Eks-spiker Rəsul Quliyevin Moderator.az-a AXC iqtidarının zəifliyi və Surət Hüseynovun qarşısından qaçması haqqında verdiyi açıqlama cavabsız qalmadı. Müsavat Partiyası Mərkəzi İcra Aparatının rəhbəri Arif Hacılı Rəsul Quliyevi AXC iqtidarına və sonradan da Heydər Əliyevə xəyanət etməkdə suçlamaqla kifayətlənmədi, üstəlik, eks-spikeri 4 iyun çevrilişinin əsas fiqurlarından biri olduğunu iddia etdi.

Amma Rəsul Quliyev Moderator.az-a növbəti açıqlamasında Arif Hacılını “kənd müxbiri” adlandıraraq bu çevrilişdən xəbəri olmadığını, olsaydı, onun qarşısını almaq iqtidarında olduğunu bildirib:

“Azərbaycanın tanınmış  müxbiri yazısı ilə bir daha kənd müxbiri səviyyəsindən heç vaxt yüksəyə qalxa bilməyəcəyini sübut etdi. Kənd müxbiri indiyə qədər Rusiya və İranın kəşfiyyat agentlərinin tək 1993-cü ildə yox, həmişə Azərbaycanda olduğunu 21 ildən sonrada anlaya bilməyib. O hələ də bilmir ki, bu gün Azərbaycanda olan rus və İran agentlərinin sayı 1993-cü illə müqayisədə azı 10 dəfə artıb. O hələ də anlamır ki, 2013-cü ildə Rusiyanın istifadə edə biləcəyi azərbaycanlılar 1993-cü ildə onları qaçıb pərən-pərən olmağa məcbur edən S.Hüseynovdan yüz dəfə varlı və bir o qədər də ağıllı idi. Ancaq höküməti yıxa bilmədi. Çünki 1993-cü ildə Xalq Cəbhəsi hökümətinə xalqın inamı, hörməti və ehtiyat etməsi bu gündən fərqli olaraq sıfırdan aşağı idi. Bu gün Azərbaycanda höküməti dəstəkləyənlərin sayı 100 minə yaxındır. Əgər həmin 1993-cü ildə o höküməti dəstəkləyənlərin sayı 5 minə çatsa idi, Hüseynov heç bir şey edə bilməzdi. Müxbir o dövrdə faktiki olaraq Prezident Aparatında 3-cü adam postunda idi. Mümkündür bir neçə rus və İran agentlərinin adını sadalasın. Mümkündür özünün heç olmazsa bir agenti zərərsizləşdirdiyini misal göstərsin”¦

 Kənd müxbirinin “xəyanət” sözünün mənasının nə olduğunu bilməməsi də təəccüblü deyil. Xəyanət kimisə üzünə tərifləyərək onu dəstəklədiyini canfəşanlıqla elan etmək, ancaq fürsət düşən kimi arxadan bıçaq vurmaq ola bilər. Məsələ ondadır ki, mən heç vaxt sizin rejimi tərifləməmişəm, heç kimdən mənim vəzifəyə gətirilməyimi xahiş etməmişəm, sizinlə işlədiyim 10 gün ərzində həm prezidentə, həm də baş nazirə aparılan siyasətin onları uçuruma apardığını birbaşa üzlərinə demişəm, onlara verdiyim bütün sözlərə əməl etmişəm. 4 iyun çevrilişindən heç xəbərim olmayıb. İndi də qeyd edirəm, əgər sizlər əlinizdən gələ bilməyəcək işi mənə həvalə etsəydiniz, gizli saxlamasaydınız o çevrilişin qarşısını alardım, Əbülfəz bəy də prezidentliyini axıra qədər edərdi.

 H. Əliyevlə əlaqədar da eyni pozisiyada olmuşam.1995-ci ilin ortalarından mütəmadi onun siyasətinin əleyhinə çıxışlar edirdim. Onun arxasınca müəyyən işlər görmək istəsəydim edə bilərdim, ancaq mərdi mərdanə mübarizəyə üstünlük verdim. Bu hərəkətlərin adı xəyanət deyil, kənd müxbiri, siz gec də olsa dil savadınızı artırmağa cəhd etməlisiniz. Bir daha əgər siz və sizə bənzər birisinin Müsavat Partiyasının başına gəlməsi o partiyanın məhvi deməkdir. Sizdə  düz danışmaq fermenti sadəcə olaraq yoxdur. Partiyanın başqanı olub onu məhv edəndən sonra günahı başqalarının üzərinə yıxacaqsınız, xəyanət sözünü saga-sola paylayacaqsınız.

Sonda özünü qəhrəman kimi təqdim etməyə çalışan müxbirin nəzərinə çatdırmaq istəyirəm ki, xəyanətkar statusuna

-Elçibəy Kələkiyə gedən kimi qaçıb gizlənmək, pariklə gəzmək

-1998-ci ildə Elçibəyin üzünə "bəy" deyib ancaq arxadan onun əleyhinə namərdcəsinə işləmək

-Hökümət üzvləri ilə birlikdə Avropa Şurasına Azərbaycanda insan hüquqlarının yüksək səviyyədə olmasıyla bağlı məktuba imza atmaq kimi insanın həyatında atdığı addımlar aid oluna bilər. Bu yazdıqlarımı genişləndirmək çox asandır."