müzakirələrin yekunu olaraq, qurumun həm Bürosu, həm Daimi Komitəsi, həm də Parlament Assambleyası seçkilərlə bağlı müsbət mövqelərini ifadə ediblər.

“İndi bunları necə görməzliyə vurmaq, seçkilərin demokratik, şəffaf şəkildə və ən əsası xalqın iradəsinin ifadəsinə uyğun baş tutduğunu necə danmaq, inkar etmək olar? Bu, ədalətsizlik və vicdansızlıqdır.

Gərək ədalət və vicdan hissini nə qədər itirmiş olasan ki, xalqın seçiminə, bu seçimi obyektiv dəyərləndirənlərə, həqiqəti söyləyənlərə qarşı bu cür cəfəng, böhtan xarakterli ittihamlar, iddialar irəli sürəsən...

Eyni zamanda, ayrı vaxt bunlar özləri deyillərmi beynəlxalq qurumlarla, o cümlədən, indi əsassız şəkildə ittiham irəli sürdükləri AŞPA ilə əməkdaşlığın dərinləşdirilməsindən dəm vuranlar?  

İndi görəsən nə oldu ki, birdən-birə əməkdaşlığa can atdıqları qurumlara qarşı bu cür saxta ittihamlar səsləndirməyə başladılar? Belə çıxır ki, onlar bu məsələdə də heç zaman səmimi olmayıblar, Yəni, “mənimlə deyilsənsə, mənim düşmənimsən” “prinsipi”ndən çıxış edərək,  daim öz şəxsi maraq və mənefələrini üstün tutublar.

Onlar üçün demək olar ki, heç bir müqəddəs dəyər-ölcü qalmayıb. Dünən öydüklərini bu gün heç olmamış kimi söyməkdən çəkinmir, əslində bundan “qürurlanırlar” da. Adam bunlara deməyə söz belə tapmır. Bu baxımdan, bir daha hesab edirəm ki, “telefon danışıqları”nın dinlənilməsi ilə bağlı deyilənlər də cəfəngiyyatdan və qarayaxmadan başqa bir şey deyil.

Axı, bunlar kimdir ki, ABŞ kəşfiyyatı işini-gücünü atıb, bunlara nə isə bildirsin? Yəni, ABŞ kəşfiyyatı o günəmi qalıb ki, bizim müxalifətçilərə vaxt ayırsın, onlara nə ötürsün? Buna el məsəlində deyildiyi kimi, bişmiş toyuğun da gülməyi gələr. Gör bizim radikallar nə günə qalıblar ki, bu cür cəfəng iddialarla özlərini sakitləşdirməyə, ovundurmağa çalışılar...” - deyə, E.İbrahimov sözlərinə əlavə edib.

YAP icra katibinin müavini Mübariz Qurbanlı isə bu məsələ ilə bağlı sorğumuzu cavablandırmaqdan imtina edib.

“Mən bu haqda heç nə deyə bilmərəm”, - deyə, o, bildirib.