Xəbər verdiyimiz kimi dünən "Lider" televiziyası Mingəçevir avarçəkmə mərkəzindən hazırladığı reportajda azərbaycanlı könüllü Seymur Səfərov adlı şəxsi ingilis turisti kimi təqdim edərək ona ölkəmizi o ki, var təriflədiblər.

Məsələ ilə bağlı Moderator.az-a açıqlama verən media eksperti, “Yeni Nəsil” Jurnalistlər Birliyinin sədri Arif Əliyev bildirib ki, o, bu hala təəccüblənməyib:

“Mən "Lider" TV-nin belə bir süjet hazırlamasından xəbərsizəm, çünki yerli telekanalları izləmirəm. Amma bu dediyiniz hal mənim üçün təəccüblü gəlmədi, mən bu kanaldan daha böyük “qəhrəmanlıqlar” görmüşəm. Bizim bədbəxtçiliyimiz ondadır ki, öz insanımızı əcnəbi yanında 2-ci dərəcəli şəxs hesab edirik, nə olur-olsun azərbaycanlısansa efirə əcnəbi çıxarıb Azərbaycanı təriflətmək istəyirik. Mən bunları KİV yox, ideoloji maşınlar hesab edirəm."