Keçmiş müdafiə naziri Rəhim Qazıyev mərhum eks-prezident Əbülfəz Elçibəyin kürəkəni Aqil Səmədbəylinin bir neçə gün öncə Moderator.az-da getmiş yazısına etiraz məktubu yazaraq saytımıza göndərib və olduğu kimi oxuculara təqdim edilməsini xahiş edir. Bəri başdan bildiririk ki, biz bu deyişmədə tərəf deyilik və qarşı tərəfə də cavab haqqı tanıdığımızı bəyan edirik:

"Mən Aqil Səmədbəylinin qaynatasının müdafiəsinə yönəlik statusuna cavab verməyə bilərdim. Lakin bu cənab tamamilə bixəbər olduğu elə tarixi məqamlara toxunub ki, adam heyrətə gəlir. A. Səmədbəyli qeyd edir ki, Əbülfəz Elçibəy dəqiq blirdi ki, Gəncəyə getsə rus kəşfiyyatı onu öldürəcək. Cənab Səmədbəyli, ölkə prezidenti, Ali Baş Komandan daha hansı səlahiyyətə malik olmalıydı ki, dəqiq bildiyi təxribat hadisəsinin və həmim o təxribatı törətmək üçün Rusiyadan gətirilən təxribatçlıarın qarşısını alsın və ya aldırsın? 

Ikincisi, Səmədbəyli qeyd edir ki, ölümdən qorxan adam rus imperiyasının 75 minlik ordusunu ölkədən qovmazdı.  

Cənab Səmədbəyli, hadisələrə qərəzli və qeyri-səmimi münasibət, ya da bilmədiyi şeylər haqqında bilirmiş kimi danışmaq həmişə insanı çox pis vəziyyətə salır.  Ən acınacaqlısı isı odur ki, bixəbər olduğun hadisələrdən, həmin hadisələrin iştirakçısı və ya hal şahidi kimi danışasan. Aqil bəy, məlumunuz olsun ki, Əbülfəz bəy heç bir imperiya ordusunu ölkədən qovmayıb. Sadəcə olaraq, özünü ziyalı, savadlı hesab edərək bir şəxsin özü uydurduğu ağ yalanı dilə gətirməsi təqdir olunan bir şey deyil.  Həmin dövrdə siz Türkiyədə olduğunuz üçün baş verən hadisələrdən tam bixəbərsiniz. Ixtisasca müəllim və həmin dövrdə müdafiə naziri olduğum üçün, bixəbər olaraq toxunduğunuz  məqamlara təkzibolunmaz faktlarla cavab vermək istəyirəm.  

Keçmiş Sovet-rus ordusunun Azərbaycanda yerləşən hərbi hissələrinin ərazilərimizdən çıxarılması barədə rəsmi danışıqlar, mən müdafiə naziri təyin olunduqdan (17.03 1992) az sonra, 14.04.1992-ci il tarixində başlayıb və rəsmi sənədin imzalanması 15 may 1992-ci il tarixində, Daşkənddə MDB-nin sammitində, Rusiya Federasiyasının müdafiə naziri ordu generalı P. Qraçovla sıravi Rəhim Qazıyev arasında imzalanıb, həmin gündən də hüquqi qüvvəyə minib. Bu müqavilədə, ərazilərimizdə yerləşən rus hərbi hissələrinin 19 may 1992-ci il tarixindən 01 avqust 1994-cü il tarixinədək olan müddətdə hissə-hissə çıxarılması nəzərdə tutulurdu. Yəni, bu proses bilavasitə mənim səyim nəticəsində baş vermiş və kimsə kimisə ölkədən qovmamışdı. 

Cənab Səmədbəyli, yuxarıda qeyd etdiyim tarixlərdə mərhum Elçibəyin hansı dövlət və hökumət vəzifələrinin icra etdiyi, ordunun çıxarılması ilə əlaqədar hansı sənədlərəsə imza atdığı, rəsmi dövlət rəhbərləriylə görüşlər keçirdiyi barədə cənabınızda hər hansı sənəd, sübut, konkret fakt varsa, buyurun açıqlayın. Amma Əbülfəz bəyin rus imperiya ordusunun ərazilərimizdən çıxarılmasının ən qızğın tərəfdarlarından biri olduğunu da mən sizdən qat-qat yaxşı bilirəm və dəfələrlə də bunu qeyd etmişəm. 

Qeyd edim ki, həmin dövrdə heydərçilər, ayazçılar və cəbhəçilər 1992-ci ilin aprelin 20-dən parlamentin qarşısında gecə-gündüz mitinq keçirərərək torpaq uğurunda yox, rus ordusunun Azərbaycandan çıxarılması üçün deyil, hakimiyyət və kreslo uğrunda amansız mübarizə aparırdılar, oturaq mitinq keçirirdilər. Yaxşı olardı onu da biləsiniz ki, rəsmi müqavilədə 01.08.1994-cü il tarixində ərazilərimizi tərk etməli olan imperiyanın ordusunun əmlakı ölkəmizdə saxlanılmaqla,  25.08.1992-ci il tarixində sivil qaydada ölkədən çıxarıldı. Hansı sayda silah-sursat, zirehli texnika, artilleriya, aviasiya və s. hərbi əmlakın alınması təsadüfən cənabınızı maraqlandırarsa, buyurub, 12 il bundan öncə, yəni, 2003-cü ildə Ali Məhkəmənin toz basmış arxivinə atılmış Şuşa-Laçının işğalı barəsindəki cinayət işinin 43, 44, 45, 46, 47, 48, 49-cu cildlərindəki konkret faktları təkzib edilməz sübutlarla ortaya qoyan sənədlərə baxa bilərsiniz. O ki, qaldı, 25.05.1993-cü il tarixində mənim nazir vəzifəsindən istefa verdiyimdən 3 ay sonra Gəncədə yerləşən 104-cü desant diviziyasının bütün əmlakını son dənəsinə kimi ərazimizdən daşıyıb Rusiya fedarasiyasına aparılmasına, bu  Elçibəy iqtidarının hansı fərasətin sahibi olmasının bariz nümunəsiydi. O dövrdə ərazisində müharibə gedən ölkədən, onun halal malı olaraq, qiymətli və külli miqdarda hərbi əmlakın müqavimətə rast gəlmədən daşınması  maymaqlıq və rəzalətin təcəlləsiydi. 

Tarixi hadisələri çox araşdırmaq fikrində deyiləm, lakin yazınızın sonunda “Şuşa işğaldadı, Rəhim Qazıyevə xatırlatma..” ifadəsinə cavab verməmək mümkün deyil. Bəli, cənab Səmədbəyli, hörmətli prezidentin kürəkəni, sizə xatırlatmalıyam ki,  nəinki Şuşa-Laçın, işğal altında olan digər müqəddəs ərazilərimiz də mənim qəlbimin həmişə qan fışqıran yarasıdı və hər zaman çiynimdə daşıdığım və ömrüm boyu da daşıyacağım ağır məsuliyyət yüküdür. Heç vaxt bu məsuliyyət yükünün çiynimdən atmaq fikrində olmamışam. Lakin sizin kimi “ortada yeyib, qıraqda gəzən”, qızğın müharibə getdiyi dövrdə “vətəni sevərək”dən Türkiyədə təhsil alan, amansız döyüş meydanında canını qurban verən şəhid və qazilərimizi vaxtaşırı yad edərək, yaşından-başından yekə danışmaq sizin kimilərinin haqqı deyil. Yaşım sizinkindən çox, həyat təcrübəm də qat-qat artıq olduğu üçün bir tövsiyyə verməyi zəruri hesab edirəm: “Anası durmuşkən, xalasının ürəyi getmiş”lik etmə.

 

Ikinci, mən, 1988-ci ildən 1993-cü ilə qədər meydanlarda birgə azadlıq mücadiləsi apardığım bir kişidən, o prezident olduğu dövrdə mənim də müdafiə naziri kimi gördüyüm, bildiyim, iştirakçısı olduğum hadisələrdən dnışıram. Təbii ki, bu hadisələrdə mərkəzi fiqur kimi mühüm yer tutan Əbülfəz Elçibəylə əlaqədar hadisələri zaman-zaman, yeri düşdükcə mətbuatda işılandırmışam və bundan sonra da bunu edəcəm. Lakin Aqil Səmədbəylinin qaynatası Əbülfəz Əliyev barəsində heç nə danışmamışam və danışmaq fikrim də yoxdur."